काठमाडौं । विश्वास नहुन सक्छ, तर यो सत्य हो । नेपाली महिला फुटबलले अन्तर्राष्ट्रिय फुटबल खेल्न थालेको साढे तीन दशक भएको छ ।
तर नेपाली फुटबलको मूल घर दशरथ रंगशालामा महिला राष्ट्रिय टिमले खेल्ने अवसर पहिलो पल्ट जुरेको छ ।
बंगलादेशविरुद्ध बिहीबार हुने पहिलो अन्तर्राष्ट्रिय मैत्रीपूर्ण खेलसँगै नेपाली महिला राष्ट्रिय टिमले दशरथ रंगशालाामा डेब्यु गर्नेछ ।
नेपाली महिला राष्ट्रिय फुटबल टिमले सन् १९८६ मा पहिलो पल्ट खेलेको थियो र प्रतियोगिता थियो, एएफसी वुमेन्स च्याम्पियनसिप ।
त्यसयता नेपाली महिला राष्ट्रिय फुटबल टिमले औपचारिक खेल दशरथ रंगशालामा खेल्ने अवसर कहिले पनि पाएन । यस्तोमा बंगलादेशविरुद्ध हुने यो पहिलो खेल ऐतिहासिक हुनेछ र यसको अर्थ धेरै हुनेछ ।
नेपाली महिला फुटबलको सबैभन्दा ठूलो विशेषता हो, यसको इतिहास चार दशक जति लामो भए पनि यसले अन्तर्राष्ट्रिय फुटबल भने अधिकांस समय विदेशमै खेलेको छ ।
नेपालले सबैभन्दा पहिले स्वदेशमा खेलेको भनेको पनि सन् २०१६ मा मात्र हो, जति बेला मलेसिया मैत्रीपूर्ण खेल खेल्ने काठमाडौं आएको थियो ।
संयोग कस्तो भने नेपालले त्यो खेल सातदोबाटोको एन्फा कम्प्लेक्समा खेलेको थियो । त्यसपछि नेपालले महिला अन्तर्राष्ट्रिय फुटबल विराटनगर र पोखरामा खेलेको छ ।
त्यसैले पनि बंगलादेशविरुद्धको त्यस पहिलो खेलमा जे जति खेलाडी उत्रनेछन्, तिनले इतिहास बनाउने छन्, राष्ट्रिय टिमका लागि पहिलो पल्ट दशथर रंगशालामा खेलेर।
