काठमाडौं । सहिद स्मारक ए डिभिजन लिगमा अपराजित यात्रा कायम राखेको मनाङ मर्स्याङ्दी क्लबले सोमबार बलियो प्रतिद्वन्द्वी च्यासल युथ क्लबको सामना गर्दैछ ।
अपराजित मनाङले लिगको ६९ औं खेलमा ललितपुरको च्यासलसँग भिड्न लागेको हो । सातदोबाटोस्थित एन्फा कम्प्लेक्समा हुने खेल अपरान्ह ३ बजे सुरु हुनेछ ।
एन्फा मैदानमा दुबै टिम जित निकाल्ने लक्ष्यसहित मैदान उत्रने छन् । लिगमा ९ खेल खेलेको मनाङ १० अंक सहित तालिकाको तेस्रो स्थानमा छ । च्यासल समान खेलबाट ९ अंक जोडेर दशौं स्थानमा छ ।
लिगको दशौँ चरण चलिरहदा च्यासलले दुई खेलमात्रै आफ्नो पक्षमा पारेको छ । यता, मनाङले ७ खेल आफ्नो पक्षमा पार्दा च्यासलले भने ७ खेल अन्य क्लबलाई सुम्पिएको छ ।
कमल श्रेष्ठको कप्तानीमा रहेको मनाङ लगातार जित निकाल्दै उपाधि होडमै रहन चाहन्छ । च्यासलविरुद्ध मनाङ छैठौं जितको खोजीमा हुनेछ ।
'च्यासल बलियो टिम हो । तर पछिल्लो समय उसले आफ्नो पक्षमा नतिजा ल्याउन सकेको छैन । हामी उसलाई कमजोर लिन्नौं,' मनाङका प्रशिक्षक धनेश्वर प्रजापति च्यासलविरुद्धको खेलबारे भन्छन् ।
च्यासलविरुद्ध जित हात पारे मनाङ शीर्ष तीनमै रहने छ । सोमबार उसलाई आदित्य चौधरीको चोटले सताउन सक्छ । डिफेन्डर आदित्य चोटका कारण च्यासलविरुद्ध खेल्ने या नखेल्ने त्यो भने तय भएको छैन । च्यासलविरुद्ध मनाङले ४ विदेशी खेलाडी उतार्ने छ ।
यता, सुरुवाती २ खेलमा प्रभावशाली खेल प्रदर्शन गरेको च्यासल त्यस यता भने रेलिगेशन क्षेत्रबाट बच्ने प्रयासमा छ । राष्ट्रिय टिम केहि खेलाडी र जापानीज खेलाडीको साथ पाएको च्यासलले सोचेअनुरुप प्रदर्शन गर्न सकिरहेको छैन ।
सोमबार साविक विजेतासँग उसले हारको श्रृंखलालाई तोड्ने दाउमा छ । पछिल्लो खेलमा फेन्ड्ससँग तीन अंक गुमाएको च्यासल मनाङलाई पराजित गर्दै लय लिने दाउमा छ ।
राष्ट्रिय टिमका पूर्व स्ट्राइकर सन्तोष साहुखलको कप्तानीमा रहेको च्यासल मनाङविरुद्ध जित निकाल्दै नवौं स्थानमा उक्लन चाहन्छ ।
मनाङविरुद्ध च्यासलले भारतीय डिफेन्डर मोहम्मद आशिफ र अभिषेक लिम्बुलाई गुमाउने छ । दुबै खेलाडी दोस्रो पहेलो कार्डका कारण टिमबाट बाहिर रहनेछन् ।
यस्तै चोटका कारण अघिल्लो खेल गुमाएका सुनिल बलको बारेमा भने अझै अन्योल रहेको छ । मनाङविरुद्ध दुई जापानीज खेलाडी मैदान उत्रनेछन् ।
