आर्मीलाई हराउँदै पुलिस तेस्रो 

काठमाडौं । विभागीय टोली नेपाल पुलिस क्लबले छैटौं संस्करणको शेरबहादुर खड्का स्मृति राष्ट्रिय महिला भलिबल प्रतियोगितामा तेस्रो स्थान हात पारेको छ ।   

त्रिपुरेश्वरस्थित राखेप कभर्डहलमा मंगलबार तेस्रो स्थानका लागि भएको खेलमा पुलिसले अर्को विभागीय टोली त्रिभुवन आर्मी क्लबलाई ३-० को सोझो सेटमा हराएको हो ।

आर्मीलाई २५-२१,२५-२१ र २५-१९ ले हराउँदै पुलिसले तेस्रो स्थान हासिल गरेको हो । तेस्रो स्थान हासिल गरेको पुलिसले ७५ हजार नगद पाएको छ ।

राउण्ड रोबिन लिगको अन्तिम खेलमा पुलिसले सोमबार आर्मीविरुद्ध ३-१ को सेटमा जित हात पारेको थियो ।

आज नै प्रतियोगिताको उपाधिका लागि साविक विजेता एपीएफ र न्यु डायमण्ड स्पोर्ट्स क्लबबीच प्रतिस्पर्धा हुनेछ ।

शेरबहादुर खड्का स्मृति प्रतिष्ठानको आयोजनामा जारी प्रतियोगितामा ४ टोलीको सहभागिता रहेको छ । 

प्रतियोगिताका विजेता टोलीले नगद तीन लाख र उपविजेताले एक लाख ५० हजार रुपैयाँ पुरस्कार पाउने छन् । 

प्रतियोगिताका सर्वोत्कृष्ट खेलाडीलाई नगद ५० हजारसँगै अन्य आकर्षक पुरस्कार प्रदान गरिने प्रतिष्ठानका अध्यक्ष रञ्जन खड्काले जानकारी दिए ।

यस्तै विधागततर्फका उत्कृष्ट हुनेलाई जनही १५ हजार र एक उदयमान खेलाडीलाई नगद १५ हजारसहित इमर्जिङ प्लेयर अवार्ड प्रदान गरिनेछ ।