काठमाडौं । फिफा विश्वकप २०२२ छनोट अन्तर्गत चाईजिन ताईपे र अष्ट्रेलियासँगको खेलका लागि राष्ट्रिय फुटबल टिमको तयारी भोली (आईतबारं)बाट सुरु हुने भएको छ ।
अखिल नेपाल फुटबल संघ (एन्फा)ले घरेलु मैदानमा हुने दुई खेलका लागि भोली (आईतबार)बाट अभ्यास सुरु गर्न लागेको हो ।
राष्ट्रिय टिमका ब्यवस्थापक तथा एन्फा केन्द्रिय सदस्य मधुसुदन उपाध्यायले राष्ट्रिय टिमले आईतबारबाट तयारी सुरु गर्ने खेलपाटीलाई बताए ।
‘विश्वकप छनोट अन्तर्गत घरेलु भूमीमा हुने दुई खेलका लागि भोलीबाट तयारी सुरु हुनेछ ।’ उनले भने ।
नेपालले मार्च २६ मा चाईनिज ताईपेसँग घरेलु मैदानमा दोस्रो लेगको खेल खेल खेल्दैछ । लगत्तै ५ दिनपछि नेपालले अष्ट्रेलियालाई घरेलु मैदानमा आतिथ्यता प्रदान गर्नेछ ।
खेल साढे ५ बजे दशरथ रंगशालामा हुनेछ ।
खेल हेर्नका लागि टिकट प्रभु पेबाट किन्न सकिनेछ । एन्फाको आधिकारीक टिकट बिक्रेता प्रभु पेले टिकटका लागि आफु तयार रहेको बताईसकेको छ ।
यसअघि एन्फाले सहिद स्मारक ए डिभिजन लिग सकिए लगत्तै राष्ट्रिय फुटबल टिमको प्रारम्भिक टोलीको घोषणा गरेको थियो । तर मोफसलका प्रतियोगितामा आफ्ना मुख्य खेलाडी ब्यस्त हुने बताउँदै क्लबहरुले प्रशिक्षण केही दिन पर सार्न अनुरोध गरेका थिए । सोही अनुसार निर्धारित समय भन्दा १५ दिनपछि राष्ट्रिय फुटबल टिमले तयारी सुरु गर्न लागेको हो ।
यद्यपि खप्तड सहितका गोल्डकप चलिरहेका कारण काठमाडौं बाहिर रहने खेलाडी केही दिनपछि मात्र राष्ट्रिय टिमको अभ्यासमा सहभागी हुनेछन् ।
यसअघि बाहिर रहेका अभिषेक रिजाल समेत राष्ट्रिय टिममा समाबेश हुनेछन् ।
देश बाहिर खेलिरहेका अभिषेक सहित रोहित चन्द र किरण चेम्जोङलाई एन्फाले आफ्नो प्रारम्भिक टोलीमा राखेको थिएन । अभिषेक भने हाल स्वेदशमै रहेका छन् । यस्तै रोहित र किरण भने केहि समयपछि मात्रै स्वदेश फर्कने छन् ।
यस्तै एन्फाले अन्तिम समय लिगका उत्कृष्ट गोलरक्षक दिप कार्कीलाई पनि क्याम्पमा बोलाएको छ ।
राष्ट्रिय टिमको अभ्यासको सुरुवाती दिनमा काठमाडौंमा उपलब्ध रहेका खेलाडी मात्रै सहभागी हुनेछन् ।
काठमाडौंमा सम्पन्न ए डिभिजन लिग खेलेका आर्मीका सर्वाधिक ७ खेलाडी प्रारम्भिक टोलीमा परेका छन् । यस्तै लिग विजेता मछिन्द्रबाट ५ खेलाडी, मनाङबाट ४ खेलाडी, पुलिस, थ्रीस्टार र संकटाबाट समान ३–३ खेलाडी प्रारम्भिक टोलीमा परेका छन् । यस्तै, एनआरटीबाट २ खेलाडी, जावलाखेल र एपीएफबाट समान एक–एक खेलाडी प्रारम्भिक टोलीमा बोलाईएको छ ।
कतारमा आयोजना हुने फिफा बिश्वकप अन्तर्गत एसिया छनोटमा नेपाल समूह बीमा रहेको छ । ५ खेल खेलको नेपाल १ जितसहित ३ अंक जोड्दै तालिकाको चौथो स्थानमा छ ।
४ खेलबाट १२ अंक जोडेको अष्ट्रेलिया शीर्ष स्थानमा रहँदा ५ खेल खेलेको कुवेत १० अंक सहित दोस्रो स्थानमा छ ।
समान ५ खेलबाट १० अंक जोडेको जोर्डन तेस्रो स्थानमा रहँदा एक अंक पनि जोड्न नसकेको चाईनिज ताईपे पुछारमा रहेको छ ।
प्रारम्भिक टोली :
विकेश कुथु – आर्मी
सुमन अर्याल – आर्मी
विकास खवास – आर्मी
जर्ज प्रिन्स कार्की – आर्मी
भरत खवास – आर्मी
नवयुग श्रेष्ठ – आर्मी
सेसेहाङ आङ्देम्ब – आर्मी
विशाल श्रेष्ठ – मछिन्द्र
रजिन धिमाल – मछिन्द्र
देबेन्द्र तामाङ – मछिन्द्र
विशाल राई बी – मछिन्द्र
सुजल श्रेष्ठ – मछिन्द्र
पुजन उपरकोटी – मनाङ
अन्जन बिष्ट – मनाङ
विमल राना – मनाङ
दिप कार्की – मनाङ
अजित भण्डारी –नेपाल पुलिस
तेज तामाङ –नेपाल पुलिस
रबि पासवान –नेपाल पुलिस
अमित तामाङ – संकटा
सरोज दाहाल – संकटा
सुवास गुरुङ – संकटा
छिरिङ गुरुङ – च्यासल
एलेन न्यौपाने – च्यासल
सुनिल बल – च्यासल
अनन्त तामाङ –थ्री स्टार
बिक्रम लामा –थ्रीस्टार
मिक्छेन तामाङ –थ्रीस्टार
एरिक विष्ट – एन आर टी
दर्शन गुरुङ – एन आर टी
आशिष लामा – एपीएफ
दिलेन लिक्तान – जावलाखेल
अभिषेक रिजाल –जे जे स्पोर्टस् (माल्दिभ्स)
रोहित चन्द्र – पर्सिजा जाकर्ता (इन्डोनेशिया)
किरण कुमार लिम्बु – पञ्जाब एफसी (भारत)
