न्यु डायमण्ड फाइनलमा

काठमाडौं ।  न्यु डायमण्ड स्पोर्ट्स क्लबले छैटौं संस्करणको राष्ट्रिय महिला भलिबल प्रतियोगितामा लगातार दोस्रो जित निकालेको छ ।

त्रिपुरेश्वरस्थित राखेप कभर्डहलमा आइतबार नेपाल पुलिस क्लबलाई ३-१ को सेटमा हराएर डायमण्डले लगातार दोस्रो जित निकालेको हो ।

लगातार दोस्रो जितसँगै डायमण्ड फाइनलमा प्रवेश गरेको छ ।

पहिलो सेट १५-२२ ले गुमाएको डायमण्डले त्यसपछि सेटमा लगातार जित निकाल्यो । डायमण्डले दोस्रो सेट २५-१५, तेस्रो सेट २५-२२ र चौंथो सेट २५-१९ ले जित्दै खेल आफ्नो पक्षमा पारेको हो ।

यस जितसँगै डायमण्डले २ खेलमा ६ अंक जोडेको छ । पुलिसको यो लगातार दोस्रो हार हो ।

पहिलो खेलमा  डायमण्डले त्रिभुवन आर्मी क्लबलाई ३-० को सोझो सेटमा हराएको थियो ।  पुलिस एपीएफसँग पराजित भएको थियो ।

शेरबहादुर खड्का स्मृति प्रतिष्ठानको आयोजनामा जारी प्रतियोगितामा ४ टोलीको सहभागिता रहेको छ । लिगकम नकआउटका आधारमा हुने प्रतियोगिताको शीर्ष टोलीले उपाधिका लागि खेल्नेछ ।

प्रतियोगिताका विजेता टोलीले नगद तीन लाख रुपैयाँ पुरस्कार पाउने छन् । यस्तै उपविजेताले एक लाख ५० हजार र तेस्रो हुने टोलीले ७५ हजार रुपैयाँ नगद पुरस्कार प्राप्त गर्ने छन् ।

प्रतियोगिताका सर्वोत्कृष्ट खेलाडीलाई नगद ५० हजारसँगै अन्य आकर्षक पुरस्कार प्रदान गरिने प्रतिष्ठानका अध्यक्ष रञ्जन खड्काले जानकारी दिए ।

यस्तै विधागततर्फका उत्कृष्ट हुनेलाई जनही १५ हजार र हरेक खेलको प्लेयर अफ दी म्याचलाई १० हजार रुपैयाँ नगद पुरस्कार प्रदान गरिने भएको छ । एक उदयमान खेलाडीलाई नगद १५ हजारसहित इमर्जिङ प्लेयर अवार्ड प्रदान गरिनेछ ।