च्याम्पियन्स लिगमा बार्सिलोनाको स्थान सुरक्षित

काठमाडौं । स्पेनिस क्लब बार्सिलोनाले आगामी सिजनको च्याम्पियन्स लिग फुटबलमा आफ्ना स्थान सुरक्षित गरेको छ।

ला लिगा अन्तर्गत शनिबार राति रियल बेटिसलाई २-१ ले हराउँदै बार्सिलोनाले लिगमा आफ्नो शीर्ष चारको स्थान पक्का गर्दै च्याम्पियन्स लिगमा स्थान बनाएको हो ।

बार्सिलोनालाई जित दिलाउन अन्सु फाती र जोर्डी अल्बाले एक एक गोल गरे ।

खेलको ७६ औं मिनेटमा फातीले गोल गर्दै बार्सिलोनालाई सुरुआती अग्रता दिलाएका थिए ।

७९ औं मिनेटमा मार्क बार्ट्राले गोल गर्दै बेटिसलाई १-१ गोलको बराबरीमा ल्याए ।  

त्यसपछि खेलको इन्जुरी समयमा अल्बाले उत्कृष्ट भली गोल गर्दै बार्सिलोनालाई २-१ को जित दिलाए ।

जितसँगै बार्सिलोनाले ३५ खेलमा ६९ अंक जोडेको छ ।

बार्सिलोना दोस्रो स्थानमा रहेको छ ।

बेटिस ५८ अंक जोडेर पाँचौं स्थानमा रहेको छ ।