पुलिसको उत्कृष्ट पुर्नआगमन जित  

पोखरा । विभागीय टिम नेपाल पुलिस क्लबले दोस्रो टाइगर कप महिला तथा पुरुष भलिबल च्याम्पियनसिपको पुरुषतर्फ विजयी सुरुआत गरेको छ।

पोखरा रंगशालास्थित भलिबल ट्रेनिङ सेन्टरमा सोमबार हेल्प नेपाललाई ३-२ को सेटमा हराउँदै पुलिसले सुखद सुरुआत गरेको हो ।

प्रतिस्पर्धात्मक बनेको खेलमा सुरुआती दुई सेट गुमाएपनि पुलिसले उत्कृष्ट पुर्नआगमन जित निकालेको हो ।

रोमान्चक खेलको पहिलो र दोस्रो सेट हेल्पले २५-१६ र ३१-२९ ले जितेको थियो । तर, त्यसपछिको दुई सेट पुलिसले २५-१९ र २५-२३ ले जितेपछि खेल पाँचौं सेटमा पुगेको थियो ।

पाँचौं सेटमा हेल्पलाई १७-१५ ले हराउँदै पुलिसले विजयी सुरुआत गरेको हो ।

प्रतियोगिता अन्तर्गत नै सोमबार महिलातर्फ एपीएफ क्लब र  न्यु डायमण्ड स्पोर्ट्स क्लबले जित निकालेका छन्  ।

टाइगर ग्रुप अफ पोखराको आयोजनामा जारी प्रतियोगितामा पुरुषतर्फ ५ र महिलातर्फ ५ गरी कुल १० टिमको सहभागिता रहेको छ ।

राउण्ड रोविन लिगको आधारमा हुने प्रतियोगितामा पुरुषतर्फ विभागीय टिमहरु नेपाल आर्मी क्लब, नेपाल पुलिस क्लब र सशस्त्र प्रहरीको एपिएफ क्लब, हेल्प नेपाल स्पोर्ट्स क्लब र गण्डकी प्रदेशको टिमको सहभागिता रहेको छ ।

त्यस्तै महिलातर्फ नेपाल आर्मी क्लब, नेपाल पुलिस क्लब, एपीएफ क्लब , न्यु डायमण्ड र आयोजक टाइगर ग्रुप अफ पोखराको सहभागिता रहने छ ।   

प्रतियोगिताको महिला र पुरुष उपाधि विजेता टिमले समान ३÷३ लाख, उपविजेता टिमले १ लाख ५० हजार, तेस्रो हुने टिमले समान ७५ हजार र सान्त्वना हुने टिमले ३५ हजार प्राप्त गर्नेछन् ।

त्यस्तै महिला तथा पुरुषतर्फ उत्कृष्ट खेलाडीलाई समान २५÷२५ हजार तथा हरेक विधाका उत्कृष्ट खेलाडीहरुलाई समान १०÷१० हजारसहित ट्रफी प्रदान गरिने छ  ।