काठमाडौं । राष्ट्रिय टिमका सदस्य पुजा राना र पूर्व सदस्य रेखा पौडेलसहित ७ महिला खेलाडी नेपाल पुलिस क्लबका आबद्ध भएका छन् ।
नेपाल पुलिस महिला टिमका प्रशिक्षक रोशन कार्कीले रेखा र पुजासहित ६ खेलाडी पुलिसमा अनुबन्धित भएको खेलपाटीलाई बताए । सबै खेलाडी नेपाल प्रहरीको जागिरे भएसँगै पुलिस क्लबमा अनुबन्धित भएका हुन् ।
‘रेखा र पुजासहित रौतहटका खेलाडी पुलिससँग जोडिएका छन् । अबका खेलमा उनीहरुले पुलिसको जर्सीमा खेल्नेछन्,’ पुलिस क्लबका पूर्व खेलाडी समेत रहेका उनले भने ।
यस्तै पुलिसले रौतहटबाट खेल्दै आएका सम्झना लावती, मनिषा राउत, सुस्मिता थिङ र सपना राउतलाई क्लबमा अनुबन्ध गरेको छ ।
यस अघि पुजा त्रिभुवन आर्मी क्लबबाट खेल्दै आएकी थिइन् भने रेखाले एपीएफको जर्सी लगाउँदै आएकी थिइन् ।
यू-१९ राष्ट्रिय टिम हुँदै राष्ट्रिय टिमबाट डेब्यु गरिसकेकी स्ट्राइकर रेखाले पछिल्लो पटक प्रधानसेनापति महिला फुटबलमा एपीएफको जर्सी लगाएकी थिइन् । सेन्टर डिफेन्डर पुजाले पनि आर्मीबाट प्रधानसेनापति महिला फुटबल खेलेकी थिइन् ।
पुलिसमा आबद्द सम्झना र मनिषाले यू-१९ राष्ट्रिय टिमबाट नेपालको प्रतिनिधित्व गरिसकेका छन् ।
रेखा र पुजाले विराटनगरमा भएको ५ औं महिला साफ च्याम्पियनसिपबाट राष्ट्रिय टिमबाट डेब्यु गरेका थिए । प्रतियोगितामा रेखाले एक गोल समेत गरेकी थिईन् ।
पछिल्लो १३ औं दक्षिण एसियाली खेलकुद (साग) मा भने रेखा टिम बाहिर रहेकी थिइन् । फिट नरहँदा प्रशिक्षक हरि खड्काको नजरमा उनी परेकी थिईनन् ।
पुलिससँग अनुबन्धित भएपछि रेखाले राष्ट्रिय टिममा पर्न नयाँ टिमसँग महेनत गर्ने बताईन् ।
‘नयाँ टिममा मेहनत गर्दै राम्रो गर्नेछु । कडा मेहेनत गर्दै राष्ट्रिय टिममा पनि स्थान बनाउन चाहन्छु,’ रेखाले भनिन् ।
केहि खेलाडीले टिम छाडेर विदेश पलायन भएपछि पुलिस क्लबको खेल प्रदर्शन खस्किदै आएको थियो । पछिल्लो समय यूवा खेलाडी टिममा अनुबन्ध गर्न नसकेको पुलिसले यस पटक भने युवा खेलाडीमा जोड गरेको छ ।
यूवा खेलाडीको आगमनसँगै पुलिसले आफ्नो टिम थप मजबुद हुने विश्वास लिएको छ ।
‘नयाँ खेलाडीको र अनुभवि खेलाडीको आगमनसँगै टिमको मनोबल उच्च छ । उनीहरुलाई टिममा ल्याउन पाउँदा प्रहरी संगठननै खुसी छ । यहि टिमलाई निखार्दै बलियो हुन्छौं,’ प्रशिक्षक रोशनले भने ।
राष्ट्रिय टिमका पूर्व कप्तान तथा स्ट्राइकर निरु थापाको कप्तानीमा रहेको पुलिसमा अनुष्का शेर्पा, पार्वती लिम्बु, पंजली कुश्वारसँगै यू-१९ तथा राष्ट्रिय टिमकी गोलरक्षक उषा नाथ रहेका छन् ।
