बराबरीमा रोकियो आर्सनल

काठमाडौं । इंग्लिस प्रिमियर लिग फुटबलमा शीर्ष स्थानको आर्सनल बराबरीमा रोकिएको छ ।

शनिबार राति भएको खेलमा आर्सनलले ब्रेन्टफोर्डसँग १-१ गोलको बराबरी खेलेको हो ।

घरेलु मैदानमा सुरुआती अग्रता जोगाउन नसक्दा आर्सनल बराबरीमा रोकिएको हो ।

खेलको ६६ औं मिनेटमा लिन्द्रो ट्रोसार्डले गोल गर्दै आर्सनललाई सुरुआती अग्रता दिलाएका थिए ।

आर्सनलका लागि उनको यो पहिलो गोल हो ।

तर, खेलको ७४ औं मिनेटमा इभान टोनीले गोल गर्दै ब्रेन्टफोर्डलाई १-१ गोलको बराबरीमा ल्याए ।

यस बराबरीसँगै आर्सनलले २१ खेलमा ५१ अंक जोडेको छ ।

आर्सनल शीर्ष स्थानमा यथावत रहेको छ ।

ब्रेन्टफोर्ड ३४ अंक जोडेर आठौं स्थानमा रहेको छ ।

अर्को खेलमा फुलहमले नटिङघम फरेस्टलाई २-० ले हराएको छ ।

उल्भ्सले साउथह्याम्पटनलाई २-१ ले हराएको छ ।

ब्राइटन र क्रिस्टल प्यालेसबीच १-१ गोलको बराबरी भएको छ ।