पोखरा । नमस्ते पोखरा प्रिमियर लिग (पीपीएल) टी–ट्वान्टी क्रिकेट प्रतियोगिताको उद्घाटन खेलमा जित निकालेपछि घरेलु टोली पोखरा पल्टनका प्रशिक्षक बिनोद दासले जितको लयलाई आगामी खेलमा समेत कायम राख्ने बताएका छन् ।
पोखरा रंगशालामा शुक्रबार भएको उद्घाटन खेलमा शरद भेषवाकरको पोखराले सन्दीप लामिछानेको कप्तानीमा रहेको विराटनगर टाईटन्सलाई ५८ रनले हराएको थियो ।
'हाम्रो योजना अनुसार राम्रो भयो । सुरुवात राम्रो भएको छ । हामी अन्तिमसम्म राम्रो गर्ने छौं,' जितपछि प्रशिक्षक दासले भने, 'सबै ब्याट्सम्यानले राम्रो गर्यो । यो लयलाई हामी कायम राख्ने छौं ।'
यस्तै प्रशिक्षक दासले मैदान उत्रन मौका पाएका सबै खेलाडीले प्रमाणित गरेको बताए । तर, प्रशिक्षक दासले आगामी खेलमा टिमलाई कठिन चुनौती रहेको बताए ।
'पहिलो खेल महत्वपूर्ण थियो । हामीले पुरा गर्यौ तर अबको बाटो सजिलो हुने छैन । साबि टिम तयारीमा रहेका छन् । हामीलाई अझै राम्रो योजना आवश्यक छ । जति खेलाडीले मौका पाए, उनीहरुले आफुलाई प्रमाणित गरे । यो सकारात्मक लक्षण हो,' प्रशिक्षक दासले थपे ।
पोखराले दोस्रो खेलमा बुटवल ब्लास्टरसंग आइतबार खेल्नेछ ।
