काठमाडौं । ललितपुरको फ्रेन्ड्स क्लबलाई लिगको शीर्ष ६ मा रहन दशाौं चरणको खेलमा जित्नैपर्ने दबाब रहेको छ ।
दशौं चरणको खेलमा फ्रेन्ड्सले मंगलबार न्युरोड टिम एनआरटी क्लबको सामना गर्दैछ । दशौँ चरणको यो अन्तिम खेल समत हो । खेल सातदोबाटोस्थित एन्फा मैदानमा अपरान्ह ३ बजे सुरु हुनेछ ।
लिगको ७० औं खेलमा दुबै टिम जित निकाल्दै शीर्ष ६ भित्र आफुलाई स्थापित गर्न चाहन्छन् । जारी लिगमा फ्रेन्ड्स चौथो जितको खोजीमा हुनेछ । एनआरटी छैटौं जित निकाल्न चाहन्छ ।
सरोज योञ्जन लामाको कप्तानीमा रहेको फ्रेन्ड्सलाई ३ ब्राजिलियन र एक भारतीय खेलाडीको साथ रहनेछ । पछिल्लो खेलमा उसले बलियो च्यासललाई १–० गोल अन्तरले पराजित गरेको थियो । जुन खेलमा भारतीय उत्तम राईले निर्णायक गोल गरेका थिए । जारी लिगमा उनि ४ गोल गर्ने दोस्रो विदेशी खेलाडी हुन् ।
ब्राजिलियन प्रशिक्षकको साथ पाएको फ्रेन्ड्स मंगलबार एनआरटीलाई हराउँदै नवौं स्थानमा उक्नल चाहन्छ । फ्रेन्ड्स ११ अंक सहित तालिकाको दशौं स्थानमा रहेको छ ।
‘एनआरटी र हाम्रो लेभल एउटै हो । जसले अवसर बनाउँदै गोल गर्छ उसैको जित हुने हो । हामी त्यसको लागि तयारी छौं,’ फ्रेन्ड्सका सहायक प्रशिक्षक शुक्र तामाङ भन्छन् ।
यता, एनआरटी पनि फ्रेन्ड्सलाई पराजित गर्दै शीर्ष ६ मा आफुलाई उभ्याउन चाहन्छ । एनआरटी १५ अंक सहित तालिकाको सातौं स्थानमा छ । फ्रेन्ड्सविरुद्धको जितले उसलाई शीर्ष चारमा पुर्याउने छ ।
गत सिजन लिगमा ब्यहोरेको खराब नतिजाको कारण यस सिजन एनआरटीले २ अंक सुरुवातबाटै गुमाएको छ ।
‘केहि खेलाडीलाई चोटले सताएपनि शीर्ष ६ मै रहने हुँदा जित्नकै लागि खेल्छौं । टिम तयार छ,’ एनआरटीका प्रशिक्षक राजु काजी शाक्य भन्छन् ।
नियमित कप्तान प्रकाश बुढाथोकीलाई चोटले सताउँदा टिमको कप्तानी डिफेन्डर विक्रम लामाले गर्न सक्छन् ।
नेपाल पुलिस क्लबका पूर्व खेलाडी बिक्रमको नेतृत्वमा एनआरटीले अन्तिम खेलमा ब्रिगेड ब्वाईज क्लबलाई २–० गोल अन्तरले पराजित गरेको थियो ।
फ्रेन्ड्सविरुद्ध एनआरटीले तीन विदेशी खेलाडी खेलाउने छ ।
