काठमाडौं । त्यसै भनिएको होइन्, फुटबलको विश्वकप जित्न जति गाह्रो छ, उत्तिकै गाह्रो छ, यसमा छनोट हुन् । सजिलो हुन्थ्यो त, इटाली जत्तिको टिम विश्वकपमा छनोट हुन असफल हुने थिएन् । भर्खरै निश्चित भएको छ, यस वर्ष कतारमा हुने विश्वकपमा इटाली हुने छैन् । रुसमा भएको अघिल्लो विश्वकपमा पनि इटाली थिएन् । यसरी लगातार दुई संस्करणका विश्वकपमा इटाली नहुने भएको छ । यस्तोमा अबको विश्वकपमा इटालीले पस्कने जुन विशिष्ट खालको फुटलब छ, त्यो देखिन पाइने छैन् ।
इटालीको समर्थक हुन पनि पाइन्छ, नहुन पनि पाइन्छ । तर इटालीको विश्वकप जत्तिको प्रतियोगितामा अनुपस्थिति, सबैका लागि बिझाउने खालकै छ । नर्थ मेसेडोनियाविरुद्धको खेल गुमाएपछि इटालीले विश्वकप नखेल्ने निश्चित भएको हो । कसैले पनि सोचेका थिएनन्, इटालीको फुटबल यो स्थितिबाट गुज्रिने छ भनेर । हुन् पनि भर्खर जस्तै त हो, इटालीले युरो २०२० जितेको । त्यो युरो संस्करण जितेर इटालीले तहल्का नै मच्चाएको थियो ।
अनि, सबैले भन्न सुरु गरेको थियो, इटाली रुसमा भएको विश्वकपमा छनोट नहुन संयोग मात्र थियो । तर अहिले पनि इटाली छनोट हुन सकेन् भने त्यो संयोग मात्र रहेन् । सायद इटालीको फुटबलमा केही कमजोरी छ । बरू हुन सक्छ, इटालीले युरो जित्नु संयोग थियो । युरो २०२० जित्दा इटालीका प्रशिक्षक रोबर्टो मानचिनी नायक जस्तै भएका थिए, जताततै उनको वाहवाही चलेको थियो । तर अहिले तिनै मानचिनी इटालीको फुटबलका लागि खलनायक सावित भएका छन् ।
युरो जिते लगतै इटालीले त्यस्तो फुटबल खेल्न सकेन्, जसले उसलाई विश्वकपको अन्तिम चरण पुर्याउन सक्थ्यो । मानचिनीले ठीक भनेका छन्, ‘जुलाई मै मात्र मेरो जीवनमा सबैभन्दा खुसीको क्षण आएको थियो, युरो जित्दा । अहिले मेरो खेल जीवनकै सबैभन्दा दुखद क्षण आएको छ । म निकै निराश छुं र आफ्ना खेलाडीको दु:ख हेर्न सकिरहेको छैन् । म वास्तवमै कति दु:खी छुं भने मेरो आफ्नै भविष्यलाई लिएर मैले केही पनि सोच्न सकिरहेको छैन् ।’
अहिले तत्कालका लागि मानचिनी इटालीको फुटबल टिमका प्रशिक्षक रहने छन् अथवा छैनन्, त्यसमै अनिश्चिता छ । इटालीको फुटबल संघका अध्यक्ष ग्याब्रिएल ग्राभिनाले मानचिनी प्रशिक्षक रहेकै राम्रो भनेका छन्, विश्वकप छनोट सम्भावना समाप्त भइसकेको स्थितिमा पनि । सायद मानचिनी आफैले यसलाई मान्ने छैनन् । उनका लागि इटालीको फुटबल टिम छाड्नु नै ठीक हुनेछ, किनभने उनी विश्वकप छनोटमा असफल भएकै हुन्, यो तथ्यलाई सबैले स्विकार्नै पर्छ ।
मानचिनी आफैले पनि इटालीको हारको सबै जिम्मेवारी लिएका छन् । उनले भनेको पनि ठीकै हो, जित्दा त्यसको श्रेय खेलाडीलाई । हार्दा त्यसको पूरा दोष प्रशिक्षकलाई । अनि दोष त इटालीको फुटबलमै पनि खोज्नु पर्छ, विशेषत: त्यहाँको घरेलु फुटबलमा । त्यसमाथि पनि विशेषत: सिरी ए मा । इटालीको यो माथिल्लो डिभिजन अब त्यस्तो रहेन्, जस्तो पहिले थियो । दुई मिलान क्लबदेखि युभेन्ट्सलाई अचेल युरोपेली क्लब फुटबलमा महाशक्ति मानिन्न ।
कुनै दिन थिए, इन्टर र एसी मिलान, अनि युभेन्ट्सले युरोपमा सनसनी मच्चाउने । अब यी सबै पुराना सम्झना भइसके । त्यही भएर त हो, यसपल्टको युरोपेली च्याम्पियन्स लिगको अन्तिम आठमा कुनै पनि इटालीको टिम छैन् । इंग्लिस प्रिमियर लिग र स्पेनी ला लिगा अगाडि सिरी ए फिक्का सावित हुन थालेको छ । त्यसकै झल्को त हो, इटाली विश्वकपमा छनोट नहुनु । इटालीको फुटबलले अब वास्तवमै विश्लेषण गर्नु पर्छ, कुरा कहाँनिर वास्तवमै ठीक छैन् ।
