काठमाडौं । नेपाल सुपर लिगको सुरुवाती चार खेलमा ललितपुर सिटी एफसी जित विहिन थियो । टोलीको मुख्य प्रशिक्षक प्रदिप हुमागाई थिए । ११ बर्षपछि घरेलु फुटबलमा फर्किएका अमेरिकन नागरिक हुमागाई चार खेलमा जित निकाल्न सकिरहेका थिएनन् ।
चौथो खेलमा समेत तीन अंक नआएपछि ललितपुरको व्यवस्थापक टिमले हुमागाईलाई बर्खास्त गर्न तयारी गर्याे । पोखरा थण्डर्ससँग गोलरहित बराबरी भएसँगै हुमागाई बर्खास्तमा परे ।
हुमागाई बर्खास्तमा परेका थिए । उनले क्लबलाई राजीनामा बुझाएर ‘फेस सेभिङ’ भने गरे । आफुले राजीनामा दिएको पत्र सञ्चार माध्यमलाई दिए । सामाजिक सञ्जालमा पोष्ट गरे ।
हुमागाई बर्खास्तमा परेपछि क्लब सम्हाल्ने अवसर पाए, प्रशिक्षक राजु तामाङले ।
एक हिसाबले ललितपुरले प्लेअफ सम्भावनाको आश मारिसकेको थियो । खेलको नतिजा भन्दा सम्भावना गणितिय समिकरणमा निर्भर थियो । त्यसैले ललितपुरले मुख्य प्रशिक्षक बर्खास्तीमा ढिलाई गरेन । झिनो आश सहित पहिलो पटक मुख्य प्रशिक्षकको जिम्मेवारी सम्हाल्ने अवसर पाए राजु तामाङले ।
राष्ट्रिय टोलीका पूर्व मिडफिल्डर तथा त्रिभुवन आर्मी क्लबका पूर्व खेलाडी राजुले पहिलो अवसरमै चमत्कार गरिदिए । उनले लिग चरणका बाँकी दुई खेलमा शतप्रतिशत नतिजा दिए । लिगको १६ औं खेलमा ललितपुरले बुटबल लुुम्बिनीलाई १–० गोल अन्तरले पराजित गर्याे । ललितपुरको जितमा अजरबैजानका मिडफिल्डर नुर्लान जाहिदले निर्णायक गोल गरे ।
जितसँगै भाटभटेनी सुपर मार्केटको स्वामित्वमा रहेको ललितपुरले प्लेअफमा पुग्ने बाटो खोलेको थियो । प्लेअफमा स्थान बनाउ ललितपुरलाई लिग चरणको अन्तिम खेलमा विराटनगर सिटी एफसीलाई पराजित गर्नुपर्ने थियो । दुबै टोलीलाई ‘गर या मर’को स्थिती थिए । हार्ने टोली बाहिरिने पक्का थियो ।
ललितपुरलाई हार्न मन्जुर थिएन । सायद ललितपुर अर्कै कथा लेख्न चाहन्थ्यो ।
प्रशिक्षक राजुले खेलाडीको मनोबल बढाए । सुरुवात देखि खेल एकै किसिमको थियो । सोचे अनुसार प्रर्दशन भईरहेको थिएन । सुरुवातबाटनै ललितपुरमा गोलको खडेरी परेको थियो । तर लिगका अन्तिम खेलमा राजुले ललितपुरको भाग्य बदल्ने काम गरे ।
अन्तिम खेलमा विराटनगरविरुद्ध उनले पुरै आक्रमक खेल खेलाए । आयो लाखे ‘स्लोगन’ बनाएको ललितपुरले पूर्वको सान बोकेको विराटनगरविरुद्ध दबाब बनायो ।
पहिलो हाफमा एक गोल गरेको ललितपुरले दोस्रो हाफमा ३ गोल थप्यो । र प्लेअफमा स्थान बनायो ।
अन्तिम खेल स्थिती तनाबपूर्ण रह्यो । तर ललितपुरले सम्हालिएर खेल्यो । राजुको नेतृत्वमा ललितपुरले शतप्रतिशत जित हासिल गर्याे ।
अब ललितपुरले दोस्रो प्लेअफमा बुटबल लुम्बिनीसंग खेल्ेनछ । यसअघिको भेटमा ललितपुरले बुटवल लुम्बिनीविरुद्ध जित निकाल्न सफल भएको थियो ।
प्लेअफ अघि प्रशिक्षक राजुले टोलीको स्लोगन ‘आयो लाखे’ रहेको उल्लेख गर्दै लाखे जाग्न समय लाग्ने र जागेपछि नरोकिने ब्यङ्ग्यात्मक प्रतिक्रिया दिएका थिए ।
‘पक्कैपनि अप्ठ्यारो अवस्थाबाट टिम राम्रो भएको छ । लतिपुरको लोगो लाखेसँग गएर जोडिएको छ । लाखेलाई जगाउन अली समय लाग्छ । तर अब आउने दिनमा लाखे जागेपछि अरु टोलीलाई रोक्न गाह्रो हुन्छ ।’ राजुले भने ।
सन् २००५ को साफ च्याम्पियनसिपमा श्रीलंकाविरुद्ध डेब्यु गरेका राजुले हालसम्म राष्ट्रिय टोलीबाट सन्यास लिएका छैनन् । उनि ७३ साल यता भने टोली बाहिर छन् । चोटका कारण बाहिर रहेका उनलाई प्रशिक्षणमा बोलाइएको छैन ।
राष्ट्रिय टोलीका बोलाउन छाडेसँगै उनले प्रशिक्षणमा आफ्नो समय दिन थालेका थिए । सोहि अनुसार बी लाईसेन्स उत्तिर्ण गरिसकेका उनले आर्मी महिला टिमको प्रशिक्षण हेरिरहेका छन् । उनले सम्हालेको आर्मी राष्ट्रिय महिला लिगमा दोस्रो भएको थियो ।
एनएसएलमा ललितपुर जिल्लाको प्रतिनिधित्व गरेको उसले ६ खेलबाट ९ अंक बटुल्दै तेस्रो स्थान बनाएको थियो । सात क्लब सहभागी यस प्रतियोगितामा उसले २ जित ३ बराबर र १ हारको नतिजा ब्यहोरेको छ ।
प्रशिक्षक राजुले गाह्रो अवस्थाबाट टोली प्लेअफमा पुगेको बताउँदै खेलाडीमा आत्माविश्वास भएको र खेलाडी समेत मानसिक रुपमा प्लेअफमा जित निकाल्न तयार रहेको बताए ।
‘खेलाडीमा उत्साह छ । गाह्रो अवस्थामा प्लेअफमा पुगेको भएर बाँकी खेलमा राम्रो नतिजा ल्याउने सोचमा छौं । मानसिक रुपमा खेलाडी खेल्न तयार छन् ।’ उनले भने ।
प्रशिक्षक राजुलाई मार्की तथा कप्तान अन्जनको साथमा दुई विदेशी खेलाडीको राम्रो साथ रहेको छ । प्रशिक्षक राजुलाई डिफेन्समा पिटर सेगुन, निरज बस्नेत, प्रवेश दनुवार र कमल श्रेष्ठले सघाउने छन् । मिडफिल्डमा राष्ट्रिय टोलीका एरिक बिष्ट, मिक्छेन तामाङ र अजरबैजानका नुर्लान जाहिद छन् । फिनिसिङमा विमल राना सहित आक्रमक फरवार्ड भिलिम पोसिंकोभिच र अन्जन बिष्ट छन् ।
प्रशिक्षक राजुले प्लेअफमा पुग्ने टोली सबै राम्रो रहेको र अन्य टोलीभन्दा राम्रो गर्न आफु केन्द्रित हुने बताए । ‘प्लेअफका सबै टोली राम्रा छन् । उनीहरु भन्दा राम्रो गर्नेछौं ।’ राजु भन्छन् ।
