एजेन्सी । क्लब फुटबलकै सर्वाधिक प्रतिष्ठित प्रतियोगिता हो -च्याम्पियन्स लिग । युरोपियन राष्ट्रका लिग च्याम्पियन क्लबहरुले खेल्ने च्याम्पियन्स लिग हरेक सिजन रोमान्चक हुने गर्छ ।
च्याम्पियन्स लिगमा यस सिजन पनि रोमान्चक खेलहरु जारी छ । र, खेलाडी तथा क्लबहरु आफुलाई प्रमाणित गर्न लागिपरेका छन् ।
च्याम्पियन्स लिगमा उपाधि पछि खेलाडीहरुबीच एक गज्जबको प्रतिस्पर्धा हुने गर्छ । त्यो हो – गोल्डेन बुट ।
च्याम्पियन्स लिगमा गोल्डेन बुट सर्वाधिक गोल गर्ने खेलाडीले पाउने गर्दछ । त्यसैले क्लबका स्ट्राइकरहरु आफ्नो जादुमय खेल र गोल गर्नमा लागि परिसकेका छन् ।
यस सिजन च्याम्पियन्स लिगको पहिलो खेलबाटै गोल्डेन बुटको दौड सुरु भईसकेको छ । कतिपय स्ट्राइकरहरुले क्लबका गोल समेत गरिसकेका छन् ।
गत सिजन इटालियन क्लब युभेन्ट्सका स्टार स्ट्राइकर क्रिष्टियानो रोनाल्डोले गोल्डेन बुट जितेका थिए । स्पेनिस क्लब रियल मड्रिडमा रहदा रोनाल्डोले १५ गोल गर्दै गोल्डेन बुट आफ्नो पोल्टामा पारेका थिए ।
रोनाल्डोले पछिल्लो ६ सिजन च्याम्पियन्स लिगको गोल्डेन बुटमा आफ्नो अधिपत्य कायम राखिरहेका छन् । यस सिजन पनि रोनाल्डोलाई गोल्डेन बुटको दाबेदार मानिएको छ ।
तर, यस सिजन रोनाल्डोले चार खेल सकिदा मात्र दुई गोल गर्न सफल छन् । अघिल्ला सिजन जस्तो रोनाल्डोले आफ्नो जादुमय खेल पस्कन सकेका छैनन् ।
त्यसैले यस सिजन रोनाल्डोलाई पछि पार्दै गोल्डेन बुट जित्ने खेलाडीहरुको चर्चा सुरु भईसकेको छ । विभिन्न अन्तर्राष्ट्रिय खेल समचार संस्थाहरुले रोनाल्डोलाई पछि पार्दै गोल्डेन बुट जित्ने पाँच सम्भावित खेलाडीको सुची तयार गरिसकेको छ ।
यस सिजन रोनाल्डोलाई स्तब्ध पार्दै गोल्डेन बुट जित्ने सम्भावित पाँच खेलाडीहरु कस्ता छन् ? किन उनीहरुले गोल्डेन बुट जित्न सक्छन ?
हेर्नुहोस् - गोल्डेन बुट जित्न सक्ने सम्भावित पाँच खेलाडीको नालीबेली ।
५. नेयमार
फ्रेन्च क्लब पेरिस सेन्ट जर्मेन (पिएसजी) का नेयमार प्रतिभाशाली स्ट्राइकर हुन् । र, यस सिजनको च्याम्पियन्स लिगमा रोनाल्डोलाई पछि पार्दै गोल्डेन बुट जित्ने सम्भावित खेलाडी हुन् ।
ब्राजिलियन स्ट्राइकर नेयमारले यस सिजन जादुमय खेल प्रदर्शन गरिरहेका छन् । बिपक्षिको गोल पोष्टमा नेयमार सधै हाबी हुने गर्छन् । प्राबिधिक पक्ष र स्किलमा नेयमार माहिर मानिन्छन् ।
यस सिजनको चार खेल सकिदा नेयमारले तीन गोल गर्दै गोल्डेन बुटको दाबेदार रहेको प्रमाणित गरिसकेका छन् । उको प्रदर्शन हेर्दा उनले अझै धेरै गोल गर्ने सम्भावना रहेको छ । नेयमारले आफ्नो जादुमय प्रदर्शन र गोललाई निरन्तरता दिए गोल्डेन बुट जित्न सक्ने छन् ।
४. पाउलो डिबाला
यस सिजन लुका मोड्रिच, केलियन एमबाप्पे, एन्टोनी ग्रिजम्यान र मोहमद सलाहले उत्कृष्ट प्रदर्शन गरिरहेका छन् । त्यसैले उनीहरुले विश्वकै उत्कृष्ट खेलाडी लियोनल मेस्सी, क्रिष्टियानो रोनाल्डोलाई पछाडी पारिसकेका छन् ।
यस्तोमा अर्जेन्टिनाका डिबालालाई पनि गोल्डेन बुटको मुख्य दाबेदार मानिएको छ । उनले आफ्नै टोलीका फरवार्ड रोनाल्डोलाई पछि पार्न सक्ने सम्भावना रहेको छ ।
डिबालाले यस सिजन च्याम्पियन्स लिगमा उत्कृष्ट प्रदर्शन गरिरहेका छन् । उनले युभेन्ट्सका लागि २५८ मिनेट खेल्दै चार गोल गरिसकेका छन् ।
डिबाला र रोनाल्डो हाल एकै क्लबमा रहेका छन् । यदि डिबालाले रोनाल्डोलाई पछि पार्दै गोल्डेन बुट जितेमा च्याम्पियन्स लिगको रौनकता थप रोमान्चक बन्नेछ ।
३. रोबर्टो लेवान्डोस्की
जर्मन बुन्डेस लिगा च्याम्पियन वायर्न म्युनिखले च्याम्पियन्स लिगमा उत्कृष्ट प्रदर्शन गर्न सकिरहेको छैन् । वायर्नले आफ्नो क्षमता अनुसारको खेल पस्कन सकेको छैन् ।
तर, वायर्न तथा पोल्याण्डका स्ट्राइकर लेवान्डोस्कीले हार मानेका छैनन् । उनले च्याम्पियन्स लिगमा गोल गर्दे आफुलाई प्रमाणित गरिरहेका छन् । उनको प्रदर्शनले नै वायर्नले समूह 'ई' बाट दोस्रो चरणमा पुग्ने सम्भावनालाई कायम राखेको छ ।
बोरुसिया डर्टमण्डका पुर्व खेलाडी लेवान्डोस्कीले यस सिजन चार खेल खेल्दै ४ गोल गरिसकेका छन् । त्यसैले यस सिजन उनलाई गोल्डेन बुटको दाबेदारको रुपमा हेरिएको छ । उनले रोनाल्डोलाई पछि पार्दै गोल्डेन बुट जित्ने सम्भावना रहेको छ ।
२. इडेन डेज्को
इटालियन क्लब रोमाका स्ट्राइकर डेज्को च्याम्पियन्स लिगमा यस सिजन गोल्डेन बुटका दाबेदार खेलाडी हुन् । किनकी उनले सिजनको सुरुवातबाटै उत्कृष्ट प्रदर्शन गरिरहेका छन् ।
गत सिजन रोमालाई सेमिफाइनलको यात्रा तय गराउन डेज्कोले १२ खेलमा ८ गोल गरेका थिए । यस सिजन पनि उनले आफ्नो गोल गर्ने कलालाई निरन्तरता दिएका छन् ।
डेज्कोले यस सिजन ४ खेलमा ५ गोल गरिसकेका छन् । त्यसैले उनले यस सिजन रोनाल्डोलाई पछि पार्दै गोल्डेन बुट जित्ने सम्भावना रहेको बताईन्छ । तर, उनले पछिल्ला खेलमा कस्तो प्रदर्शन गर्छन त्यो हेर्न भने बाँकी छ ।
१. लियोनल मेस्सी
अर्जेन्टिनाका मेस्सी च्याम्पियन्स लिगमा गोल्डेन बुटको उपाधिमा रोनाल्डोको अधिपत्य तोड्न सक्ने एक्लो खेलाडी हुन् ।
च्याम्पियन्स लिगको गोल्डेन बुटमा अधिपत्य जमाउनेमा रोनाल्डोपछिको खेलाडी मेस्सी नै पर्छन । मेस्सीले सन् २००९ देखि २०१२ सम्म लगातार चार पटक गोल्डेन बुट जितेका थिए । पछिल्लो ६ बर्ष यता भने रोनाल्डोले एकलौटी राज गरिरहेका छन् ।
मेस्सी र रोनाल्डो अहिलेको पुस्ताकै महान खेलाडी मानिन्छ । दुई खेलाडीबीच को उत्कृष्टको होड बाजी नै चल्ने गर्छन् । त्यसैले रोनाल्डो र मेस्सीले च्याम्पियन्स लिगको सर्वाधिक गोलकर्ताको सूचीमा आफ्नो नाम स्थापित गर्न सफल भईसकेका छन् ।
यस सिजन रोनाल्डोको जादु चलेको छैन । तर, बार्सिलोनाका कप्तान समेत रहेका मेस्सीले यस सिजन गोल्डेन बुटको दाबेदारी प्रस्तुत गरिसकेका छन् ।
मेस्सीले यस सिजन मात्र दुई खेल खेल्दै पाँच गोल गरिसकेका छन् । हातमा लागेको चोटका कारण मेस्सीले पछिल्ला दुई खेल भने खेल्न पाएका थिएनन् ।
हाल मेस्सी खेलमा फर्किसकेका छन् र बार्सिलोनाका लागि गोल समेत गरिसकेका छन् । त्यसैले यस सिजनको गोल्डेन बुटका मुख्य दाबेदार मेस्सी नै मानिएको छ । मेस्सीले नै रोनाल्डोको पछिल्लो ६ बर्षको अधिपत्य तोड्ने विश्वास गरिएको छ ।
-एजेन्सीको सहयोगमा
