एपीएफलाई हराउँदै न्यु डायमण्ड च्याम्पियन

काठमाडौं । न्यु डायमण्ड स्पोर्ट्स क्लबले छैटौं संस्करणको राष्ट्रिय महिला भलिबल प्रतियोगिताको उपाधि जितेको छ ।

त्रिपुरेश्वरस्थित राखेप कभर्डहलमा मंगलबार भएको फाइनलमा साविक विजेता एपीएफ क्लबलाई ३-२ को सेटमा हराउँदै न्यु डायमण्ड च्याम्पियन बनेको हो ।

पहिलो पटक च्याम्पियन बन्ने क्रममा न्यु डायमण्डले पहिलो सेट २८-२६ ले जितेको थियो। 

दोस्रो सेटमा एपीएफ २५-१९ ले विजयी हुँदा तेस्रो सेट न्यु डायमण्डले २५-२२ ले जित्यो । चौंथो सेट एपीएफले २६-२४ ले जितेपछि खेल पाँचौं सेटमा पुगेको थियो । पाँचौं सेट १५-९ ले जित्दै न्यु डायमण्ड च्याम्पियन बनेको हो ।

यससँगै न्यु डायमण्ड अपराजित रहदै च्याम्पियन बनेको हो । यस अघि लिग चरणमा समेत न्यु डायमण्डले एपीएफलाई हराएको थियो।

उपाधिसँगै न्यु डायमण्डले ३  लाख रुपैयाँ पुरस्कार प्राप्त गरेको छ । यस्तै उपविजेता एपीएफले १ लाख ५० हजार प्राप्त गर्दा तेस्रो बनेको पुलिसले ७५ हजार रुपैयाँ प्राप्त गरेका छन् ।

मंगलबार नै भएको खेलमा त्रिभुवन आर्मी क्लबलाई ३-० को सेटमा हराउँदै नेपाल पुलिस क्लबले तेस्रो स्थान हासिल गरेको हो ।

शेरबहादुर खड्का स्मृति प्रतिष्ठानको आयोजनामा भएको प्रतियोगितामा ४ टोलीको सहभागिता रहेको थियो ।