डेम्बेलेलाई सस्तैमा बेच्न बार्सिलोना तयार

एजेन्सी । स्पेनिस क्लब बार्सिलोना उसमान डेम्बेलेलाई सस्तो मुल्यमा बेच्न तयार देखिएको छ ।

लण्डन क्लब आर्सनलले अनुबन्धमा ईच्छा गरिरहेको डेम्बेलेलाई मात्र ५३ मिलियन पाउण्डमा बेच्न बार्सिलोना तयार देखिएको हो ।

स्पेनिस महारथी क्लब २२ बर्षिया डेम्बेलेको मुल्यलाई घटाउदै नयाँ गन्तव्यमा पठाउन तयार छ । उसले सन् २०१७ मा १ सय २५ मिलियन पाउण्डमा डेम्बेलेलाई अनुबन्ध गरेको थियो ।

स्पेनिस पत्रिका मार्काका अनुसार बार्सिलोना आफ्नो प्लेईङ सेट खाली गर्न डेम्बेलेलाई सस्तो मुल्यमा बाहिर पठाउन तयार देखिएको हो ।

उसले डेम्बेलेलाई मात्र ५३ मिलियन पाउण्डमा बेच्न सकिने बताएको छ । सो मुल्यमा फ्रेन्च खेलाडीलाई बेच्दा बार्सिलोनाले करिब साढे ८२ मिलियन पाउण्ड रकम गुमाउनेछ ।

उनले स्पेनिस महारथी क्लबमा तीन सिजन बिताएका थिए । उनी पछिल्लो समय नाउ क्याम्प छाड्ने बिषयसंग जोडिएका छन् ।

उनी जर्मन क्लब बोरुसिया डर्टमण्डबाट बार्सिलोना आएका थिए । उनले बार्सिलोनाका लागि ७२ खेलमा १९ गोलमात्र गर्न सके ।

२२ बर्षिया फरवार्ड बार्सिलोना आउने समय ठुलो अपेक्षा गरिएको थियो । तर लामो समय चोटको समस्याले समेत उनको नाउ क्याम्पको बसाई सुखद रहेन ।

उनी अहिलेसमेत चोटको उपचार गराईरहेका छन् ।

म्यान्चेष्टर युनाईटेड, आर्सनल सहित धेरै क्लबहरु नयाँ सिजनका लागि डेम्बेलेलाई अनुबन्ध गर्न ईच्छुक देखिएका छन् । सोही कारण क्लबहरु डेम्बेलेको चोटको जाँच गरिरहेका छन् ।

आर्सनल भन्दा युनाईटेड डेम्बेले अनुबन्धमा अगाडी देखिएको छ । युनाईटेडका एन्थोनी मार्टियलले सम्भावित गन्तव्यका लागि डेम्बेलेसंग छलफल गरिरहेका छन् ।