काठमाडौं । सहिद स्मारक ए डिभिजन लिगमा सर्बाेत्कृष्ट गोलरक्षक चुनिएका मनाङ मस्र्याङ्दी क्लबका गोलरक्षक दिप कार्कीलाई राष्ट्रिय टिमको प्रारम्भिक प्रशिक्षणमा बोलाईएको छ ।
फिफा विश्वकप छनोटमा अष्ट्रेलिया र चाईनिज ताईपेबिरुद्धको खेलका लागि दिपलाई राष्ट्रिय टिमको प्रारम्भिक टिममा बोलाईएको हो ।
फागुन पहिलो हप्ता सकिएको सहिद स्माकर ए डिभिजन लिगमा उत्कृष्ट गोलरक्षक चुनिएका दिपलाई बाहिर राख्दै एन्फाले ३१ सदस्यीय प्रारम्भिक टोलीलाई प्रशिक्षणमा बोलाएको थियो ।
प्रतियोगितामा मनाङ तेस्रो भएपनि धेरै क्लिन सिट र गोल कम ब्यहोरेका कारण दिप उत्कृष्ट गोलरक्षक चुनिएका थिए ।
तर लिगकै उत्कृष्ट गोलरक्षकलाई बाहिर राख्दै एन्फाले फिफा विश्वकप छनोट अन्तर्गत चाईनिज ताईपे र अष्ट्रेलियासँगको खेलका लागि प्रारम्भिक टोली घोषणा गरेको थियो ।
लिगका उत्कृष्ट गोलकिपर चुनिएका दिपलाई प्रारम्भिक टोली बाहिरै राखेपछि स्विडिस प्रशिक्षक योहान कालिन र एन्फा नेतृत्वको आलोचना समेत भएको थियो ।
‘लिगमा उत्कृष्ट रहेका दिपलाई पनि क्याम्पमा बोलाईएको छ ।’ एन्फा स्रोतले भन्यो ।
भोली (आईतबार) बाट सुरु हुने प्रारम्भिक टोलीको प्रशिक्षणमा दिप सहभागी हुनेछन् ।
यद्यपि आजनै बुढा सुब्बाको फाइनल खेलेको दिप पहिलो दिनको प्रशिक्षणमा सहभागी हुने सम्भावना कम छ ।
यसअघि एन्फाले देश बाहिर रहेका अभिषेक रिजाल, किरण चेम्जोङ र रोहित चन्दलाई प्रारम्भिक टोली बाहिर राख्दै नाम सार्वजनिक गरेको थियो ।
यद्यपी सो टोलीमा लिग खेलेको खेलाडी मात्र समावेश थिए ।
माल्दिभ्सको दोस्रो डिभिजन लिग खेलेका अभिषेक पनि प्रशिक्षणमा सहभागीता जनाउने छन् । हाल उनी नेपालमै रहेका छन् । यस्तै, रोहित र किरण भने केही समयपछि मात्रै प्रशिक्षणमा सहभागी हुने एन्फा स्रोतको भनाई छ ।
लिगमा उत्कृष्ट गोलरक्षकमा साविकको विजेता मनाङ मस्र्याङ्दी क्लबका दिप कार्की, डिफेन्डरमा थ्री स्टार क्लबका अनन्त तामाङ, मिडफिल्डरमा लिग च्याम्पियन मछिन्द्रका विशाल राई बी र स्ट्राइकरमा उपविजेता आर्मी क्लबका कप्तान भरत खवास चुनिएका थिए ।
यस्तै, उत्कृष्ट प्रशिक्षकमा मछिन्द्रकै प्रवेश कटुवाल चुनिदा युवा खेलाडीमा भने न्युरोड टिम एनआरटीका मिडफिल्डर दर्शन गुरुङ चुनिएका थिए ।
लिगको उत्कृष्ट गोलरक्षक चुनिएका दिपले राष्ट्रिय टिमको क्याम्ममा बोलाए उत्कृष्ट प्रदर्शन गर्दै प्रशिक्षकको मन जित्ने बताए । ‘राष्ट्रिय टिममा पर्ने त सम्भावना छ । अभ्यासमा राम्रो गर्छु । अरु प्रशिक्षकको हातमा छ ।’ दिपले भने ।
-1751597995.webp)
