काठमाडौं । घरेलु मैदानमा जारी त्रिकोणात्मक टी–ट्वान्टी क्रिकेट सिरिज अन्तर्गत लिगको अन्तिम खेलमा नेपालले आज मलेसियासँग प्रतिस्पर्धा गर्दैछ ।
टियु अन्तर्राष्ट्रिय क्रिकेट मैदानमा नेपाल र मलेसियाबीचको खेल अपरान्ह १ः१५ बजे सुरु हुनेछ ।
मलेसियाविरुद्ध मैदान उत्रदा नेपाल सहज जितको खोजीमा हुनेछ । पहिलो भेटमा ९ विकेटको जित निकालेको नेपाल उच्च आत्मबलका साथ मैदान उत्रनेछ ।
नेपाल मलेसियालाई हराएर शीर्ष स्थानमा रहदै फाइनल पुग्न चाहन्छ ।
नेपाल सिरिजको फाइनलमा पुगिसकेको छ । तर, मलेसियालाई हराएर नेपाल शीर्ष स्थानमा रहेर फाइनल खेल्नेछ ।
सिरिजको फाइनलमा नेपालले शनिबार नेदरल्यान्ड्ससँग खेल्नेछ ।
नेदरल्यान्ड्स पनि फाइनल पुगिसकेको छ ।
मलेसिया भने प्रतियोगिताबाट बाहिरिसकेको छ ।
तर, अन्तिम खेलमा नेपाललाई हराएर मलेसिया सिरिजको सुखद अन्त्य गर्न चाहन्छ ।
मलेसिया नेपालसँग अघिल्लो भेटमा व्यहोरेको हारको बदला लिने दाउमा समेत हुनेछ ।
सिरिजको ३ खेलमा मलेसिया १ अंक जोडेको छ । मलेसियाले बुधबार नेदरल्यान्ड्ससँग बराबरी खेलेको थियो ।
नेदरल्यान्ड्स ४ खेलमा ५ अंक जोडेर शीर्ष स्थानमा रहेको छ ।
नेपाल ३ खेलमा ४ अंक जोडेर दोस्रो स्थानमा रहेको छ ।
हेड टु हेड -
हालसम्म नेपाल र मलेसियाबीच ४ टी-ट्वान्टी र ५ टी-ट्वान्टी अन्तराष्ट्रिय खेल भएको छ । जसमा नेपाल हाबी रहेको छ ।
नेपालले ३ टी-ट्वान्टी र ४ टी-ट्वान्टी अन्तराष्ट्रियमा जित हात पार्दा मलेसियाले २ खेलमा जित निकालेको छ ।
पहिलो पटक सन् २००७ को कुवेतमा भएको एसीसी टी–ट्वान्टी कपमा नेपालले मलेसियासँग खेलेको थियो । त्यस खेलमा नेपालले २१ रनको जित निकालेको थियो ।
टस हारेर पहिले ब्याटिङ गरेको नेपालले निर्धारित २० ओभरमा ९ विकेटको क्षतिमा १ सय २१ रन बनाएको थियो । नेपालका बसन्त रेग्मीले ३३ तथा परेश लोहनीले ३१ रन बनाए । १ सय २२ को लक्ष्य पछ्याएको मलेसिया १८ ओभर ५ बलमा १०० रनमा समेटिएको थियो । खेलको प्लेयर अफ द म्याच बसन्त रेग्मी घोषित भएका थिए ।
दोस्रो भेट युएईमा सन् २००९ को एसीसी टी–ट्वान्टी कपमा भएको थियो । जुन खेल नेपालले ६ विकेटले गुमाएको थियो ।
टस जितेर पहिले ब्याटिङ गरेको नेपालले निर्धारित २० ओभरमा ७ विकेट गुमाउँदै १ सय १२ रन बनायो । नेपालका महबुब आलमले सर्वाधिक ३१ रन बनाए । यस्तै ज्ञानेन्द्र मल्लले २२ तथा परेश लोहनीले १९ र पारस खड्काले १० रनको योगदान गरे । १ सय १२ रनको लक्ष्य पछ्याएको मलेसियाले १७ ओभर २ बलमा ४ विकेट गुमाउँदै लक्ष्य पूरा गर्यो ।
सन् २०१३ को एसीसी टी–ट्वान्टी कप नेपालले आयोजना गरेको थियो । किर्तिपुरस्थित टियु मैदानमा टस हारेर पहिले ब्याटिङ गरेको नेपालले निर्धारित २० ओभरमा ८ विकेट गुमाउँदै १ सय ६३ बनायो । नेपालका पारस खड्काले सर्वाधिक ८७ रन बनाए ।
जवाफी ब्याटिङमा आएको मलेसियाले पुरै ओभर खेल्दै ९ विकेट गुमाएर १ सय ४४ रन मात्र बनायो । र, नेपाल १९ रनले विजयी भएको थियो ।
सन् २०१८ को विश्व टी–ट्वान्टी एसिया क्षेत्रिय छनोटमा दुई टिमबीच प्रतिस्पर्धा भएको थियो । जुन खेलमा नेपालले ८ विकेटको जित निकालेको थियो ।
मलेसियाकै क्वालालम्पुरमा टस जितेर पहिले ब्याटिङ गरेको मलेसिया १९ ओभर ३ बलमा १०० रनमा समेटियो । नेपालका सन्दीप लामिछानेले ५ विकेट तथा सोमपाल कामीले ३ विकेट हात पारे ।
१०१ रनको लक्ष्य पछ्याएको नेपालले १२ ओभर ४ बलमा २ विकेट गुमाउँदै लक्ष्य पूरा गर्यो । नेपालका पारस खड्काले ५२ रनको अर्धशतकीय इनिङ्स खेलेका थिए ।
सन् २०१९ को आईसीसी टी–ट्वान्टी विश्वकप एसिया फाइनलको तयारी गर्न नेपाली राष्ट्रिय क्रिकेट टोलीले मलेसिया भ्रमण गर्यो । दुई खेलको मैत्रीपूर्ण सिरिजमा नेपालले सहज जित निकाल्यो । पहिलो खेलमा ७ विकेटले मलेसियालाई पराजित गरेको नेपालले दोस्रो खेलमा ६ रनको जित निकाल्यो ।
पहिलो खेलमा १ सय २९ रनको लक्ष्य नेपालको लागि पारस खड्काले अविजित रहदै ८६ रनको अर्धशतकीय इनिङ्स खेले ।
दोस्रो खेलमा पहिले ब्याटिङ गरेको नेपालले बिनोद भण्डारीको अर्धशतकमा १ सय ७३ रन बनाउन सफल भयो । मलेसियाविरुद्ध नेपालले बनाएको यस रन सर्वाधिक स्कोर हो । जवाफी लक्ष्य पछ्याएको मलेसियाले १ सय ६७ रन मात्र बनायो र, नेपालले सिरिज २–० ले कब्जा गर्यो ।
लगत्तै सिंगापुरमा भएको आईसीसी टी-ट्वान्टी विश्वकप एसिया रिजनल फाइनल प्रतियोगितामा भेट भयो । ९ ओभरमा छोट्टाईएको खेलमा ८४ रनको लक्ष्य पछ्याएको नेपालले ८ ओभरमा ३ विकेट गुमाएर लक्ष्य पूरा गर्यो । खेलमा ज्ञानेन्द्र मल्लले ५१ रनको अर्धशतकीय इनिङ्स खेले ।
यस्तै सन् २०२० मा एसीसी इस्टर्न रिजन टी-ट्वान्टीमा पनि नेपाल र मलेसियाबीच प्रतिस्पर्धा भएको थियो । उक्त खेलमा भने नेपाल पराजित भएको थियो । १ सय ५५ रनको लक्ष्य पछ्याउने क्रममा नेपाल १ सय ३२ रनमा अलआउट भएको थियो ।
अन्तिम पटक नेपाल र मलेसियाबीच टियु मैदानमा सोमबार प्रतिस्पर्धा भएको थियो । जुन खेलमा नेपालले ९ विकेटको सहज जित निकालेको थियो ।
मलेसियाले दिएको १ सय १० रनको सामान्य लक्ष्य नेपालले १२ ओभर १ बलमा १ विकेटको क्षतीमा पूरा गरेको थियो ।
