व्यवस्थापकबाट मास्केको राजीनामा

काठमाडौं । निरोज मास्केले राष्ट्रिय महिला टिमको ब्यवस्थापकबाट राजीनामा दिएकी छिन् ।

नेपाल भलिबल संघको केन्द्रिय उपाध्यक्ष रहेकी मास्केले घरायासी कारण देखाउँदै व्यवस्थापकबाट राजीनामा दिएकी हुन् ।

भलिबल संघले फिलिपिन्स हुन गईरहेको एसियन सिनियर महिला भलिबल च्याम्पियनसिपका लागि मास्केलाई राष्ट्रिय टिमको व्यवस्थापकको जिम्मेवारी दिने निर्णय गरेको थियो ।

संघका एक पदाधिकारीले व्यवस्थापक पदबाट राजीनामा दिएको बताए ।

'उहाँले घरायासी कारण देखाउँदै सोमबारबाट लागु हुने गरि व्यवस्थापक पदबाट राजीनामा दिनुभएको छ ।' उनले भने ।

प्रतियोगिताको तयारीका लागि बन्द प्रशिक्षण सुरु गर्नेदेखि खेलाडी तथा अफिसियलको व्यवस्थापनको टुङ्गो लगाएसंगै मास्केले व्यवस्थापक पद छाडेकी हुन् ।

'घरायासी कारणले व्यवस्थापकको जिम्मेवारीबाट अलग हुने निर्णय गरेकी हुँ ।' मास्केले भनिन्, 'तर महिला टिमको तयारी र व्यवस्थापनमा आउने समस्यामा टिमसंगै रहनेछु ।'

'खेलाडीले अझ परिस्कृत रुपमा प्रतियोगिताको तयारी गर्न पाउनेछन् ।' उनले थपिन् ।

महिला टिमको व्यवस्थापक बनाउने विषयलाई लिएर संघभित्र रस्साकस्सी समेत चलेको थियो । यसअघि महिला टिमको व्यवस्थापकको रुपमा रीता कोईरालाले जिम्मेवारी सम्हालेकी थिईन् ।

ऐतिहासिक रुपमा नेपालको महिला भलिबल टिमले एसियन च्याम्पियनसिप खेल्न गईरहेको अवस्थामा संघले उपाध्यक्ष रहेकी मास्केलाई सो जिम्मेवारी दिएको थियो ।

‘कोभिड–१९ को प्रभाव बढिरहेको समय बन्द प्रशिक्षण सुरु गर्नेदेखि खेलाडी, अफिसियलको व्यवस्थापन चुनौतीपूर्ण देखेर जिम्मेवारी लिएकी हुँ । जनजिवन अब सामान्य हुँदै गएको छ । टिमको व्यवस्थापनमा अब खासै समस्या नआउँला ।’ उनले भनिन् ।

नेपालको महिला टिमले पहिलो पटक एसियन च्याम्पियनसिपमा सहभागीता जनाउँदैछ । प्रतियोगिताको तयारीका लागि भन्दै नेपालले असार १ गतेबाट बन्द प्रशिक्षण समेत सुरु गरेको छ ।

खेलाडीलाई त्रिपुरेश्वरस्थित वल्र्ड ट्रेड सेन्टरमा राखेर भलिबल संघले तयारी अघि बढाएको छ । प्रारम्भिक रुपमा २७ जना खेलाडी प्रशिक्षणमा सामेल छन् । विभागीय टिम पुलिसले विभिन्न कारण देखाउँदै तीन खेलाडीलाई बन्द प्रशिक्षणमा सहभागी गराएन ।