फलेवासलाई गण्डकी प्रदेशस्तरीय भलिबलको उपाधि

पोखरा ।  सातौं पर्वत महोत्सव अन्तर्गत गण्डकी प्रदेशका स्थानीय तहस्तरमा आयोजना गरिएको भलिबल प्रतियोगिताको उपाधि पर्वतको फलेवास नगरपालिकाले जितेको छ ।

शनिबार भएको फाइनल खेलमा पर्वतकै महाशिला गाउँपालिकाविरुद्ध ३-२ को सेटमा जित निकाल्दै फलेवास नगरपालिकाले उपाधि जितेको हो । पहिलो सेटमा फलेवासले २५–१९ को अन्तरमा जित हात पारेको थियो । दोस्रो सेटमा भने महाशिला लयमा फर्किँदै २७–२५ को अन्तरमा फलेवासलाई पराजित गर्न सफल भयो । खेलको तेस्रो सेट पनि महाशिलाकै पक्षमा रह्यो । तेस्रो सेटमा महाशिलाले २७–२५ को अन्तरमा फलेवासलाई पराजित गर्न सफल भयो ।

चौथो सेटमा भने अघिल्ला दुई सेटको नतिजा उल्ट्याउँदै फलेवासले महाशिलालाई पराजित गर्यो  । फलेवासले २७–२५ को अन्तरमा महाशिलालाई पराजित गरेको हो । दुवै समूहको दुई–दुई सेटको बराबरी कायम रहेको अवस्थामा खेल पाँचौ सेटमा पुग्यो । पाँचौ  सेटमा फलेवासले महाशिलालाई १५–१२ ले हराएर उपाधि जितेको हो ।

खेलमा एउटा सहभागी हुने समूहले बढीमा दुई जनासम्म राष्ट्रिय खेलाडी समावेश गर्न पाउने नियम राखिएको थियो । यो नियमानुसार फलेवास नगरपालिकाले नेपाल पुलिस क्लबका दुई खेलाडी रविनचन्द ठकुरी र सफल विकलाई लिएर खेलेको थियो भने महाशिला गाउँपालिकाले सशस्त्र प्रहरीको एपीएफ क्लबका दुई खेलाडी विजय थापा र टेकराज अवस्थीलाई लिएको थियो ।

प्रतियोगितामा उपाधिसँगै फलेवासले २ लाख नगदसहिद मेडल र प्रमाणपत्र प्राप्त गर्यो । दोस्रो भएको महाशिलाले १ लाख नगदसहित मेडल र प्रमाणपत्र पाएको छ । सान्त्वना स्थानमा आउने दुई समूहलाई नगद रु ३०–३० हजारसहित मेडल र प्रमाणपत्र प्रदान गरिएको थियो ।