शंखुवासभा । चौथो संस्करणको मादी नगर कप आमन्त्रित फुटबल प्रतियोगिताको फाइनल खेल भोली (सोमबार) हुँदैछ । प्रदेश एककै प्रतिष्ठित फुटबल प्रतियोगिताको चौथो संस्करणको फाइनल भिडन्तले दर्शकलाई थप उत्साहित बनाउने अपेक्षा गरिएको छ ।
शंखुवासभा जिल्लाको मादी मुलखर्कमा सञ्चालित प्रतियोगिताले स्थानिय दर्शकलाई हरेक बर्ष उत्साहित बनाउँदै आएको छ ।
‘यस क्षेत्रमा चाहेको बेला राष्ट्रिय र अन्तराष्ट्रिय स्तरका फुटबल प्रतियोगिता हेर्न सकिँदैन । त्यसैले प्रतियोगिता हाम्रा लागि निकै लोकप्रिय छ ।’ स्थानीय दर्शक सुमन जिमी भन्छन् ।
राष्ट्रिय स्तरका फुटबल प्रतियोगिता खेलिरहेका तथा ए, बी र सी डिभिजनका खेलाडीको उपस्थितीले यस क्षेत्रका दर्शक तथा युवा खेलाडीलाई बेग्लै खुसी दिएको जिमी बताउँछन् ।
‘यस क्षेत्रमा धेरै फुटबल प्रतियोगिता हुँदैनन् । केही प्रतियोागितामा स्थानिय खेलाडीमात्र खेल्छन् । तर मादी नगर कपमा धेरै क्लबले स्तरीय खेलाडी मैदान उतारेका कारण स्थानीय खेलाडीले सिक्न पाएका छन् ।’ उनी भन्छन् ।
चौथो संस्करणको प्रतियोगिताको फाइनलमा फेयर फुटबल क्लब धरान र मिर्मिरे क्लव तामाफोक भिड्दैछन् ।
हाङथुम क्लवको खेल मैदानमा हुने फाइनल खेल दिउँसो १ बजे सुरु हुनेछ ।
फाइनलका लागि सम्पुर्ण तयारी पूरा भएको हाङथुम क्लवका अध्यक्ष असिम जिमीले बताए ।
‘फाइनल खेललाई उत्कृष्ट बनाउने लक्ष्य छ । अन्य संस्करण भन्दा यसपटक फाईनललाई थप व्यवस्थित बनाउने छौं ।’ जिमीले भने ।
उनका अनुसार स्थानिय खेलाडीलाई थप सिक्ने अवसर प्रदान गर्न चालू संस्करणमा स्तरिय टोलीलाई प्रतियोगितामा समावेश गरिएको छ ।
‘दर्शकले साथ दिएमा प्रतियोगितालाई अझ भब्य बनाउने लक्ष्य छ ।’ उनले भने ।
शंखुवासभाकै प्रतिष्ठित फुटबल प्रतियोगिता भएको कारण दर्शकको उपस्तिथी स्वभाविक रहेको मेला ब्यवस्थापन प्रमुख सन्दिप घिमिरेले बताए ।
हरेक बर्ष आयोजना हुने फुटबल र कृषि मेलामा हजारौं दर्शकको उपस्थिति रहन्छ ।
अन्तिम दिन फुटबलको फाईनल र मेला हेर्न जिल्ला सदरमुकाम खाँदबारी, चैनपुर, तामाफोक लगायत क्षेत्रबाट दर्शक आउनेछन् । ‘दर्शकलाई निराश नबनाउ भन्नेतर्फ सचेत छौं ।’ घिमिरेले भने ।
मादि नगरपालीकाको संयोजनमा हाङ्थुम क्लवले आयोजना गरेको प्रतियोगिताले यस क्षेत्रको फुटबल बिकासमा महत्वपुर्ण भुमिका खेल्दै आएको छ ।
चौथो संस्करणसम्म आइपुग्दा प्रतियोगिताको लोकप्रियता समेत बढेको छ ।
२०३६ सालदेखि हाङ्थुम कपको नाममा सञ्चालित प्रतियोगितालाई नगरपालिकाले साथ दिएपछि नगर कपको रुपमा प्रतियोगिताले आकार लिएको हो ।
नगरपालिकाले साथ दिएपछि प्रतियोगिता सञ्चालन गर्न सहज भएको क्लवका अध्यक्ष जिमिले बताए । ‘पहिले जस्तो प्रतियोगिता सञ्चालन गर्न गाह्रो छैन । आर्थिक सहयोग नगरपालिकाले गरेपछि केही सहज भएको छ ।’ उनले भने ।
नगरपालिकाले प्रतियोगितालाई अझ ब्यवस्थित गर्न र प्रायोजकका लागि आगामी संस्करणदेखि पहल गर्ने नगर प्रमुख विदुर कुमार लिङ्थेपले बताए ।
‘प्रतियोगिताका लागि नगरले सधै सहयोग गर्ने छ । साथै क्लबलाई पनि थप बलियो बनाउने प्रयास रहने छ ।’ लिङ्थेपले भने ।
दुबै क्लब फाईनलका लागि तयार छन् । फाईनल खेलअघि खेलपाटीसंग कुरा गर्दै दुवै क्लबले प्रतियोगिताको उपाधिमा दाबेदारिता प्रस्तुत गरेका छन् ।
एडभान्स क्लव मानेभञ्ज्याङलाई ३–० ले पराजित गर्दै धरानले फाईनलमा स्थान बनाएको हो । देउराली क्लव धनकुटालाई सडनडेथमा पराजित गर्दै मिर्मिरे क्लव तामाफोकलले उपाधि भिडन्त पक्का गरेको हो ।
प्रतियोगिताको बिजेताले १ लाख १५ हजार रुपैयाँ प्राप्त गर्नेछ ।
