काठमाडौं । नेपाली राष्ट्रिय टोलीका पुर्व कप्तान तथा यू–१९राष्ट्रिय क्रिकेट टोलीका प्रशिक्षक विनोद दास धनगढी प्रिमियर लिग (डीपीएल) टी-ट्वान्टी क्रिकेटको प्रतियोगिता निर्देशक बनेका छन् ।
आयोजक धनगढी क्रिकेट एकेडमीले मंगलबार प्रेस विज्ञप्ति निकाल्दै प्रशिक्षक दासलाई प्रतियोगिता निर्देशक नियुक्त गरेको जनाएको छ । आयोजकले दासको नियुक्तिले प्रतियोगिताले थप उचाई लिने विश्वास गरेको छ ।
'नेपाली क्रिकेटमा उहाँले हासिल गर्नुभएको अनुभवले तथा उहाँको निर्देशनमा प्रतियोगिताले थप उचाई लिने विश्वास लिएका छौ,' धनगढी क्रिकेट एकेडमीले निकालेको विज्ञप्तिमा भनिएको छ ।
तेस्रो संकरणको धनगढी प्रिमियर लिग (डीपीएल) टी-ट्वान्टी क्रिकेट माघको तेस्रो साताबाट सुरु हुनेछ । प्रतियोगिता माघ १९ देखी फागुन ४ गतेसम्म आयोजना हुँदैछ ।
यस संस्करणको प्रतियोगितामा ६ फ्रेन्चाईज टोलीले सहभागिता जनाउने छन् । सहभागि टिममा चौराहा धनगढी, सीवाईसी अत्तरीया, रुपन्देही च्यालेन्जर्स, महेन्द्रनगर युनाईटेड, काठमाडौं गोल्डेन र बिराटनगर किंग्स रहेका छन् ।
सहभागी ६ टोलीमा १५—१५ खेलाडी हुनेछन् । जुन अक्सनबाट छनोट गरिनेछ । त्यसमा दुई विदेशी र धनगढीमा हुने ट्यालेन्ट हन्टबाट आएका सुदूरपश्चिमका एक खेलाडी प्रत्येक टिममा अनिवार्य समावेश गर्नुपर्ने प्रावधान रहेको छ ।
प्रतियोगितामा कुल १९ खेल हुनेछ । लिग चरणमा प्रत्येक टिमले अन्य टिमसंग एक–एक खेल खेल्ने छन् । शीर्ष चार टोली प्ले–अफमा पुग्नेछन् । त्यसमा पहिलो र दोस्रो हुने टिमको विजेता फाइनल पुग्नेछ । त्यसमा पराजित हुने टोलीले तेस्रो र चौथो हुने टिमसंगको विजेतासंग फाइनल प्रवेशको लागि खेल्नेछ ।
