धनगढी । आयोजक सुदूरपश्चिम-११ सर्वाधिक पुरस्कार राशीको सुदुरपश्चिम खप्तड गोल्डकप फुटबलको फाइनलमा प्रवेश गरेको छ ।
धनगढी रंगशालामा शनिबार भएको पहिलो सेमिफाइनलमा विभागीय टिम एपीएफ क्लबलाई २-१ गोल अन्तरले पराजित गर्दै आयोजक उपाधि नजिक पुगेको हो ।
सुदुरपश्चिम-११ को जितमा बिक्रम सिंह ठकुरीले दुई गोल गरे । एपीएफका आशिष लामाले एक गोल फर्काए ।
अब, उपाधिका लागि आयोजक सुदूरपश्चिमले थ्री स्टार र हिमालयन शेर्पा क्लबबीचको विजेतासँग मंगलबार खेल्नेछ ।
रोमान्चक बनेको खेलको तीनै गोल पहिलो हाफमा भएको थियो ।
घरेलु समर्थकको साथ पाएको सुदुरपश्चिमले एपीएफविरुद्ध खेलको आठौं मिनेटमा अग्रता बनायो । दिपेङले डिबक्स भित्रबाट उत्कृष्ट गोल गर्दै घरेलु टोलीलाई अग्रता दिलाए । उनले एपीएफका दुई डिफेन्डरलाई बिट गर्दै गोल गरेका थिए ।
यस्तै खेलको ११ औं मिनेटमा दिपेङले व्यक्तिगत दोस्रो गोल गर्दै सुदुरपश्चिमलाई २-० को अग्रता दिलाए । त्यसपछि खेलको २४ औं मिनेटमा एपीएफका आशिषले गोल गर्दै खेल २-१ मा ल्याए ।
डिबक्सको अगाडी प्राप्त बललाई आशिषले दुई डिफेन्डर र आयोजकका गोलरक्षक सुजित बिसीलाई बिट गर्दै गोल गरेका थिए ।
दोस्रो हाफमा दुवै टोलीले थप गोल गर्न सकेनन् र खेल सुदुरपश्चिमले २-१ ले आफ्नो बनायो ।
यससँगै सुदुरपश्चिमले पहिलो पटक प्रतियोगिताको फाइनलमा स्थान बनाएको छ । अघिल्लो संस्करणमा भने सुदुरपश्चिम एपीएफसँग नै पराजित भएको थियो । यस पटक भने एपीएफसँग बदला लिँदै सुदुरपश्चिम फाइनल पुग्न सफल भयो ।
खेलको म्यान अफ दि म्याच सुदुरपश्चिमका बिक्रम चुनिए ।
पहिलो पटक फाइनल पुगेपछि सुदुरपश्चिमका प्रशिक्षक रोहित भण्डारीले अघिल्लो पटक हारेको इखले खेल्दा जित निकाल्न सफल भएको बताए ।
'दुई वर्ष अगाडी हारेको याद छ । त्यसैलाई स्मरण गरेर खेल्यौं । खेल राम्रो भयो । इखले खेल्यौं । सुरुका दुई गोलले सजिलो भयो,' उनले भने ।
एपीएफका प्रशिक्षक सुदिप श्रेष्ठले सुरुमै दुई गोलले पछि पर्दा पुनरागमन गर्न नसकेको बताए ।
'सुरुमा २-० ले पछि पर्दा कम ब्याक गर्न सकेनौं । रेफ्रीको निर्णयले गर्दा हार ब्यहोर्यौ । दोस्रो हाफमा विंगरले खेल्न सकेनन्,' उनले भने ।
सुदूरपश्चिम स्पोर्ट्स क्लबको आयोजनामा जारी प्रतियोगितामा १२ टिमको सहभागीता रहेको छ । प्रतियोगिताको विजेताले २१ लाख १ रुपैया पाउनेछ । उपविजेताले १० लाख १ रुपैँया पाउने आयोजकले जनाएको छ ।
यस्तै प्रतियोगिताको सर्वोकृष्ट खेलाडीलाई बेनेली मोटरसाईकल प्रदान गरिनेछ । यस्तै विभिन्न विधाका उत्कृष्ट खेलाडीलाई १५–१५ हजार प्रदान गरिने छ ।
