फिलिपिन्सलाई आधा दर्जन गोल गर्दै जापान सेमिफाइनलमा

काठमाडौं। जापानले आइतबार फिलिपिन्सलाई ७–० ले पराजित गर्दै महिला एसियन कपको सेमिफाइनलमा स्थान बनाएको छ। योसँगै आगामी वर्ष ब्राजिलमा हुने महिला विश्वकपका लागि पनि छनोट भएको छ।

टोटनह्यामकी २० वर्षीया डिफेन्डर टोको कोगाले दुई गोल गर्दै टोलीको जितमा महत्त्वपूर्ण भूमिका खेलिन्। उनले पहिलो हाफको इन्जुरी समयमा एक गोल गरिन् भने अर्को गोल ७६औं मिनेटमा थपिन्। यस जितसँगै जापानले २०२६ च्याम्पियनसिपमा हालसम्म २४ गोल गरेको छ। यद्यपि, एक गोल पनि खाएको छैन।

अब जापानले फाइनलमा पुग्न बुधबार दक्षिण कोरियासँग खेल्नेछ। दक्षिण कोरिया सन् २०२२ को उपविजेता टोली हो।

जापानका प्रशिक्षक निल्स निल्सेनले भने,‘धेरै गोल गर्न पाउनु र खेलाडीहरूले आफ्नो क्षमता देखाउन पाउनु राम्रो कुरा हो। तर, यसले कोरियाविरुद्धको खेलमा हामीलाई मद्दत गर्नेछैन। हामीले धेरै गोल गर्‍यौं भन्ने थाहा छ, तर सेमिफाइनलमा पहिलेका गोलहरूले काम गर्दैनन्। हामी दक्षिण कोरियासँग खेल्न तयार रहनेछौं।’

चार वर्षअघि जापान सेमिफाइनलमा पेनाल्टी सुटआउटमा चीनसँग पराजित भएको थियो। यसले जापानको उपाधि रक्षा अभियान त्यतिबेला अन्त्य गरेको थियो। अस्ट्रेलियामा भइरहेको यस प्रतियोगिताका चार सेमिफाइनलिस्ट टोली स्वतः सन् २०२७ को महिला विश्वकपका लागि छनोट हुन्छन्।

क्वार्टरफाइनलमा पराजित भएका टोलीहरू भने ब्राजिलमा हुने विश्वकपका लागि थप दुई स्थानका लागि प्लेअफ खेल्नेछन्।