काठमाडौं । ‘धैर्य गर्नुपर्छ । समर्पण र अनुशासनबाट आफुलाई प्रमाणित गर्नुपर्छ । तपाई खस्नुभयो भने उठ्नुहोस् र विश्लेषण गर्न सुरू गर्नुहोस् ।’ आशिष लामाले एक भेटमा यस्तै भने ।
सुन्दा लाग्छ, उनी कुनै दर्शनको ब्याख्या गर्दैछन् । जीवनलाई नजिकबाट बुझेका छन् ।
लामो संघर्षबाट राष्ट्रिय टोलीमा स्थान बनाएका आशिषको खेल जीवनमा दुखकै हिस्सा बढी लेखिएको छ । जीवनका हरेक परिक्षाका उत्तर उनले धैर्यताले दिएका छन् ।
उत्कृष्ट फर्ममा हुदाँ समेत राष्ट्रिय टिमबाट फालिएका आशिष यस पटक अब्दुल्लाह अलमुताइरीको २३ सदस्यीय टोलीमा अटाउन सफल भए । भर्खरै सम्पन्न नेपाल सुपर लिग (एनएसएल) र मोफसलका गोल्डकपमा प्रदर्शनका आधारमा अलमुताइरीको टोलीमा आशिष अटाएका हुन् ।
एनएसएल अघि प्रशिक्षक अलमुताइरीको पहिलो टोलीमा आशिष थिएनन् । एनएसएल लगत्तै उनलाई अमुताइरीले राष्ट्रिय टोलीमा बोलाए । हेडिङमा चुस्त देखिएका आशिष बक्सभित्र पनि चतुर खेलाडी मानिन्छन् । बक्स बाहिरबाट पनि उनको प्रहार शक्तिशाली हुने गर्छ । सायद अलमुताइरीले त्यही देखे । आशिष पुन: एकपटक राष्ट्रिय टोलीमा अटाएका छन् ।
पछिल्लो सहिद स्मारक ‘ए’ डिभिजन लिगमा उत्कृष्ट लयमा देखिएका उनीले राष्ट्रिय टोलीको सपना नदेखेका हैनन् । तर उनले स्थान भने सुरक्षित गर्न सकेनन् । उनले पछिल्लो सिजनको ‘ए’ डिभिजन लिगका १३ खेलमा सर्वाधिक ९ गोल गरेका थिए ।
लिगका दौरान आशिष प्रशिक्षकले मुल्याङ्गकन गरेका फरवार्डमा पहिलो रोजाईमा थिए । टोलीले राम्रो प्रदर्शन गर्न नसके पनि उनले लिगमा सर्वाधिक गोल गरेका थिए । लिगका सर्वाधिक गोलकर्ता बने पनि उनले विधागत पुरस्कारै पनि पाउन सकेनन् ।
लिगमा उत्कृष्ट प्रदर्शनकै कारण तकालिन प्रशिक्षक योहान कालिनले विश्वकप छनोटको बन्द प्रशिक्षणमा उनलाई बोलाएका थिए । लगत्तै कोरोना महामारीले उग्ररुप लिएपछि विश्वकप छनोटको खेल र तयारी स्थगित भयो । प्रशिक्षक कालिन स्वदेश फर्किए । कोरोनाको कहरका बीच उनी नेपाल फर्किन मानेनन् । उतैबाट राजीनामा दिए ।
अखिल नेपाल फुटबल संघ (एन्फा)ले नोभेम्बर २०२० मा बंगलादेशसँग दुई अन्तर्राष्ट्रिय मैत्रीपूर्ण खेल खेल्ने योजना बनायो । बालगोपाल महर्जनलाई टोलीको कार्यवहाक प्रशिक्षकको जिम्मेवारी दियो । बंगलादेश जाने टोलीको बन्द प्रशिक्षणमा आशिष पनि थिए । तर उनी अन्तिम टोलीमा अट्न सकेनन् ।
बन्द प्रशिक्षणमा बोलाइएका ३४ खेलाडी मध्य २६ खेलाडी बंगलादेश जाने भए । नयाँ अनुहारलाई टोलीमा राख्दै २५ खेलाडी सम्मिलित टोली बंगलादेश गएको थियो । त्यसमा आशिष भने थिएनन् ।
‘बंगलादेश भ्रमणका लागि उत्साहीत थिए । किनकी कोरोना कहरका बीच हामी अन्तराष्ट्रिय फुटबल खेल्दै थियौं । तर टोलीमा अटाउन सकिन ।’ उनले भने, ‘त्यो बेला मेरो रूममेटलाई कोरोना पोजेटिभ देखियो । सम्पर्कमा परेपछि टोलीबाट बाहिरिए ।’
खास भएको के थियो ?
बंगलादेशसँग दुई अन्तर्राष्ट्रिय मैत्रीपूर्ण खेलको मिति तय गर्दै एन्फाले ३४ खेलाडीलाई बन्द प्रशिक्षणका लागि दशैं लगत्तै काठमाडौं बोलायो । सबै खेलाडी बन्द प्रशिक्षणमा सहभागी भए । एक साता चलेको बन्द प्रशिक्षणको क्रममा राष्ट्रिय फुटबल टोलीको दुईपटक कोरोना परीक्षण गरिएको थियो । पहिलो पटक गरिएको परीक्षणमा पाँच खेलाडीलाई कोरोना संक्रमण देखियो । दोस्रो परिक्षणमा थप दुई खेलाडीमा संक्रमण देखियो ।
बंगलादेश प्रस्थान गर्नु अघि भरपर्दा मिडफिल्डर रोहित चन्द चोटका कारण खेल्न नसक्ने भए । उनी लगायत आठ खेलाडी विभिन्न कारण बंगलादेश भ्रमणबाट वञ्चित भए । बन्द प्रशिक्षणका क्रममा आशिषका रुममेट अभिषेक रिजाललाई कोरोना संक्रमण पुष्टि भयो । सम्पर्कमा रहेका आशिषलाई बंगलादेश भ्रमणबाट बाहिर राखियो । तर आशिषको दुवै पटकको कोरोना रिपोर्ट भने नेगेटिभ आएको थियो । गोलरक्षक विकेश कुथु समेत कोरोना संक्रमित भए । उनका रुममेट विकास खवास भने टोलीमा सहभागी भए । आशिष भने अभागी सावित भए ।
‘त्यो समयनै खराब थियो । परिस्थिती आफु अनुकुल थिएन । म केवल हेर्न मात्र सक्थे । तर अब मौका पाएको छु । प्रमाणित गर्न मेहनत गर्नेछु ।’ उनले भने ।
लगत्तै नेपालमा आयोजना भएको त्रिदेशीय फुटबल प्रतियोगितामा समेत आशिषले राष्ट्रिय टिममा मौका पाएनन् । मुख्य प्रशिक्षक महर्जनले उनलाई टिममा राखेनन् । त्रिदेशीय प्रतियोगितामा नेपालले सुरुवाती खेलमा गोलकै लागि संघर्ष गर्नुपरेको थियो । तर लिग फुटबलमा सर्वाधिक गोलकर्तालाई प्रयोग गर्न महर्जन हच्किए ।
‘सबै चुनौतीको सामना गर्न दृढ हुनुपर्छ । किनकी एउटा खेलाडीको करियरमा राम्रो र खराब दुवै समय आउँछ । शीर्षमा पुगे पछि तल झर्नुपर्छ, अहंकारी हुनुहुन्न । तर उपलब्धिबाट टाढा हुनु हुँदैन ।’ उनी भन्छन् ।
आशिषको फुटबल यात्रा
आशिषले स्कूल–स्तरीय प्रतियोगिताबाट फुटबल यात्रा सुरु गरेका थिए । उनले एनआरटीबाट यू–१४ च्याम्पियनशिप खेले । टोली च्याम्पियन समेत बन्यो ।
एनआरटीबाट उमेर समूहको फुटबल करियर सुरु गरेका आशिषले टुसाल युथ क्लब, ब्वाइज युनियन क्लब, हिमालयन शेर्पा क्लब, मनाङ मर्स्याङ्दी क्लबबाट पनि खेले । त्यपपछि उनी विभागीय टोली एपीएफमा प्रवेश गरेका थिए । हाल उनी एपीएफका मुख्य फरवार्ड हुन् ।
राष्ट्रिय टोलीमा भने आशिषको यात्रा लामो छैन । उनले पहिलो पटक सन् २०१९ मा राष्ट्रिय टोलीमा अवसर पाएका थिए । तत्कालिन प्रशिक्षक योहान कालिन पोखराको सफल पोखरा कप हेर्न पुगेका थिए । आशिषको प्रदर्शनबाट प्रभावित कालिनले आशिषलाई राष्ट्रिय टोलीमा बोलाए । उनकै प्रशिक्षणमा आशिषले सन् २०१९ मा कुवेतविरूद्धका दुई मैत्रीपूर्ण खेलमा नेपालको प्रतिनिधित्व गरे ।
‘पहिलो मैत्रीपूर्ण खेल खेलिसकेका थियौ । दोस्रो मैत्रीपूर्ण खेलको एक दिन अघि कालिनसँगै खाना खाईरहेका थियौं । कोचले दोस्रो मैत्रीपूर्ण खेल खेल्नेछौं भनेका थिए । देशका लागि सिनियर टोलीबाट खेल्ने सपना पुरा गर्न उत्साहित थिए । त्यो सपना पनि पुरा गर्न मौका पाए ।’
आशिष आफ्नो फुटबल करियरमा खासै सुनौलो दिन नभएको बताउँछन् । धेरै क्लबका लागि खेलेको भएपनि फरवार्ड भएकाले गोल नगर्दा कसैले याद नगर्ने उनी बताउँछन् ।
‘धेरै क्लबका लागि खेलिसकेको छु । म स्ट्राइकर हु । मलाई थाहा छ, स्ट्राइकरले गोल गरेपछि मात्र मान्छेले याद गर्नेछन् । चिन्नेछन् । फुटबल यस्तो प्रतिस्पर्धा हो, गोलको खडेरी पर्यो भने कसैले याद गर्दैनन् ।’ उनी भन्छन्, ‘फुटबल खेल्छु भनेर आफुमाथि विश्वास थियो । तर शुरुका दिनमा धेरै समय बेन्चमा खर्च गर्नु पर्यो । यस्ता विषयले मानसिक तनाव दिन्छ तर धर्य गर्नुपर्छ ।’
