धनगढी। आयोजक सुदुरपश्चिम-११ चौंथो संस्करणको सुदूरपश्चिम खप्तड गोल्डकप फुटबलको सेमिफाइनलमा प्रवेश गरेको छ ।
कैलाली हसनपुरस्थित धनगढी रंगशालामा मंगलबार भएको क्वाटरफाइनलमा भारतको कंचनजंघा एफसीलाई ४-२ गोल अन्तरले पराजित गर्दै आयोजक अन्तिम चारमा पुगेको हो ।
सुदुरपश्चिमको जितमा बिक्रम सिंह ठकुरीले दुई गोल गरे । यस्तै फिलिप तामाङ र दिपेश श्रेष्ठले एक एक गोल गरे ।
कंचनजंघाका अभिषेक दर्जी र छिरिङ तामाङले एक एक गोल फर्काए ।
खेलको १० औं मिनेटमा बिक्रमको गोलबाट घरेलु टिमले अग्रता बनाएको थियो । उद्दब खत्रीको पासमा बिक्रमले डिबक्स भित्रबाट दोस्रो बारमा उत्कृष्ट गोल गरे ।
१९ औं मिनेटमा फिलिपले गोल गर्दै आयोजकको अग्रता २-० को बनाए । कंचनजंघाका गोलरक्षक निघम सिंह अगाडी बढेको अवस्थामा फिलिपले सहजै खाली पोस्टमा गोल गरे ।
खेलको २३ औं मिनेटमा बिक्रमले व्यक्तिगत दोस्रो गोल गर्दा आयोजक सुदुरपश्चिम ३-० ले अघि रह्यो । उनले पुन उद्दबको पासलाई सदुपयोग गरे ।
२८ औं मिनेटमा अभिषेकको पेनाल्टी गोलबाट कंचनजंघाले अग्रता ३-१ मा झार्यो । सुदुरपश्चिमका धन बहादुर थापाले डिबक्स भित्र अमिर लामालाई खराब ट्याकल गरेपछी पाएको पेनाल्टी अभिषेकले गोल गरे ।
खेलको ३९ औं मिनेट कंचनजंघाका छिरिङले गोल गर्दा पहिलो हाफमा ३-२ को अवस्थामा सकिएको थियो । डिबक्स नजिकै आयोजकका डिफेन्डरले क्लियर गर्न नसकेको बललाई छिरङले जाली चुमाए ।
तर, खेलको ४६ औं मिनेटमा दिपेशले गोल गर्दै सुदुरपश्चिमलाई ४-२ को सहज जित दिलाए । दिपेशले गोलरक्षकसँगको वान भर्सेस वानको अवस्थामा आकर्षक गोल गरे ।
खेलको म्यान अफ दि म्याच आयोजकका बिक्रम चुनिए। उनले १० हजार नगद सहित ट्रफी प्राप्त गरे ।
अब सुदूरपश्चिमले फाइनल प्रवेशको लागि विभागीय टिम नेपाल पुलिस क्लब र एपीएफबीचको विजेतासँग खेल्नेछ ।
प्रतियोगिताको दोस्रो क्वाटरफाइनलमा बुधबार थ्री स्टार र नव जन जागृती क्लबबीच प्रतिस्पर्धा हुनेछ ।
सुदूरपश्चिम स्पोर्ट्स क्लबको आयोजनामा जारी प्रतियोगितामा १२ टिमको सहभागीता रहेको छ । देशकै सर्वाधिक राशिको मोफसल प्रतियोगिताको विजेताले २१ लाख १ रुपैया पाउनेछ । उपविजेताले १० लाख १ पाउने आयोजकले जनाएको छ ।
यस्तै प्रतियोगिताको सर्वोकृष्ट खेलाडीलाई बेनेली मोटरसाईकल प्रदान गरिनेछ । यस्तै विभिन्न विधाका उत्कृष्ट खेलाडीलाई १५÷१५ हजार प्रदान गरिने छ ।
-1751597995.webp)
