काठमाडौं । पूर्व अध्यक्ष गणेश थापाले छोरा गौरवलाई जसरी पनि एन्फामा व्यवस्थापन गर्न खोजेपछि फुटबल संघभित्रको राजनीति ‘पेचिलो’ बनेको छ । भ्रष्टचारको मुद्धामा प्रतिबन्धमा रहेका थापाले छोरा गौरवलाई एन्फामा जसरी पनि व्यवस्थापन गर्ने ‘अड्डी’ कसेपछि सोही समुहबाट चुनाव जितेका अध्यक्ष पंकजबिक्रम नेम्वाङ फुटबल संघ चलाउन नसक्ने अवस्थामा पुगेका छन् । उनै गौरवको बैंक खातामा एएफसीका तत्कालिन अध्यक्ष बिम हमामबाट पैसा आएको देखिएपछि फिफाले थापालाई भ्रष्टचारका मुद्धामा प्रतिबन्धको निर्णय गरेको थियो । उनै गौरवलाई एन्फामा व्यवस्थापन गर्नुपर्ने थापा र उनी पक्षिय एन्फा कार्यसमिति सदस्यको माग छ । गौरवलाई ल्याउँदा अन्तराष्ट्रिय रुपमा एन्फालाई समस्या पर्ने र फुटबल संघमा थापाको प्रभाव बढ्ने भएकाले नेम्वाङ सो निर्णय गराउन मानिरहेका छैनन् ।
एजेण्डा र सुचना सहित बोलाएको पहिलो बैठक अध्यक्ष नेम्वाङले दुई पटक स्थगित गरेर टारेका छन् । बिना सुचना राखेको पहिलो बैठकमा महासचिवमा किरण राई, कोषाध्यक्षमा रबिन्द्र जोशी र अन्तराष्ट्रिय सम्बन्ध विभाग प्रमुखमा नविन पाँडेलाई नियुक्त गरेर अध्यक्ष नेम्वाङले दुवै पक्ष (गणेश थापा र कर्माछिरिङ शेर्पा)लाई छल्न सफल भएका थिए । तर एजेण्डा सहित दोस्रो बैठक उनले राख्न सकेका छैनन् । साउन २ गते रक्तचाप बढेको भन्दै नेम्वाङले बैठक स्थगित गराए । स्थगित बैठक बिहीबार बिहानलाई राखिएको थियो । बैठक चल्दै गर्दा विवाद बढेपछि नेम्वाङले बैठक छाडेर हिडेका छन् । बैठक स्थगित अवस्थामा छ । नयाँ सुचना जारी गरिएको छैन ।
बिहीबार बिहानै ७ बजे बैठक राखिएको थियो । केही घण्टा ढिला गरि बैठक सुरु भयो । बैठकको पहिलो एजेण्डा रहेको महिला साफको विषयमा छलफल चल्दै थियो । उपस्थितीमा हस्ताक्षर गर्ने विषयमा विवाद देखियो । कर्मा छिरिङ शेर्पा प्यानलबाट चुनाव जितेका सदस्यले माइन्युटको उपस्थितीमा हस्ताक्षर गरे । गणेश थापा निकटका सदस्यले हस्ताक्षर गर्न मानेनन् । आफ्ना एजेण्डामा छलफल नहुने अवस्था देखेपछि थापा पक्षका सदस्यले हस्ताक्षर गर्न आनाकानी गरिरहेका थिए । नविन पाँडेलाई नियुक्ति गर्ने अघिल्लो बैठकको निर्णय सच्चाउन माग गर्दै थापा पक्षका सदस्यले छलफल अघि बढाए । एन्फा बाहिर पाँडेलाई हटाउन माग गर्दै हस्ताक्षर अभियाननै सुरु भैसकेको थियो । त्यसैमा विवाद सुरु भयो । अध्यक्ष नेम्वाङ बैठक छाडेर निस्किए ।
गणेश थापाको सहयोगमा चुनाव जितेर एन्फा पुगेका अध्यक्ष नेम्वाङ फुटबल संघ चलाउन नसक्ने अवस्थामा पुगेका छन् । न उनले थापालाई साथमा लिएर अघि बढ्न सकेका छन्, न त थापाको स्वार्थ पुरा गर्न तयार छन् । यिनै अन्यौलतामा फसेका नेम्वाङले फुटबल संघलाई ‘पेन्डुलम’ अवस्थामा राखेका छन् । एन्फाको कार्यसमितिमा नेम्वाङसँग उपाध्यक्ष दावा लामा मात्र छन् । आफ्नो समुहमात्र हैन, कार्यसमितिमै बहुमत गुमाएका नेम्वाङको नेतृत्व क्षमता परिक्षण नहुँदै संकटमा परेको छ । नविन पाँडेलाई नियुक्ति गर्ने नेम्वाङको निर्णयमा उनकै समुहका अधिकांश कार्यसमिति सदस्य विपक्षमा उभिएका छन् । त्यसमा शेर्पा प्यानलबाट चुनाव जितेका भरतबुढ थापा र टीका लामाको समेत हस्ताक्षर छ । नेम्वाङ प्यानलबाट चुनाव जितेका वरिष्ठ उपाध्यक्ष विरबहादुर खड्का, उपाध्यक्ष दिपक खतिवडा, सदस्य महेन्द्र क्षेत्री, विकास नारायण श्रेष्ठ, पुरुषोत्तम थापा, भोजराज शाही, रबिन्द्र चन्द, अनिल मल्ल, सरिला श्रेष्ठनै पाँडेलाई बर्खास्त गर्न र गणेश थापाका छोरा गौरवलाई प्रमुख कार्यकारी अधिकृत (सिईयो) वा सहायक महासचिवमा नियुक्त गर्न सहमत छन् ।
आफ्नै समुहबाट विश्वास गुमाएका नेम्वाङले एन्फा अब कसरी चलाउछन् चासोको विषय बनेको छ । विपक्षमा रहेका शेर्पा समुह तत्काल नेम्वाङसँग सहकार्य गर्ने ‘मुड’मा छैन । शेर्पाकै समर्थन पाएपनि तत्काल नेम्वाङको बहुमत पुग्ने अवस्था देखिदैन । एन्फाभित्रको शक्ति संघर्षले अध्यक्ष नेम्वाङको रक्तचाप मात्र बढेको छैन, फुटबलको विवादपनि उत्कर्षमा पुर्याएको छ ।
