खेलाडी खुलेर खेलिरहेका छन् – कप्तान मल्ल

काठमाडौं । हल्लिरहने नेपाली क्रिकेटरको ब्याटिङ लाइन पछिल्लो समय सुधारोन्मुख देखिन्छ । लामो समयपछि अन्तराष्ट्रिय क्रिकेटमा फर्किएको नेपाली क्रिकेटले सुधारिएको ब्याटिङ देखाएको छ ।

नेपालमा जारी त्रिकोणात्मक टी–ट्वान्टी सिरिजमा नेपाली खेलाडीले गरेको ब्याटिङलाई आधार मान्य हो भने खेलाडीको प्रर्दशन सन्तोषजनक छ ।

सिरिजको पहिलो खेलमा नेदरल्यान्ड्समाथि ९ विकेटले जित निकाल्दा नेपालका लागि ओपनर जोडीले उत्कृष्ट सुरुवात गरेका थिए । नेदरल्यान्ड्सले दिएको १ सय ३७ रनको लक्ष्य नेपालले १५ ओभरमा मात्र एक विकेट गुमाएर पुरा गरेको थियो ।

दोस्रो खेलमा मलेसियामाथि पनि ९ विकेटले जित निकाल्दा ओपनरद्धय आसिफ शेख र कुशल भुर्तेलले उत्कृष्ट अर्धशतकीय इनिङ्स खेलेका थिए । मलेसियाले दिएको १ सय १० रनको लक्ष्य नेपालले १२ दशमलव १ ओभरमा मात्र एक विकेट गुमाएर पुरा गरेको थियो ।

नेदरल्यान्ड्ससँग भएको दोस्रो खेलमा आसिफ शुन्य रनमा आउट भएपनि कुशल र दिपेन्द्र सिंह ऐरीले अर्धशतकीय इनिङ्स खेलेका थिए । नेदरल्यान्ड्ससँगको दोस्रो खेलमा नेपाल पराजित भएपनि नेपालले पाहुना टोलीलाई २ सय ७ रनको विशाल चुनौती दिएको थियो । जुन टी–ट्वान्टी अन्तर्राष्ट्रियमा नेपालले विपक्षी टिमलाई दिएको दोस्रो सर्वाधिक रनको लक्ष्य हो । यसले पनि नेपालको ब्याटिङ लाइन सुधारिको संकेत दिन्छ ।

कप्तान ज्ञानेन्द्र मल्ल पनि खेलाडीको ब्याटिङमा सुधार देखिएको बताउँछन् । उनले पछिल्लो समय खेलाडीमा आएको आत्मविश्वासले नेपालको ब्याटिङ लाईन सुधारिएको बताए ।

‘विकेट बने अनुसार ब्याट्सम्यानमा पनि आत्मविश्वास बढेको देखिन्छ । यतिबेला सबै खेलाडी खुलेर खेलिरहेका छन् ।’ कप्तान मल्लले भने, ‘खेलाडीले खुलेर खेल्दा ब्याट्सम्यानलाई बाउन्स र टर्नहरूले पनि फाइदा पुर्याउछ । पहिले–पहिले आत्मविश्वास कम र बल ब्रेक भएर आउँथ्यो । उनीहरु खुलेर खेल्न सकिरहेका थिएनन् ।’
पछिल्लो समय नेपाली खेलाडीले बल ब्याटमा राख्न सकेको कप्तान मल्लले बताए ।

ब्याट्सम्यानले बललाई आफ्नो ब्याटमा राख्न सकेकाले आक्रमक क्रिकेट खेल्ने आत्मविश्वास खेलाडीलाई प्राप्त भएको मल्लले बताए ।

‘अहिले सोचे अनुसारको ब्याटिङ भइरहेको छ । विकेटले पनि सहयोग गरिरहेको छ ।’ उनले भने, ‘खेलाडीले पनि सकरात्मक मनोभाव सहित खेलिरहेका छन् । अझै रन बनाउन सक्छौ ।’

उनले नेदरल्यान्ड्सविरुद्ध अन्तिम २-३ ओभरमा थप रन बनाउन सक्ने भएपनि कुशल मल्ल र करण केसीको विकेटले साथ नदिएको बताए । उनले बीचमा कुशल र करणको विकेट छिटो जाँदा टोलीको स्कोरमा घाटा लागेको बताए ।

‘कुशलले अझ राम्रो र ठूलो स्कोर इनिङ्स खेल्न सक्थ्यो होला । आउट भयो । तर, पनि खुशी छु । जसरी हामीलाई कुशलले सुरुवात दियो । जसले गर्दा हामीले २ सय रनसम्म एउटा मुमेन्टमलाई अघि लिएर जान सजिलो भयो । आगामी दिनमा पनि यसलाई निरन्तरता दिओस ।’ उनले भने ।

बलरका लागि पाठ

सिरिजको तेस्रो खेलमा नेदरल्यान्ड्ससँग ३ विकेटले पराजित भएपनि कप्तान मल्लले नेपालको बलिङलाई एउटा राम्रो पाठ भएको बताए । उनले आफ्नो स्कोर हेरेर विपक्षीलाई हल्का लिन नहुने बताए ।

‘यो नेपाली बलरका लागि सायद एक राम्रो पाठ पनि हो । सुरुमा बलरहरूले अलिकति हलुका रूपमा लिए जस्तो लाग्छ । तर पनि उनीहरूले जसरी ब्याटिङ गरे, जितको हक उनीहरूलाई पनि जान्छ ।’ मल्लले भने, ‘खेलको मध्यतिर २-४ ओभर जति मात्रै भएपनि प्रति ओभर ६ रनभन्दा कम दिन सकेको भए खेल विपक्षीका लागि पनि अलिकति कठिन हुनसक्थ्यो । हामीले रन नियन्त्रण गर्न सकेनौ ।’

उनले मैदानमा मिस फिल्ड भन्दा पनि ब्याट बाउन्सले नेदरल्यान्ड्सलाई फाइदा भएको बताए ।

उनले अन्तिम क्षणमा बल मैदानमा बढी बाउन्स हुन्दा नेदरल्यान्ड्सलाई फाइदा भएका उल्लेख गरे ।

हारपछिको जित

नेपाललाई पराजित गर्दा नायक बनेका नेदरल्यान्ड्सका ब्याट्सम्यान बास डे लिडले हारपछिको जितले खुसी रहेको बताए । उनले नेपालसँगको हारबाट सिक्दै जितमा परिणत गरेको बताए ।

‘नेपालकोविरूद्ध पहिलो खेल हार्न पुगेका थियौ । हामीले हराबाट पनि केही सिकेका छौं र त्यसलाई सकारात्मक पनि लिएका थियौ । त्यसलाई जीतमा परिणत गरेका छौं ।’ म्यान अफ दि म्याच लिडले भने, ‘यो एक ठूलो भावनाको जित पनि हो । तर, हामी अझै पनि सोच्द छौ कि हामीले धेरै कुरा सिक्नु छ । हामी अझै राम्रो गर्न सक्छौ ।’
उनले पिच राम्रो भएकाले आफ्नो अविजित ८१ रनको इनिङ्स सम्भव भएको बताए ।

उनले भने, ‘पिच राम्रो छ । एकदम राम्रो, फ्ल्याट विकेट थियो । धेरै मोडहरू थिएनन् । त्यसैले यो ब्याटिङ तय भएको थियो । पिचमा सेट भएको कसैलाई पनि आउट गर्न कठिन हुन्छ । यहाँ त्यही भएको हो ।’

‘म स्पस्ट रूपमा दर्शक, समर्थकको भिडलाई सम्झन्छु । तर मैले सरकारको निर्णय थाहा पाए । त्यो स्विकार्नु पर्छ । यतिबेला कोरोनाका घटनाहरु बढी रहेका छन् ।’ लिडले भने ।