भारतलाई हराउने तयारी छ - मुख्य प्रशिक्षक थापा

काठमाडौं । नेपाली राष्ट्रिय महिला फुटबल टिमका मुख्य प्रशिक्षक अनन्त राज थापाले भारतसँगको मैत्रीपूर्ण खेलका लागि तयारी राम्रो भएको बताएका छन् ।

दुई मैत्रीपूर्ण खेलका लागि भारत जानुअघि अखिल नेपाल फुटबल संघ (एन्फा) ले आयोजना गरेको बिदाइ कार्यक्रममा  बोल्दै थापाले घरेलु टोलीसँगको खेलका लागि तयारी राम्रो भएको बताएका हुन् ।

'समग्रमा हाम्रो तयारी राम्रो भएको छ ।एन्फा कम्प्लेक्समा विगत दुई साता देखि हामी नियमित ट्रेनिङमा थियौ । पहिलो चरणको बन्द सूची आएसँगै हामी क्लोज क्याम्पमा बसेका थियौं । टिममा एउटा कम्मिनेशन राम्रो भएको छ ,' थापाले भने 'नेशनल टिमका ३ जना बहिनीहरुले अस्ती भर्खर अन्डर २० मा मेडल जितेर आएको छ त्यसले पनि टिमको मोटिभेसन राम्रो भएको छ ।' 

भारत चै दक्षिण एसिया कै बलियो टोली रहेको र उसलाई हराउने आफुहरुको मुख्य लक्ष्य रहेको थापाले बताए । 

'समग्रमा भारत दक्षिण एसियाको एक सशक्त टोली हो । नेपालले पछिल्लो साफ च्याम्पियनसिपमा राम्रो प्रदर्शन गरेर हरायो त्यो सर्रानिए कुरा हो । एउटा च्यालेन्ज त छ तर हाम्रो पनि तयारी राम्रो रहेकोले राम्रो नतिजा ल्याउने छौ ,' उनले भने 'अस्तीको साफका खेलहरु पनि मैले नजिकबाट हेरेका कारण अहिले मलाई धेरै सहयोग मिलेको छ । अभ्यास कम भए पनि साफका खेलहरु मैले नजिकबाट हेरेकोले मलाई धेरै सहयोग मिल्यो ।' 

पहिलो पटक राष्ट्रिय फुटबल टोलीको मुख्य प्रशिक्षक बनेका थापाले नेपाली महिला फुटबल टोलीले आधुनिक फुटबल खेल्ने शैलीमा आफुहरुले देखाउने बताए । यो मैत्रीपूर्ण खेलले ओलम्पिक छनोट खेलमा सहयोग पुर्याउने थापाले बताए।

एन्फाले भारतसँग मैत्रीपूर्ण खेल खेल्ने नेपाली टोलीलाई आइतबार एन्फा कम्प्लेक्समा बिदाइ गरेको हो । नेपाली टोलीले भारतसँग चेन्नईमा फेब्रुअरी १५ र १८ मा मैत्रीपूर्ण खेल खेल्नेछ ।

नेपाली टोली सोमबार चेन्नई प्रस्थान गर्ने छन् ।

नेपाली टोली -

गोलकिपरः एन्जिला तुम्बापो सुब्बा, अञ्जना राना मगर, उषा नाथ
डिफेन्डरः हिरा कुमारी भुजेल, घिमकुमारी गुरुङ, अमृता जैशी, गीता राना, निशा थोकर, विमला विक, समीक्षा घिमिरे
मिडफिल्डरः विमला चौधरी, सविता राना मगर, सरु लिम्बु, दीपा शाही, रेणुका नगरकोटी,  अनिता बस्नेत, प्रिती राई, अनिता केसी
फरवार्डः अमिषा कार्की, रेखा पौडेल, सावित्रा भण्डारी, रश्मी कुमारी घिसिङ,  निर्मला विक