टोकियो ओलम्पिकमा नेपाल : सहभागितामै सिमित

काठमाडौं । विश्व खेलकुदको कुम्भमेला ३२ औं गृष्मकालीन ओलम्पिक खेलकुद (टोकियो ओलम्पिक) जापानमा जारी छ।

टोकियोमा भईरहेको ओलम्पिकमा नेपालको चुनौती भने सकिएको छ । आज (शुक्रबार) बिहान एथलेटिक्स खेलाडी सरस्वती चौधरीको प्रतिस्पर्धासँगै नेपालको चुनौती सकिएको हो ।

टोकियो ओलम्पिकमा नेपालबाट ४ खेलका पाँच खेलाडीले प्रतिस्पर्धा गरेका थिए । पाँचै खेलाडी युनिभर्सालिटी कोटा र वाइल्ड कार्डमार्फत ओलम्पिक खेलेका हुन्।

सदाझै, टोकियो ओलम्पिकमा पनि नेपालको चुनौती सहभागितामै सिमित रह्यो। सहभागी पाँचै खेलाडीले दोस्रो चरणको यात्रा तय गर्न सकेनन् ।

सन् १९६४ मा टोकियोमै आयोजना भएको ओलम्पिकबाट नेपालको ओलम्पिक यात्रा सुरु भएको थियो । तर, नेपालको ओलम्पिक यात्रा ६ दशक पुग्नै लाग्दा नेपालको सहभागिता ‘सहभागिता’ मै सिमित छ ।

तीन खेलाडीले राष्ट्रिय कीर्तिमान बनाउनु टोकियो ओलम्पिकमा नेपालको उपलब्धि रह्यो। पौडीका गौरिका सिंह र एलेक्जेन्डर शाह (एलेक्स) तथा सुटिङकी कल्पना परियारले राष्ट्रिय कीर्तिमान बनाए।

नेपाली खेलाडीको प्रदर्शन कस्तो ?

कल्पना परियार (सुटिङ)

कल्पनाले महिला १० मिटर एयर राइफलमा प्रतिस्पर्धा गरेकी थिइन् ।

वाइल्ड कार्ड प्राप्त गर्दै ओलम्पिक खेलेकी कल्पनाले छनोट चरणमा ६ सय १६.८ अंक जोड्दै राष्ट्रिय कीर्तिमान बनाईन् ।

कल्पनाले आफ्नै नामको राष्ट्रिय कीर्तिमान भङ्ग गरेकी हुन् । उनले नेपालमा भएको १३ औं दक्षिण एसियाली खेलकुदमा ६ सय १४.५ अंक जोड्दै राष्ट्रिय कीर्तिमान बनाएकी थिइन् ।

राष्ट्रिय कीर्तिमान बनाउने क्रममा कल्पनाले पहिलो सिरिजमा १०२.२, दोस्रोमा १०५.४, तेस्रोमा १०१.०, चौंथोमा १०४.१, पाँचौमा १०३.४ र छैटौं १००.७ अंक जोडिन् ।

तर, उनी फाइनल चरणमा भने पुग्न सकिनन् । ५० खेलाडी रहेको छनोट चरणमा कल्पना ४६ औं स्थानमा रहिन् ।

गौरिका सिंह (पौडी)

युनिभर्सालिटी कोटाबाट टोकियो पुगेकी पौडीबाज गौरिकाले महिलाको १ सय मिटर फ्रिस्टाइलमा प्रतिस्पर्धा गरेकी थिइन् ।

टोकियो एक्वेटिक सेन्टरमा गौरिकाले हिट चरणमा १:००.११ सेकेन्डको समय निकाल्दै राष्ट्रिय कीर्तिमान कायम गरिन् ।

५० मिटरको लङ कोर्समा गौरिकाले आफ्नै नाममा रहेको कीर्तिमान भङ्ग गरेकी हुन् । यस अघि गौरिकाको नाममा १:००.६२ सेकेन्डको राष्ट्रिय कीर्तिमान रहेको थियो ।

गौरिकाले २०१९ मा दक्षिण कोरियामा भएको १८ औं फिना विश्व च्याम्पियनसिपमा राष्ट्रिय कीर्तिमान बनाएकी थिइन् ।

राष्ट्रिय कीर्तिमान बनाए पनि गौरिकाले सेमिफाइनलमा स्थान बनाउन सकिनन् । उनी हिट चरणबाट बाहिरिइन् ।

१८ वर्षिया ओलम्पिकमा गौरिकाको यो दोस्रो सहभागिता हो । यस अघि २०१६ मा गौरिकाले रियो ओलम्पिक खेलेकी थिइन् ।

एलेक्जेन्डर गाडेगार्ड शाह (पौडी)

पौडीबाज एलेक्जेन्डरले पुरुषको १ सय मिटर फ्रिस्टाइलमा प्रतिस्पर्धा गरेका थिए । युनिभर्सालिटी कोटाबाट पहिलो पटक ओलम्पिक खेलेका एलेक्सले राष्ट्रिय कीर्तिमान बनाए ।

हिट चरणमा एलेक्सले ५३.४१ सकेन्डको समय निकाल्दै राष्ट्रिय कीर्तिमान बनाएका हुन् । एलेक्स आफ्नो हिट-१ मा शीर्ष स्थानमा रहे ।

एलेक्सले आफ्नै नामको कीर्तिमान सुधार गरेका हुन् । यस अघि एलेक्सको नाममा ५५.३८ सकेन्डको राष्ट्रिय कीर्तिमान रहेको थियो।

राष्ट्रिय कीर्तिमान बनाएपनि एलेक्स सेमिफाइनलमा पुग्न सकेनन् । उनी हिट चरणबाट बाहिरिए । कुल ७१ खेलाडीमध्ये एलेक्स ५९ औं स्थानमा रहे ।

सोनिया भट्ट (जुडो)

वाइल्ड कार्ड प्राप्त गर्दै ओलम्पिक खेलेकी सोनियाले जुडोतर्फ महिलाको ४८ केजी तौल समूहमा प्रतिस्पर्धा गरेकी थिइन् । तर, सोनिया पहिलो खेलमै पराजित भईन् ।

राउण्ड अफ ३२ को खेलमा सोनिया रुसी खेलाडी डोल्गोभा इरिनासँग पराजित भएकी थिइन् ।

१९ वर्षिया सोनिया विश्व वरीयताको नवौं स्थानमा रहेकी रुसी खेलाडी इरिनासँग इप्पोनको आधारमा पराजित भएकी थिइन् । सोनियाले १ मिनेट १६ सेकेण्डमै खेल गुमाएकी थिइन् ।

नेपालमा आयोजना भएको १३ औं सागको कास्य पदकधारी सोनियाले पहिलो पटक ओलम्पिक खेलेकी हुन् । उनी विश्व जुडो च्याम्पियनसिपमा एक बाउट जित्ने पहिलो नेपाली खेलाडी समेत हुन् ।

सरस्वती चौधरी (एथलेटिक्स)

सरस्वती टोकियो ओलम्पिकमा नेपालबाट प्रतिस्पर्धा गर्ने अन्तिम खेलाडी बनिन् ।

तर, महिलाको १ सय मिटर दौडमा प्रतिस्पर्धा गरेकी सरस्वती अन्य खेलाडी जस्तै पहिलो चरणबाटै बाहिरिइन् ।

सरस्वतीले निर्धारित दुरी १२:९१ सेकेन्डमा पूरा गरिन् । दोस्रो हिटमा रहेकी सरस्वती आफ्नो हिटमा आठौं स्थानमा रहिन् । यस हिटमा ९ खेलाडी रहेका थिए ।