एन्फा चुनाव : 'सी'मा पंकज, 'बी'मा कर्मा बलियो 

काठमाडौं । अखिल नेपाल फुटबल संघ (एन्फा)को आसन्न निर्वाचनको रौनक सुरु भएको छ । एन्फा केन्द्रिय कार्यसमितिको निर्वाचन प्रक्रिया सम्बन्धि कार्यक्रम अनुसार बी र सी डिभिजन क्लबको प्रतिनिधि छनोट चैत २५ भित्र सम्पन्न भैसक्न पर्ने हो । तर प्रतिनिधि विवादका कारण बी र सी डिभिजनको निर्वाचन प्रक्रिया अबरुद्ध बनेको छ । वर्तमान कार्यसमितिकै पदाधिकारी मताधिकार सहितका प्रतिनिधि बनेर आएपछि विवाद उत्पन्न भएको हो ।

एन्फा पदाधिकारी विधान विपरित प्रतिनिधि बनेर आएको दाबी सहित उनीहरुको प्रतिनिधित्व खारेजीको माग गर्दै पुनरावेदन समितिमा उजुरी परेपछि सो उपर छलफल भैरहेको छ । पुनरावेदन समितिको निर्णय अनुसार निर्वाचन समितिले स्थगित गरिएको प्रक्रिया अघि बढाउने बताएको छ । 

‘निर्वाचन समितिमा उजुरी परेको भए यसको समाधान तत्काल निस्कने थियो । सिधै पुनरावेदनमा उजुरी परेकाले आएको निर्णय अनुसार प्रक्रिया अघि बढ्छ ।’ निर्वाचन समितिका संयोजक श्रीराम दवाडीले खेलपाटीसँग भने । 

एन्फाको आसन्न निर्वाचनका लागि वर्तमान अध्यक्ष कर्माछिरिङ शेर्पा र वरिष्ठ उपाध्यक्ष पंकजबिक्रम नेम्वाङ्गले उम्मेदवारी दिने तयारी गरेका छन् । नेतृत्वका लागि दुवै पक्ष अहिलेदेखिनै आफ्ना पक्षका प्रतिनिधि ल्याउन कसरत गरिरहेका छन् । सी र बी डिभिजनको प्रतिनिधि छनोटको अघिल्लो रात दुवै पक्षले पक्षका क्लबलाई रिसोर्टमा राखेका थिए । दुवै पक्षको उद्धेश्य थियो, आफ्ना पक्षका प्रतिनिधि अर्को पक्षले नचोरुन् । सी र बीको प्रतिनिधि छनोटमै देखिएको रस्साकस्सीले एन्फाको आसन्न चुनाव कति पेचिलो बन्छ भनेर अनुमान लगाउन सकिन्छ । 

एन्फाको नेतृत्वमा आएदेखिनै आफ्नो पक्षमा माहोल बनाउन कर्माले सक्दो मेहनत गरेका थिए । फुटबलको निर्विकल्प नेताको रुपमा उनले आफुलाई स्थापित गर्न खोजेका थिए । तर परिवर्तनको जश र सत्ताको रसपानमा कर्माले एकलौटी गरेको आरोप लगाउँदै पंकज बिच्किएर फरक समुह बनाए । पंकज आफै बलिया हैनन् तर फुटबलको शक्ति संघर्षमा कर्मासँग सबथोक गुमाएका गणेश थापा पंकजको टेको बनेर उभिएका छन् । गणेश थापाको फुटबल सत्ता भत्काउन ‘मास्टरमाइन्ड’ कहलिएका नविन पाण्डे पंकजका पछि छन् । 

एक समय कर्मा समुह क्लबमा बलियो देखिन्थ्यो । तर प्रतिनिधि छनोटमा माहोल उल्टो देखिन्छ । सी र बीको प्रारम्भिक दृष्यमा पंकजले राम्रो पकड बनाएको देखिन्छ । सी डिभिजनमा पंकज समूह पुरै हाबी छ । सी डिभिजनको प्रतिनिधि छनोट हेर्दा अधिकांश क्लब पंकज समूहमा खुलेका छन् । सोही दृष्यबाट आत्तिएको संस्थापन पक्षले गत बिहिबारको चुनाव स्थगित गराउन भुमिका खेल्यो । सी डिभिजनमा १४ मध्य ९ वटा क्लब पंकज समूहमा खुलेर लागेपछि संस्थापन पक्षलाई ठुलो धक्का परेको छ । विगत चार वर्षदेखि सबैलाई मिलाएर राखेको दाबी गर्ने अध्यक्ष शेर्पाको अभिमत ‘बिलखबन्द’मा छ ।

अझै केही क्लबलाई सी डिभिजनबाट तान्ने प्रयास संस्थापन पक्षले जारी राखेको छ । सोमबार मात्र सी डिभिजनका ९ क्लबले लिगको तयारी खर्च र रोकिएको निर्वाचन प्रक्रिया अघि बढाउन एन्फामा निवेदन दर्ता गराए । त्यो निवेदनले सामान्य पत्रको मात्र संकेत गर्दैन, सी डिभिजनमा ९ क्लब कत्ति बलियोसँग उभिएका छन् भन्ने प्रस्ट गर्छ । चार वर्ष एन्फा चलाएर अध्यक्ष शेर्पाले सी डिभिजनका क्लबलाई आफुसँग राख्न नसकेको गुनासो संस्थापनभित्रै छ । व्यहोरा उदण्ड देखिएपनि केन्द्रिय सदस्य दावा लामाले सी डिभिजनका क्लबलाई एकताबद्ध राखेर फुटबलको सत्ता राजनीतिमा आफुलाई बलियो रुपमा उभ्याएका छन् । नेतृत्वको आकंक्षी पंकजको बलियो खम्बा यिनै लामा देखिएका छन् ।

लामा नेतृत्वको प्लानिङ्ग ब्वाइज, खालीबारी युवा, मनोहरा एकिकृत, महाविर स्टडीज, विरगञ्ज, झापा, पुल्चोक, आरसी ३२ र स्वयम्बु पंकज समूहमा खुलेर लागेका छन् । आरसी ३२ यसै सिजन सी डिभिजनमा उक्लिएको हो । राष्ट्रिय फुटबल टिमका खेलाडी रोहित चन्दको नामको क्लबको नेतृत्व उनका दाजु रबिन चन्दले गर्छन् । 

समाजकल्याण सहित रानीवन, स्पोर्टस एकेडेमी साँगा, सानेपा र ओसिसको साथ संस्थापन समूहलाई छ । यसले सी डिभिजनमा पंकज समुह बलियो भएको देखाउँछ । स्पोर्टस एकेडेमी साँगा र रानीवन यसै सिजन सी डिभिजनमा उक्लिएका हुन् । कांभ्रेली क्लब स्पोर्टस एकेडेमीको प्रतिनिधि रुपेश अधिकारी हुन् । उनी एन्फाका केन्द्रिय सदस्य पनि हुन् । फुटबलमा राजनीतिक करियर बनाउन खोजिरहेका अधिकारी सीको प्रतिनिधि छनोटमा कठिन अवस्थामा छन् ।

सीमा बलियो देखिएका पंकज समूह बी डिभिजनमा समेत असन्तुष्ट क्लबको नेतृत्व गर्दैछ । सबैभन्दा रोचक बाँसबारी क्लबमा देखियो । मधुसुदन उपाध्यायको पेलानमा परेको समूह क्लबको नेतृत्वमा आएको छ । प्रेम थापा मताधिकार सहित अध्यक्षमा चुनिएका छन्, महासचिव रमेशकुमार कार्की प्रतिनिधि चयन भएका छन् । प्रेम थापाको आगमनले बी डिभिजनको दृष्य पृथक देखिन थालेको छ ।

नयाँ बस्ती सहित विरगञ्ज, झम्सिखेल, श्री भगवती र सामाजिक युवा क्लब संस्थापनविरुद्धमा छन् । जसको नेतृत्व स्वभाविक रुपमा पंकज समूहले गर्नेछ । तर ९ बढी क्लबमा संस्थापन पक्षको होल्ड छ । जसले गर्दा बहुमत प्रतिनिधि संस्थापन निकट आउने देखिन्छ । आरसीटी सहित एन्फा उपाध्यक्ष उपेन्द्रमान सिंहको मध्यपुर युथ, टुसाल, नयाँबस्ती, महासचिव इन्द्रमान तुलाधरले प्रभाव राख्ने खुमलटार, मानार्थ उपाध्यक्ष शिक्षित पराजुली नेतृत्वको सरस्वती, श्रीकुमारी र ब्वाइज युनियनमा संस्थापन पक्षको प्रभाव देखिन्छ । 

गत बिहीबारको चुनाव स्थगित भएसँगै दुवै समूह आन्तरिक छलफलमा छन् । संस्थापन पक्ष सीका केही क्लबमा खेल्न चाहन्छ, पंकज समूह बी डिभिजनको असन्तुष्टिलाई आफु अनुकुल ढाल्न प्रयासमा छ । प्रतिनिधि छनोटसँगै चुनावी खेल सकिने छैन, अनि बल्ल सुरु हुनेछ । प्रतिनिधिलाई असार ६ सम्म आफ्नो कित्तामा उभ्याउन नेतृत्वका आकांक्षीले सक्दो कोशिश गर्नेछन् ।