काठमाडौं । सहिद स्मारक 'ए' डिभिजन लिग फुटबलमा थ्री स्टार क्लबले सरस्वती युथ क्लबविरुद्ध शानदार जित निकालेको छ ।
त्रिपुरेश्वरथित दशरथ रंगशालामा शनिबार भएको खेलमा थ्री स्टारले रेलिगेशन क्षेत्रको सरस्वतीलाई ४-० गोलको फराकिलो अन्तरले पराजित गरेको हो ।
थ्री स्टारको जितमा सन्जोग राईले ह्याट्रिक गरे । यस्तै एक गोल लाल राम्मव्राले एक गोल गरे ।
सरस्वतीसँग पहिलो हाफ गोलरहित बराबरी खेलेको थ्री स्टारले दोस्रो हाफमा चार गोल गर्यो ।
भारतीय खेलाडी लाल राम्मव्राले खेलको ४९ औं मिनेटमा गोल गर्दै टोलीलाई अग्रता दिलाएका थिए । ५७ औं मिनेटमा सन्जोगले गोल गर्दै थ्री स्टारलाई २-० को अग्रता दिलाए ।
खेलको ६० औं मिनेटमा सन्जोगले व्यक्तिगत दोस्रो गोल गर्दा थ्री स्टार ३-० ले अघि रह्यो । त्यसपछि खेलको ७१ औं मिनेटमा गोल गर्दै सन्जोगले ह्याट्रिक पुरा गरे ।
यससँगै सन्जोग जारी लिगमा ह्याट्रिक गर्ने पहिलो खेलाडी समेत बनेका छन् । यस्तै सन्जोग बिस २०७० सालपछि ए डिभिजन लिगमा ह्याट्रिक गर्ने पहिलो खेलाडी बनेका छन् ।
खेलमा सन्जोग म्यान अफ दि म्याच चुनिए ।
जितसँगै थ्री स्टार लिगको चौंथो स्थानमा उक्लिएको छ । थ्री स्टारले १० खेलमा १७ अंक जोडेको छ।
पुछारको सरस्वतीले १० खेलमा ४ अंक जोडेको छ ।
के भन्छन् प्रशिक्षक ?
जितपछि थ्री स्टारका मुख्य प्रशिक्षक मेघराज केसीले पहिलो हाफमा गोल नहुँदा टिमलाई दबाब तर खेलाडी परिवर्तनपछि टिमको प्रदर्शन राम्रो भएको बताए ।
'थ्री स्टारलाई आज त्यस्तो दबाब थिएन । तर, पहिलो हाफमा स्कोर नहुदा हामीलाई उल्टो दबाब भयो,' केसीले भने, 'त्यसैले दुई खेलाडी परिवर्तन गर्यौ । जसले गर्दा स्कोर निस्कियो । दोस्रो हाफमा र पहिलो हाफमा उत्तिकै अवसर बनायौ । एउटा खेलाडी सफल नहुँदा अर्कोलाई मौका दियौं ।'
सरस्वतीका मुख्य प्रशिक्षक प्रदिप नेपालले दोस्रो हाफमा नसोचेको गोल हुँदा खेलमा फर्कन नसकेको बताए ।
'पहिलो हाफमा रणनीति सफल भयो । दोस्रो हाफमा सिल्ली गोल खायौं । त्यसपछि दबाबमा आउँदा खेलमा फर्किन पाएनौ,' उनले भने, 'अझै ३ खेल बाँकी छ । अबको खेल निकै महत्वपूर्ण हुनेछ । अन्तिम खेलसम्म रेलिगेशन कुर्नुपर्छ ।'
थ्री स्टार प्लेईङ सेट -
अनन्त तामाङ, लाल राम्मव्रा, विक्रम लामा,प्रिसो,वासिउ हाजमत,रुपेश केसी,अशोक खवास,एरिनोसो,सन्जोग राई, निशान खड्का,सुशील राई
सरस्वती प्लेईङ सेट -
एमबी आन्द्रे,दिपेश श्रेष्ठ,प्रदिप भण्डारी,सुशन लामा,मनिष थापा,दिपक भुसाल,पूर्ण बहादुर श्रेष्ठ, बिनोद केसी,बर्सात गुरुङ,निशान माझी, काजिम बुसारी
