स्वर्णधारी चिनियाँ खेलाडीमाथि अनुसन्धान

एजेन्सी । अन्तराष्ट्रिय ओलम्पिक कमिटि (आईओसी) ले टोकियो ओलम्पिकमा स्वर्ण पदक विजेता दुई खेलाडीमाथि अनुसन्धान थालेको छ ।

आईओसीले खेल भावना विपरीत कार्य गरेको विषयमा साइक्लिङका दुई स्वर्णधारी बाओ सान्जु र शङ टियान्सीमाथि अनुसन्धान सुरु गरेको हो ।

टोकियो ओलम्पिकमा यी दुई जोडीले ट्रयाक साइक्लिङको महिला स्प्रिन्ट टिममा स्वर्ण पदक जितेका थिए ।

तर, पदक वितरण समारोहमा दुबै खेलाडी चिनियाँ कम्युनिस्ट पार्टीका पूर्व नेता  माओ त्सेतुङको 'ब्याच' लगाएर उपस्थित भएका थिए । जसको कारण उनीहरुमाथि अनुसन्धान थालिएको हो ।

ओलम्पिक खेलकुद आयोजना स्थलमा  कुनैपनि राजनैतिक, धार्मिक वा जातीयताको बारेमा प्रचार प्रसार र प्रदर्शन गर्न नपाईने ओलम्पिकको नियम रहेको छ ।  

आईओसीले दुई खेलाडीले नियम तोडेको विषयमा चिनियाँ ओलम्पिक कमिटिसँग रिपोर्ट माग समेत गरेको छ ।