काठमाडौं । पल्सर सहिद स्मारक 'ए' डिभिजन लिग फुटबलको सातौं चरणका खेलहरु सोमबारबाट सकिएको छ ।
एन्फा कम्प्लेक्स सातदोबाटोमा सिग्नेचर मनाङ मर्स्याङ्दी क्लब र मछिन्द्र क्लबबीचको खेलसंगै लिगको सातौं चरणको खेलहरु सकिएको हो ।
रेलिगेसन नहुने जारी 'ए' डिभिजन लिगको सातौं चरणको खेलहरु सकिदा लिगमा एक मात्र टोलीले शतप्रतिशत जित निकाल्न सफल भएको छ । त्यो, क्लब हो सिग्नेचर मनाङ मर्स्याङ्दी ।
सोमबार मछिन्द्रलाई १ - ० ले हराएसंगै मनाङले सातौं चरण सकिदा अपराजित यात्रा कायम राख्न सफल भएको हो । लगातार सात खेलमा जित निकालेको मनाङले २१ अंक जोडेको छ । र, अंक तालिकाको शीर्ष स्थानमा आफुलाई राखेको छ ।
लिगको सात खेलमा एक खेल गुमाएको रुस्लान थ्री स्टार १८ अंक जोडेर दोस्रो स्थानमा रहदै मनाङलाई पछ्याईरहेको छ । यस्तै एक खेल गुमाएर १८ अंक नै जोडेर सिएमजी संकटा तेस्रो स्थानमा रहेको छ ।
लिगको सातौं चरणसम्म मनाङ, थ्री स्टार र संकटाले शीर्ष स्थान कायम राखेपनि लिगमा ठुला क्लबहरुले जित निकाल्न संघर्ष गर्नु परेको छ । उपाधि दाबेदार क्लबले जित निकाले पनि जितका लागि साना क्लबसंग अप्रत्याशित संघर्ष गरिरहेका छन् ।
सोमबार मात्र लिग लिडर मनाङले पुछारबाट दोस्रो स्थानमा रहेको मछिन्द्विरुद्ध जितका लागि संघर्ष गर्यो । हालसम्म लिगमा गोल गर्न असफल मछिन्द्रविरुद्ध मनाङले अन्तिम पाँच मिनेट बाँकी रहदा गोल गर्दै जित निकालेको थियो । खेलको ६१ मिनेटमा अन्जन विष्टले पाएको पेनाल्टीमा गोल गर्न नसकेपछि मनाङले अन्तिमसम्म जितका लागि संघर्ष गरेको थियो ।
विदेशी स्ट्राइकर आफिज ओलावालेलाई त्रिभुवन आर्मीविरुद्धको खेलअघि विश्राम गराउने निर्णय गरेको मनाङले अन्ततः ५९ मिनेटमा मैदान उतारेको थियो । अन्तत, ओलावालेकै नायकत्व भुमिकामा मनाङले महत्वपूर्ण जित निकाल्यो ।
सातौं चरण अन्तर्गत सोमबार नै आर्मी क्लबले ब्रिगेड ब्वाइजविरुद्ध जितका लागि संघर्ष गर्यो । ब्रिगेडविरुद्ध जित निकाल्न आक्रमक खेल पस्केको आर्मीले पहिलो हाफमै तीन पहेलो कार्ड खाएको थियो । जसको कारण आर्मीले ब्रिगेडविरुद्ध दबाब राख्न सकेन ।
डिफेन्सिभ खेल्दै काउन्टर अट्याकमा जोड दिएको ब्रिगेडविरुद्ध आर्मीले ६६ औं मिनेटमा एक मात्र गोल गर्न सक्यो । आर्मीका सन्तोष तामाङको लामो पास टेक बहादुर बुठाथोकीले सहजै मिलाएपछि टंक बस्नेतले हेडिङ गोल गर्दै आफ्नो टिमलाई महत्वपुर्ण तिन अंक दिलाए ।
ब्रिगेडविरुद्ध संघर्षपूर्ण जित निकालेपछि आर्मीका प्रशिक्षक नविन न्यौपानेले आफ्नो टिमले लिगमा सोचे अनुरुप खेल्न नसकेको बताए ।
'हामीले मोफसलमा जुन खेल खेलेको थियौ । यहाँ त्यस्तो हुन सकेको छैन । हामीले अघिल्लो बर्षको लयलाई राख्न सकेनौ,' प्रशिक्षक न्यौपानेले भने ।
प्रशिक्षक न्यौपानेले यही प्रदर्शनले उपाधि जित्ने लक्ष्यमा गार्हो हुने बताए । आर्मी १७ अंकका साथ लिगको चौथो स्थान रहेको छ ।
लिग अन्तर्गत नै अर्को उपाधि दाबेदार थ्री स्टारले जावलाखेलविरुद्ध सहज जित निकाल्न सकेन । जावलाखेललाई २ - ० ले पराजित गरेपनि थ्री स्टारले खेलमा निकै मेहेनत गर्नु परेको थियो । थ्री स्टारविरुद्ध पहिलो हाफमा जाजावलाखेलले ७ डिफेन्डर उतारेपछि थ्री स्टारले दबाब खेपेको थियो ।
यस्तै संकटाले पनि पुछारको टिम न्युरोड टिम एनआरटीविरुद्ध जित निकाल्न अन्तिम समयसम कुर्नु परेको थियो । एनआरटीविरुद्ध संकटाले अतिरिक्त समयमा म्याक्सवेलको गोलबाट जित निकालेको थियो ।
यस्तै सातौँ चरणको खेल सकिदा नेपाल पुलिस र हिमालन शेर्पाले १–१ गोलको बराबरी खेल्दा एपिएफले सरस्वतीलाई ३–० गोल अन्तरले पराजित गर्यो । लिगमा ११ अंक जोड्दै पुलिस र हिमालन शेर्पा क्रमशः पाँचौ र छैठौ स्थानमा रहेका छन् ।
यस्तै च्यासल युथ क्लबले फ्रेन्डस क्लबविरुद्ध ३–१ को जित निकालेको थियो । १० अंक जोडेको च्यासल सातौं स्थानमा रहदा समान अंकसहित एपीएफ आठौं स्थानमा रहेका छन् ।
लिगको सातौं चरण सकिदा ६ अंक जोडेको सरस्वती नवौ र ५ अंक जोडेको फ्रेन्ड्स दशौं स्थानमा छन् । ४ अंक जोडेर जावलाखेल र ब्रिगेड ११ र १२ औं स्थानमा रहदा ३ अंक जोडेको मछिन्द्र १३ औं र १ अंक जोडेको एनआरटी अन्तिम स्थानमा रहेका छन् ।
