न्यु डायमण्ड अपराजित रहदै फाइनलमा
काठमाडौं । न्यु डायमण्ड स्पोर्ट्स क्लब अपराजित रहदै छैटौं संस्करणको राष्ट्रिय महिला भलिबल प्रतियोगिताको फाइनलमा प्रवेश गरेको छ ।
त्रिपुरेश्वरस्थित राखेप कभर्डहलमा सोमबार एपीएफ क्लबलाई ३-१ को सेटमा हराएर डायमण्डले अपराजित रहदै फाइनलमा स्थान बनाएको हो ।
एपीएफमाथि न्यु डायमण्डले २५-२१, २५-१९,२१-२५ र २५-२१ ले हराएको हो ।
यस जितसँगै न्यु डायमण्डले ३ खेलमा ९ अंक जोड्यो । र, शीर्ष स्थानमा रहदै फाइनलमा प्रवेश गरेको छ ।
एपीएफ पनि दोस्रो स्थानमा रहेर फाइनल पुगेको छ । एपीएफले ३ खेलमा ६ अंक जोड्यो ।
त्रिभुवन आर्मी क्लब र नेपाल पुलिस क्लबले तेस्रो स्थानको लागि खेल्नेछ ।
प्रतियोगिताको फाइनल र तेस्रो स्थानको लागि खेल मंगलबार हुनेछ ।
शेरबहादुर खड्का स्मृति प्रतिष्ठानको आयोजनामा जारी प्रतियोगितामा ४ टोलीको सहभागिता रहेको छ ।
प्रतियोगिताका विजेता टोलीले नगद तीन लाख रुपैयाँ पुरस्कार पाउने छन् । यस्तै उपविजेताले एक लाख ५० हजार र तेस्रो हुने टोलीले ७५ हजार रुपैयाँ नगद पुरस्कार प्राप्त गर्ने छन् ।
प्रतियोगिताका सर्वोत्कृष्ट खेलाडीलाई नगद ५० हजारसँगै अन्य आकर्षक पुरस्कार प्रदान गरिने प्रतिष्ठानका अध्यक्ष रञ्जन खड्काले जानकारी दिए ।
यस्तै विधागततर्फका उत्कृष्ट हुनेलाई जनही १५ हजार र हरेक खेलको प्लेयर अफ दी म्याचलाई १० हजार रुपैयाँ नगद पुरस्कार प्रदान गरिने भएको छ । एक उदयमान खेलाडीलाई नगद १५ हजारसहित इमर्जिङ प्लेयर अवार्ड प्रदान गरिनेछ ।
