त्रिकोणात्मक सिरिज : नेपाल र मलेसिया भिड्दै 

काठमाडौं । त्रिकोणात्मक टी–ट्वान्टी क्रिकेट सिरिज अन्तर्गत आज नेपालले मलेसियासँग प्रतिस्पर्धा गर्दैछ । टियु अन्तर्राष्ट्रिय क्रिकेट मैदानमा नेपाल र मलेसियाबीचको खेल अपरान्ह १ः१५ बजे सुरु हुनेछ ।

पहिलो खेलमा नेदरल्यान्ड्सलाई ९ विकेटले पराजित गरेको नेपाल सिरिजमा लगातार जित निकाल्ने लक्ष्यका साथ मैदान उत्रिने छ । यता मलेसिया भने पहिलो जितको खोजीमा रहनेछ ।

नेदरल्यान्ड्ससँग आइतबार भएको खेलमा १५ रनले पराजित भएको मलेसियाको लक्ष्य नेपाललाई पराजित गर्नु रहने छ । तर, घरेलु मैदानमा नेपालमाथी जित निकाल्न नेपाललाई सजिलो भने हुने छैन् ।

सिरिजमा अन्डर डग टिमको रुपमा रहेको मलेसियामा नेदरल्यान्ड्सविरुद्ध बलिङमा चुकेको थियो । मलेसिया त्यो गल्ती नेपालसँग गर्न चाहदैन । अर्कोतर्फ मलेसियासँग नेपाललाई २ खेलमा पराजित गरेको आत्मविश्वास छ ।

हेड टु हेड -

हालसम्म नेपाल र मलेसियाबीच ४ टी–ट्वान्टी र ४ टी–ट्वान्टी अन्तराष्ट्रिय खेल भएको छ । जसमा नेपालले ३ टी–ट्वान्टी र ३ टी–ट्वान्टी अन्तराष्ट्रियमा जित निकालेको छ ।

मलेसियाले पछिल्लो पटक भएको एसीसी इस्टर्न रिजन टी–ट्वान्टीमा नेपाललाई पराजित गरेको थियो । उक्त खेलमा नेपाल २२ रनले पराजित भएको थियो । मलेसिया नेपालविरुद्ध त्यही लय र आत्मविश्वासलाई फेरी एक पटक टियू क्रिकेट मैदानमा फकाउन चाहन्छ ।

प्लेयर्स टु वाच -

नेपाल (ब्याटिङ)

पूर्व कप्तान पारस खड्काको अनुपस्थितीमा नेपाली टोलीले दुई युवा ब्याट्सम्यानलाई स्थान दिएको छ । घरेलु प्रतियोगितामा उत्कृष्ट प्रर्दशन गरेका कुशत भुर्तेल र आसिफ शेखलाई नेदरल्यान्ड्सविरुद्धको खेलमा ओपनिङ ब्याटिङका लागि पठाएको थियो ।

टी–ट्वान्टी अन्तर्राष्ट्रिय डेब्युसँगै ओपनिङ गरेकाद्धय कुशल र आसिफले उत्कृष्ट कीर्तिमानी ब्याटिङ समते गरे । उनीहरुले टी–ट्वान्टी अन्तर्राष्ट्रियमा अर्धशतकसँगै पहिलो विकेटका लागि सर्वाधिक १ सय १६ रनको साझेदारी समेत गरे ।

ओपनिङ जोडी कुशल र आसिफ मलेसियाविरुद्धको खेलमा पनि नेपालका लागि ब्याटिङतर्फ मुख्य हरियार रहने छन् । उनीहरुलाई कप्तान ज्ञानेन्द्र मल्ल र उपकप्तान दिपेन्द्र सिंह ऐरीको साथ रहने छ ।

ज्ञानेन्द्र र दिपेन्द्र नेपालका लागि अनुभवी खेलाडी हुन् । मलेसियासँग प्रायः खेलमा उपस्थित रहेको पय दुई खेलाडी पाहुना टोलीका लागि बाधक बन्न सक्ने छन् । अनुभवीद्धय कप्तान र उपकप्तानले मलेसियाका प्रायः खेलाडीलाई राम्रोसँग चिनेका र बुझेका समेत छन् ।

नेपाल (बलिङ)

मलेसियासँगको खेलका लागि बलिङतर्फ लेग स्पिनर सन्दीप लामिछाने र तिव्र गतिका बलर करन केसी नेपालका लागि मुख्य हतियार रहने छन् ।
अन्तर्राष्ट्रिय स्तरमा फ्रेन्चाइजी टी–ट्वान्टी लिगको अनुभवी सन्दीपले मलेसियासँगको पछिल्लो एक खेलमा मात्र एक ओभर मेडन राख्दै तीन विकेट लिएका थिए ।

उनले शनिबार नेदरल्यान्ड्सविरुद्धको खेलमा पनि चार ओभर बलिङ गर्दै दुई विकेट लिएका थिए ।
यता करनले पनि मलेसियासँगको पछिल्लो खेलमा एक विकेट लिएका थिए । करनले पनि फ्रेन्चाइजी लिग टी–१० को अनुभव लिइसकेका छन् ।

मलेसिया (ब्याटिङ)

सिरिजमा अन्डर डगको रुपमा हेरिएको मलेसियाले नेदरल्यान्डविरुद्ध आफ्नो पहिलो खेलमा सोचेभन्दा राम्रो ब्याटिङ प्रस्तुत गरेको छ । आइतबार भएको खेलमा नेदरल्यान्ड्सले दिएको १ सय ९२ रनको लक्ष्य पछ्याउने क्रममा मलेसियाले १ सय ७६ रन बनाएको थियो ।

मलेसियाका लागि विरन्दीप सिंहले उत्कृष्ट अर्धशतकीय पारी खेलेका थिए । उनले ५३ बलमा समान ६ चौकार छक्का प्रहार गर्दै ८७ रनको अर्धशतकीय पारी खेलेका थिए । उनी नेपालविरुद्धको खेलमा मलेसियाका लागि मुख्य हतियार हुन् । उनले टी–ट्वान्टी अन्तर्राष्ट्रियका २२ खेल खेल्दै ११३.४१ को स्ट्राइक रेटमा ६ सय ५१ रन जोडेका छन् ।

त्यस्तै कप्तान अहमद फाइज पनि मलेसियाका मुख्य खेलाडी हुन् । उनले नेदरल्यान्ड्सविरुद्धको खेलमा रन जोड्न नसके पनि फाइज मलेसियाका अनुभसवी खेलाडी हुन् । पछिल्लो खेलामा मलेसियाले नेपाललाई पराजित गर्दा फाइनले ३० रन जोडेका थिए । उनी अभिनास बोहराको बलमा बोल्ड आउट भएका थिए ।

फाइजले मलेसियाका लागि १९ टी–ट्वान्टी अन्तर्राष्ट्रिय खेलमा ११५.९५ को स्ट्राइक रेटमा ४ सय ३६ रन जोडेका छन् ।
अनवर अरुदिन पनि मलेसियाका अनुभवी र प्रमुख खेलाडी हुन् । नदेरल्यान्ड्सविरुद्धको खेलमा पहिलो बलमा छक्का प्रहार गरेका उनी दोस्रो बलमा लामो सर्ट खेल्ने चक्करमा आउट भएका थिए ।

मलेसिया (बलिङ)

नेदरल्यान्ड्सविरुद्ध मलेसियाका साज्रुल इद्रुसले नखेले पनि उनी नेपालविरुद्ध खेल्न सक्ने छन् । उनीविना मलेसियाका बलरले नेदल्यान्ड्सविरुद्ध खासै चल्न नसकाले इद्रुसलाई नेपालविरुद्ध मैदान उत्रिने सम्भावना प्रवल छ ।

उनले टी–ट्वान्टी अन्तर्राष्ट्रियमा मात्र दश खेल खेल्दा १७ विकेट लिएका छन् । उनको औषत इकोनोमी ७.१७ रहेको छ ।

त्यस्तै अर्का बलर हुन पवनदीप सिंह । पवनदीप मलेसियाका अर्का मुख्य हतियार हुन् । उनले मलेसियाका लागि टी–ट्वान्टी अन्तर्राष्ट्रियमा २० खेल खेलेका छन् ।

२० खेलमा उनले ६.७० को औशत इकोनोमी राख्दै २६ विकेट लिएका छन् । उनले नेदरल्यान्ड्सविरुद्ध ३ ओभरमा २२ रन खर्चदै एक विकेट लिएका थिए ।

याे पनि, नेपालविरुद्ध मलेसिया : हेड टु हेड कस्तो ?