काठमाडौं । नेपाली राष्ट्रिय टोली तथा विभागीय टिम त्रिभुवन आर्मी क्लबका फरवार्ड भरत खवासले मंगलबार नेपाली फुटबलकै माथिल्लो श्रेणीको लिग सहिद स्मारक 'ए' डिभिजन लिगमा ५० गोल पुरा गरे ।
सातदोबाटोस्थित एन्फा कम्प्लेक्समा सहिद स्मारक 'ए' डिभिजन लिग अन्तर्गत ब्रिगेड ब्वाईज क्लबविरुद्धको खेलमा एक गोल गर्दै भरतले करियरको ५० गोलको कोशेढुंगा पुरा गरे ।
ब्रिगेडविरुद्ध खेलको पाँचौं मिनेटमा कप्तान भरतले गोल गरेका थिए । यससँगै भरत 'ए' डिभिजन लिगमा ५० गोल पुरा गर्ने सातौं खेलाडी बने । यस अघि बसन्त थापा, रमेश बुढाथोकी, सुरेन्द्र तामाङ, सन्तोष साहुखल, गणेश लावती र अनिल गुरुङले ५० गोल गरेका छन् ।
लिगमा ५० गोल पुरा गरेसँगै भरतले लिगमा रहेको सन्तोष साहुखलको नाममा रहेको १०० गोलको कीर्तिमान भंग गर्ने लक्ष्य राखेको बताए ।
'लिगमा गोल गर्न एकदमै कठिन छ । दुख सुख गर्दै अगाढी बढे । ५० गोलको आँकडामा पुगेको छु,' भरतले भने, ' अब यहि अड्किदैन । सन्तोष दाइले जस्तै १०० गोल गर्नुछ । उहाँलाई भेट्न कोशिश गर्छु ।'
च्यासल युथ क्लबका सन्तोषले यसै सिजन नेपाली फुटबलकै माथिल्लो श्रेणीको लिगमा १०० गोल पुरा गर्दै लिगमा शतक गोल पुरा गर्ने खेलाडीको कीर्तिमान बनाएका थिए ।
यस्तै भरतले ५० औं गोल श्रीमती र छोरीलाई समर्पित गरे ।
'मेरो हरेक खेल हेर्न उनीहरु आउँछन् । आज आएनन्,' भरतले भने, 'मेरो यो खुसी दुवैलाई समर्पित गर्छु ।'
भरतले बिस २०६३ सालमा संकटाबाट खेल्दै 'ए' लिगमा डेब्यु गोल गरेका थिए । उनले सरस्वतीलाई ५-० ले हराउँदा संकटाका लागि एक गोल गरेका थिए ।
त्यसपछि नेपाल पुलिस क्लब हुँदै भरत आर्मीबाट खेलिरहेका छन् । उनले पुलिसबाट दुई सिजन खेल्दा १७ गोल गरेका थिए ।
यस्तै भरतले आर्मीले अहिलेसम्म लिगको उपाधि जित्न नसकेको तर यस पटक भने उपाधि जित्ने लक्ष्य रहेको बताए ।
'यो लिग जित्ने लक्ष्य बनाएका छौं । फाइनल जस्तै हुन पुगेको छौं,' भरतले भने, 'सबैको मनमा लिग जित्ने छ । आर्मीले अहिले सम्म जितेको छैन । इतिहास बनाउने मौका र चुनौति छ ।'
-1747226778.jpeg)
