काठमाडौं । विभागीय डर्बीमा उत्कृष्ट जित निकाल्दै त्रिभुवन आर्मी क्लब सहिद स्मारक 'ए' डिभिजन लिग फुटबलको शीर्ष स्थानमा उक्लिएको छ ।
त्रिपुरेश्वरमा आइतबार भएको विभागीय डर्बी भिडन्तमा नेपाल पुलिस क्लबलाई ४-२ गोल अन्तरले पराजित गर्दै आर्मी शीर्ष स्थानमा उक्लिएको हो ।
दशरथ रंगशालामा नवयुग श्रेष्ठले दुई गरेपछि आर्मीले पुलिसविरुद्ध उत्कृष्ट पुनरागमन जित निकालेको हो । यस्तै आर्मीका लागि सुमन अर्याल र सुदिल राईले एक एक गोल गरे ।
पुलिसका बुद्ध बल तामाङ र मान बहादुर परियारले एक एक गोल गरे ।
रोमान्चक खेलमा सुरुवाती अग्रता भने पुलिसले बनाएको थियो । खेलको २० औं मिनेटमा बुद्धले गोल गर्दै पुलिसलाई अग्रता दिलाएका थिए । निर कुमार राईको फ्रिकिकमा बुद्धले हेड गोल गरेका थिए ।
तर, खेलको ३४ औं मिनेटमा सुमन अर्यालले गोल गर्दै आर्मीलाई १-१ गोलको बराबरीमा ल्याए ।
पहिलो हाफ बराबरीमा सकिएको खेलको दोस्रो हाफमा पुन: पुलिसले अग्रता बनायो । खेलको ५८ औं मिनेटमा मानले गोल गर्दै पुलिसलाई २-१ को अग्रता दिलाए । त्यसपछि चम्किए आर्मीका नवयुग ।
खेलको ७७ औं मिनेटमा नवयुगले गोल गर्दै आर्मीलाई २-२ गोलको बराबरीमा ल्याए । ८५ औं मिनेटमा नवयुगले व्यक्तिगत दोस्रो गोल गर्दै आर्मीलाई ३-२ को अग्रता दिलाए ।
त्यसपछि खेलको ८९ औं मिनेटमा सुदिलले गोल गर्दै आर्मीलाई ४-२ को उत्कृष्ट जित दिलाए ।
खेलमा नवयुग म्यान अफ दि म्याच चुनिए ।
जितसँगै आर्मीले १० खेलमा २३ अंक जोडेको छ । र, मछिन्द्र फुटबल क्लबलाई १ अंकले पछि पार्दै आर्मी शीर्ष स्थानमा उक्लिएको छ । मछिन्द्रको २२ अंक रहेको छ ।
पुलिस १० खेलमा १४ अंक जोडेर सातौं स्थानमा रहेको छ ।
के भन्छन् प्रशिक्षक ?
जितपछि आर्मीका प्रशिक्षक नवीन न्यौपानेले खेलाडीको मेहेनतले पुनरागमन जित निकाल्न सफल भएको बताए ।
'खेलाडीले कडा मेहेनत गरे । जसको कारण पुनरागमन जित निकाल्न सफल भयौं । गोल खाएपनि निराश नभई खेल्दा सफल भयौं,' उनले भने ।
यस्तै न्यौपानेले खेलाडीमा उपाधिको भोक देखिएको बताए ।
'पहिलो हाफमा अवसर पाउँदा पनि हुनुपर्ने गोल भएन । दोस्रो गोलनै टर्निङ प्वाइन्ट भयो,' उनले थपे, 'जसरी पनि उपाधिका लागि खेल्नुपर्छ भन्ने भावना खेलाडीमा छ ।'
पुलिसका प्रशिक्षक अनन्त राज थापाले तीन अंक जोड्ने लक्ष्यसहित मैदान उत्रिएपनि खेलाडीको गल्तीमा सफल हुन नसकेको बताए ।
'तीन अंकका लागि खेल्न आएका थियौं । अट्याकमा आएका थियौं । गोल पनि निस्कियो तर, आफ्नै खेलाडीले गल्ती गर्दा पहिलो गोल खायौं । पछिल्लो १०-१२ मिनेट पछि पर्यौं,' उनले भने ।
यस्तै खेलमा हार व्यहोरेपनि टिमको प्रदर्शन राम्रो भएको बताए ।
'खेल हाम्रो राम्रो रह्यो । युवा खेलाडीलाई खेलाएको थिए । राम्रो खेले । आउने दिनमा राम्रो हुन्छ । यहिँ खेल खेले शीर्ष ६ को लागि राम्रो हुन्छ,' उनले थपे ।
आर्मी प्लेईङ सेट -
नवयुग श्रेष्ठ, सेसेहाङ आङ्देम्बे,विकास खवास,विकास तामाङ,सन्तोष तामाङ, सुमन अर्याल,विकेश कुथु,भरत खवास, दिनेश हेन्जन, जर्ज प्रिन्स कार्की, युद्ध शाही
पुलिस प्लेईङ सेट-
अजित भण्डारी,मान बहादुर परियार,निर कुमार राई,बुद्ध बल तामाङ,रोशन खड्का,तेज तामाङ,हेम तामाङ,प्रवेश कुवर,सौजन राई, रबि पासवान,अन्जन राई
