विराट गोल्डकपको पुरस्कार राशीमा वृद्धि गरिने

काठमाडौं । प्रदेश नम्बर-१ को राजधानी विराटनगरमा आयोजना हुने विराट गोल्डकप फुटबल प्रतियोगिताको पुरस्कार राशीमा वृद्धि गरिने भएको छ ।

विराट गोल्डकपका कार्यकारी निर्देशक सुवाशीस कोइरालाले यस सिजनको विजेताले पाउने पुरस्कारको राशी वृद्धि गर्ने तयारी गरिएको जानकारी दिए ।

 ‘विराट गोल्डकपलाई अझ स्तरीय बनाउने तयारीका साथ पुरस्कारको राशी पनि बढाउने सोँच बनाएका छौं,’ उनले भने ।

गत संस्करणको उपाधि विजेता एपीएफले नगद १५ लाख १५ हजार प्राप्त गरेको थियो । यसैगरी उपविजेता हुने टिमले ७ लाख ५१ हजार प्राप्त गरेको थियो ।

यस पटक कम्तिमा विगतको तुलनामा ४–५ लाख पुरस्कार राशी वृद्धि हुनेछ । यसैगरी उपविजेता हुने टिमले पनि कम्तिमा ३ लाख बढी पुरस्कार पाउने छ ।

पुरस्कार राशीबारे चाँडै पत्रकार सम्मेलन गरेर सार्वजनिक गर्ने पनि कोइरालाले बताए ।

यसैगरी प्रत्येक खेलको विजेता टिमले नगद २५ हजार प्राप्त गर्ने पनि बताइएको छ ।

यस्तै, उत्कृष्ट प्रशिक्षक, उत्कृष्ट गोलकिपर, उत्कृष्ट मिडफिल्डर, उत्कृष्ट डिफेन्डर, उत्कृष्ट फरवार्ड, सर्वाधिक गोलकर्ता खेलाडी र फेयर प्ले टिमलाई पनि नगद पुरस्कारको व्यवस्था गरिएको छ ।

विराट गोल्डकप चैत ९ गतेदेखि १७ गतेसम्म विराटनगरको शहीद रंगशालामा हुँदै छ । खेलहरु रातिको  समयमा फलर्ड लाइटमा सञ्चालन हुने छन् । ८ टिमले सहभागिता जनाउने प्रतियोगितामा ७ खेलबाट उपाधिको छिनोफानो हुने छ ।