काठमाडौं । लिगको पहिलो हारसँगै साविकको विजेता मनाङ मस्र्याङ्दी क्लब उपाधि दौडमा कमजोर बनेको छ ।
उपत्यकामा सञ्चालित शहिद स्मारक ए डिभिजन लिगको दशौं चरणको खेलमा च्यासल युथसँग २–० गोल अन्तरले पराजित भएसँगै मनाङ उपाधि होडबाट कमजोर बनेको हो ।
च्यासलसँगको एक मात्रै हारले मनाङको हातबाट उपाधिको दाबी फुत्किएको हो ।
अब उपाधिको सम्भावना अन्य क्लबको नतिजामा निर्भर हुने भएको छ ।
मनाङलाई पराजित गरेको च्यासल भने रेलिगेशन क्षेत्रबाट बचेको छ । पहिलो हारसँगैे शीर्ष स्थानको आर्मीसँग मनाङ ४ अंकले पछि छ ।
तीन खेल बाँकी रहेको अवस्थामा मनाङलाई शीर्ष स्थानमा फर्कन एक प्रकारले असम्भव जस्तै छ ।
लिगमा मिश्रित नतिजा निकालेको मनाङको प्रर्दशन पनि खासै दरिलो रहन सकेन ।
लिगको दशौंं चरणको समाप्तीसँगै उपाधि होडमा त्रिभुवन आर्मी र मछिन्द्र बलियो देखिएका छन् । यद्धपी उपाधि दौडमा आर्मीको हात माथि देखिएको छ ।
शीर्ष स्थानको आर्मी भन्दा मछिन्द्र मात्र एक अंकले पछाडी छ ।
समान १० खेल खेलेको आर्मीको २३ अंक र मछिन्द्रको २२ अंक छ ।
च्यासलको हारसँगै मनाङले आर्मीसंग दुरी घटाउने अवसर गुमायो । संगै मछिन्द्रसँग अंक बराबरी गर्ने अवसर खेर फाल्यो ।
मंगलबार सातदोबाटोस्थित एन्फा कम्प्लेक्समा न्युरोड टिम एनआरटी र फ्रेन्ड्सबीचको खेलसँगै दशौं चरणका खेल समाप्त भएका हुन् ।
अन्तिम खेलमा एनआरटी क्लब फ्रेन्ड्ससँग २–० गोल अन्तरले पराजित भयो ।
पराजित हुनुका बाबजुद एनआरटी शीर्ष ६ भित्र रहेको छ ।
मंगलबारको खेलसँगै एनआरटीका प्रशिक्षक राजुकाजी शाक्यले उपाधि होडमा मछिन्द्र र आर्मी देखिएपनि लिगको उपाधि आर्मीले जित्ने बताए ।
“अहिलेसम्मको स्थिति हेर्दा मछिन्द्र र आर्मी उपाधि होडमा देखिएका छन् ।” उनले भने ।
दुई मध्य कसले जित्छ भन्ने प्रश्नमा उनले भने, “अहिले आर्मीको एकनाशे प्रदर्शन देखिएको छ । खेल राम्रो छ । उपाधि आर्मीलेनै जित्छ होला ।” उनले भने ।
यसअघि बलियो मानिएको थ्री स्टार नवौं चरणमा मछिन्द्रसँग पराजित हुँदै उपाधि होडबाट बाहिरिएको थियो । दशौं चरणसँगै साविकको विजेता मनाङ पनि लगभग उपाधि होडबाट बाहिरिएको छ ।
मनाङ उपाधि होडमा फर्कन बाँकी तीन खेलमा मछिन्द्र र आर्मीले हार ब्यहोर्नुपर्नेछ ।
सोमबार मात्र विभागीय डर्बीमा पुलिसमाथि जित निकाल्दै आर्मी शीर्ष स्थानमा फर्कियो र दोस्रो स्थानको मछिन्द्रसंग एक अंकको अग्रता लियो ।
त्यसको एक दिन अघिमात्र विभागीय एपीएफमाथि पुनरागमन जित निकाल्दै मछिन्द्र कम्तिमा एक दिनको लागि शीर्ष स्थानमा पुगेको थियो । आर्मी २३ अंक सहित शीर्ष स्थानमा छ ।
गत सिजन लिगमा गरेको खराब प्रदर्शन कारण ऋण बोकेर लिगको सुरुवात गरेको मछिन्द्र २२ अंक सहित दोस्रो स्थानमा छ । मनाङ १९ अंक सहित तेस्रो स्थानमा छ ।
सरस्वतीविरुद्ध ४–० को जित निकालेको थ्री स्टार १७ अंक सहित चौथो स्थानमा छ । समान १५ अंक जोडका संकटा, जावलाखेल र एनआरटी क्रमश पाँचौ, छैटौं र सातौ स्थानमा छन् । हेड टू हेडका आधारमा तीन क्लबको स्थान निर्धारण भएको हो ।
समान १४ अंक भएका पुलिस र फ्रेन्ड्स क्रमश आठौं र नवौं स्थानमा छन् ।
दशौं चरणको अन्तिम खेलमा जित निकालेर रेलिगेशन क्षेत्रबाट बचेको च्यासल १२ अंक सहित दशौं स्थानमा छ ।
ब्रिगेड ब्वाईज ८ अंक सहित ११ औं, हिमालयन शेर्पा ७ अंक सहित १२ औं र एपीएफ ५ अंक सहित १३ औं स्थानमा छ । मात्र एक जित निकालेको सरस्वती रेलिगेशन क्षेत्रमा रहेको छ ।
