अवसरलाई गुमाउन चाहन्न : कुशल

काठमाडौं । कुशल भुर्तेल टी–ट्वान्टी अन्तर्राष्ट्रिय क्रिकेटमा लगातार दुई खेलमा अर्धशतक जोड्ने पहिलो नेपाली खेलाडी बनेका छन् । उनले त्रिवि मैदानमा जारी त्रिकोणात्मक टी–ट्वान्टी क्रिकेटमा नेदरल्यान्ड्सविरुद्ध डेब्यु गर्दै अर्धशतक बनाएका थिए ।

नेदरल्यान्ड्सविरुद्ध ६२ रनको अर्धशतकीय इनिङ्स खेलेको उनले आफ्नो दोस्रो खेलमा मलेसियाविरुद्ध अविजित अर्धशतकीय इनिङ्स खेलेका थिए । उनले मलेसियाविरुद्ध ६१ रनको अर्धशतकीय इनिङ्स खेले । कुशल टी–ट्वान्टी अन्तर्राष्ट्रियमा नेपालका लागि लगातार दुई अर्धशतक बनाउने पहिलो खेलाडी बनेको हुन् ।

नयाँ ओपनिङ जोडीको रुपमा आएका कुशल र आसिफ शेखले आफ्नो डेब्यु खेलमा १ सय १६ रनको साझेदारी गरेका थिए । कुशल र आसिफले टी–ट्वान्टी अन्तर्राष्ट्रियमा नेपालका लागि सर्वाधिक रनको साझेदारीको कीर्तिमान समेत बनाएका छन् ।

दोस्रो खेलमा पनि कुशल र आसिफले १ सय २ रनको आझेदारी गरेका थिए । लगातार दुई खेलमा अर्धशतक बनाएपछि कुशलले आफ्नो प्रदर्शनबाट सन्तुष्ट रहेको बताए ।

‘म धेरै खुसी छु । पहिलो कुरा आफ्नो टिम जितेको छ । दोस्रो टिमको जितमा मेरो प्रदर्शन राम्रो रह्यो ।’ कुशलले भने ।

नेदरल्यान्ड्सविरुद्धको खेलमा टी–ट्वान्टी अन्तर्राष्ट्रियमा डेब्यु गर्दा आफुमा कुनै दबाब नरहेको उनले सुनाए । उनले लामो समय घरेलु प्रतियोगितामा ओपनिङको भुमिका निभाएका नेदरल्यान्ड्सविरुद्ध आफुमाथी दबाब नरहेको बताएका हुन् ।

‘डेब्यु खेलमा पनि आफुमाथि दबाब लिएको थिएन । किनभने मैले यसकै लागि भनेर पहिले देखिनै धेरै मेहनत गरेको थिए ।’ उनले भने, ‘यो मेरा लागि सुनौलो अवसर हो । म यस अवसरलाई गुमाउनु हुन्न भन्ने सोचमा खेलिरहेको छु ।’

उनले थपे, ‘मलाई टिममा एक भूमिका दिएको छ । मैले त्यही आफ्नो भूमिका निभाएको हो । पछिल्लो दुई तीन वर्षदेखि घरेलु प्रतियोगितामा ओपनिङ गर्दै आएको छु । यसअघि एमर्जिङ कपबाट पनि मैले ओपनिङ गरेको थिए ।’

प्रशिक्षक डेभ वाटमोरले प्रतिस्पर्धा बिना खेलाडी कस्तो भन्ने चिन्न नसकिने बताए ।

उनले सुरुवाती दुई खेलमा उत्कृष्ट प्रदर्शन गरेका कुशल र आसिफ उत्कृष्ट खेलाडी रहेको बताए ।

‘मैले महसुस गरे कि उनीहरू (कुशल र आसिफ) दुबै राम्रा छन् । उनीहरु आफ्नो स्थानमा एक अर्काबीच प्रतिस्पर्धा गरिरहेका थिए । मलाई दुबै खेलाडी ११ मा पर्न सके राम्रो हुन्थ्यो लागेको थियो । तर, प्रशिक्षणका दौरान अन्तिम अभ्यास खेलमा पारस घाइते भए र यो पक्का भयो कि दुबैले खेल्ने छन् ।’ प्रशिक्षक वाटमोरले भने ।

प्रशिक्षक वाटमोरले प्रतियोगिता जित्नेमा विश्वस्त रहेको बताए ।

उनले नेदरल्यान्ड्स टोलीमा धेरै जसो युवा खेलाडी भएकाले नेपाल जित्नेमा विश्वस्त रहेको बताए । नेदरल्यान्ड्स टोली चिसो ठाउँबाट आएकाले उनीहरुलाई यहाँको मौसमसँग घुलमिल हुन समय गाह्रो भएको बताए । तर, नेदरल्यान्ड्सले दोस्रो खेलमा मलेसियाविरुद्ध राम्रो प्रदर्शन गरेको थियो ।