खड्कालाई माछापुच्छ्रे ओपन टेनिसको उपाधि

नारायण क्षेत्री

पोखरा । १८ औं माछापुच्छ्रे पोखरा ओपन तथा भेट्रान्स टेनिस प्रतियोगिता अन्तर्गत मेन्स सिंंगल्सको उपाधि पोखराका प्रदीप खड्काले जितेका छन् ।

कास्की जिल्ला टेनिस संघद्वारा आयोजित प्रतियोगिताको शुक्रबार भएको फाइनल खेलमा प्रदीपले आरभ सम्राट हाडालाई ६–३, ६–४ को सोझो सेटमा पराजित गर्दै नगद ८० हजार सहितको उपाधी जितेका हुन् । जितसंगै खड्का नेपालको शीर्ष वरियतामा उक्लिएका छन् ।

गत महिना काठमाण्डौमा सम्पन्न गणेशमान राष्ट्रिय टेनिस प्रतियोगितामा खड्का आरभसंग ६–३, ६–१ ले पराजित हुन पुगेका थिए । प्रतियोगितामा उपविजेता बनेका आरभले नगद ४० हजार सहित मेडल प्रमाणपत्र पुरस्कार प्राप्त गरे ।  

प्रतियोगिता अन्तर्गत ३५ वर्ष माथिको एकलतर्फको उपाधि सन्तोष खत्रीले जिते । फाइनल खेलमा सन्तोषले भिष्म गुरुङ्गलाई ६–०, ६–१ को सहज सेटमा पराजित गरे । विजेता खत्रीले नगद ६० हजार तथा उपविजेता गुरुङ्गले ३० हजार सहित ट्रफि मेडल पुरस्रका पाए ।

४५ वर्ष माथिको एकल उपाधि चन्द्र शाहीले जिते । उनले बिमल कुमार गुरुङ्गलाई ६–३, ६–२ को सोझो सेटमा जित हाँसिल गर्दै सो उपाधि रक्षा गरेका हुन् । विजेताले नगद ४० हजार, उपविजेताले नगद २० हजार सहित ट्रफि मेडल पुरस्कार प्राप्त गरे ।

त्यस्तै ४५ वर्ष माथिको मेन्स डबल्समा हिमाल शाह र राजु क्षेत्रीको जोडी विजेता बन्यो । हिमाल जोडीले पोखराका विनोद कायस्थ र विकास गुरुङ्गको जोडीलाई ६–२, ६–२ को सोझो सेटमा जित निकाल्दै प्रथम स्थान हाँसिल गरेको हो । विजेताले नगद २० हजार तथा उपविजेताले नगद १० हजार सहितको पुरस्कार प्राप्त गरे ।

विजयी खेलाडीहरुलाई प्रतियोगिताको मुख्य प्रायोजक माछापुच्छ्रे बैंकका पूर्वाध्यक्ष रोशन केसी, नेपाल टेनिस संघका अध्यक्ष ज्योती राणा, प्रतियोगिताको प्रायोजक ट्र्याङ्कुलिटी स्पाका निर्देशक प्रनिल फैजु, नेपाल टेनिस संघका पूर्वाध्यक्ष मनोज राणा, सूर्य प्रेम टेनिस कोर्टका निर्माता किरण केसी लगायतले पुरस्कार प्रदान गरे ।