काठमाडौं । सहिद स्मारक 'ए' डिभिजन लिग अन्तर्गत नवौं चरणको खेल सकिदा उपाधि होड र रेलिगेशन क्षेत्र रोमाञ्चक मोडमा पुगेको छ ।
नवौं चरणको खेल सकिदा उपाधि होडमा रहेका शीर्ष ३ क्लब र रेलिगेशन क्षेत्रमा रहेका अन्तिम ३ क्लबको अंक तालिकामा धेरै अग्रता नहुँदा लिगको उपाधि र रेलिगेशन रोमाञ्चक मोडमा पुगेको हो ।
विभागीय टिम त्रिभुवन आर्मी क्लब २० अंक जोडेर लिगको शीर्ष स्थानमा रहेको छ । पहिलो पटक लिग जित्ने बाटोमा रहेको आर्मीलाई शीर्ष स्थानमा १ अंकको अग्रता रहेको छ । दोस्रो स्थानमा रहेको मछिन्द्र फुटबल क्लबको १९ अंक छ ।
गत सिजन खराब प्रदर्शन बाबजुद मछिन्द्रसँग सुरुवातबाटै एक अंक खोसिएको थियो । यस्तै मछिन्द्रसँग समान अंक भएपनि साबिक विजेता मनाङ मर्स्याङ्दी क्लब कार्डको आधारमा तेस्रो स्थानमा छ । ९ खेल खेलेको मनाङ चालु लिगको एक मात्रै अपराजित टिम हो ।
'ए' डिभिजन लिगको ४ पटकको विजेता थ्री स्टार क्लब भने उपाधि होडबाट बाहिरिएको छ । ९ खेलमा ४ मात्रै जित हासिल गरेको थ्रीस्टार १४ अंक सहित तालिकाको पाचौं स्थानमा छ ।
सोमबार मछिन्द्रसँग २–० ले पराजित भएपछि थ्री स्टार क्लबका प्रशिक्षक मेघराज केसीले आफ्नो टिम उपाधि होडबाट बाहिरिएको बताए ।
‘मछिन्द्रसँग केटाहरुले राम्रो खेलेका हुन् । प्रदर्शनबाट खुसी छु । तर हामी उपाधि होडबाट बाहिरिएका छौं । मछिन्द्रसँगको जस्तै प्रदर्शन भए अब हामी शीर्ष ६ को लागि प्रतिस्पर्धा गर्छौ,’ गत सिजन टिमलाई तेस्रो स्थान दिलाएका केसीले भने ।
यता, १५ अंक सहित तालिकाको चौथो स्थानमा रहेको न्युरोड टिम एनआरटीले पनि आफु शीर्ष ६ का लागि खेल्ने बताएको छ । शीर्ष स्थानको आर्मी भन्दा ५ अंकले मात्रै पछि रहेको एनआरटीले आफु उपाधि होडमा नरहेको बताएको छ ।
‘आर्मीसँग ५ अंकको अग्रता छ । हामी उपाधि होडमा रहँदैनौं । हाम्रो मुख्य लक्ष्य शीर्ष ६ हो । राम्रो नतिजा आए दोस्रो र तेस्रौ स्थानको लागि प्रतिस्पर्धा गर्छाै,’ लिगको सुरुवातबाटै २ अंक गुमाएका एनआरटीका प्रशिक्षक राजु काजी शाक्यले भने ।
यता, शीर्ष ३ क्लबले आफुहरु उपाधि होडमै रहेको बताईरहँदा रेलिगेशन क्षेत्र पनि उस्तै रोमाञ्चक स्थितिमा पुगेको छ । मंगलबार पुछारमा एक अंक मात्रै रहेको सरस्वती युथ क्लबले हिमालयन शेर्पाविरुद्ध नाटकिय रुपमा जित हासिल गरेसँगै रेलिगेशन क्षेत्र झनै रोमाञ्चक स्थितिमा पुगेको हो ।
अखिल नेपाल फुटबल संघ एन्फाले यस अघि बिना रेलिगेशनको लिग आयोजना गरेपनि यस पटक एक टिम दोस्रो डिभिजनमा घटुवा हुने बताएको छ । जसका लागि कोटेश्वरको सरस्वती युवा क्लब, विभागीय शसस्त्र प्रहरी बलको एपिएफ र हिमालयन शेर्पा क्लबको प्रतिस्पर्धा चलिरहेको छ ।
अन्तिममा रहेको सरस्वतीको ४ अंक रहेको छ । पुछारबाट दोस्रोमा रहेको एपीएफको ५ अंक रहेको छ । मंगलबार सरस्वतीसँग पराजित भएको शेर्पाको ७ अंक रहेको छ ।
लिगमा ४ खेल बाकी रहँदा सरस्वतीले पुनरागम गर्ने बताएको छ । उसका प्रशिक्षक प्रदिप नेपाल बाँकी खेलमा उत्कृष्ट प्रदर्शन गर्दै घटुवा हुनबाट आफ्नो टिमलाई बचाउने दाउमा छन् ।
‘यो खेल –शेर्पाविरुद्ध) हारेको भए हामी लगभग रेलिगेशन हुन्थ्यौ । अब, अन्य खेलमा झनै राम्रो गर्दै बच्ने प्रयास गर्छाै,’ पछिल्लो ७ वर्षबाट क्लबमा हेरिरहेका उनले भने ।
सरस्वतीको एक जितले एपीएफ र शेर्पालाई भने चिन्ता बढेको छ । कतै आफ्नो टिम पो घटुवा हुने हो कि भन्ने ।
यता, शीर्ष ३ क्लबलाई छाडेर हेर्ने हो भने अन्य क्लबले आफुहरु शीर्ष ६ का लागि खेल्ने बताएका छन् ।
यस पटक शीर्ष ६ मा रहने टिमले राष्ट्रिय लिग खेल्न पाउनेछन् । शीर्ष ६ क्लब र एन्फा प्रेसिडेन्ट कपको शीर्ष ४ टिमबीच राष्ट्रिय लिग आयोजना हुने एन्फाले तयारी गरिरहेको छ ।
अहिले शीर्ष ६ का लागि एनआरटीसँगै थ्रीस्टार, पुलिस, जावलाखेल, संकटा, फ्रेन्ड्स, च्यासल र ब्रिगेड ब्वाईज प्रतिस्पर्धामा रहेका छन् ।
तालिकाको छैठौं स्थानमा रहेको पुलिसको १४ अंक रहेको छ । यस्तै सातौ स्थानको जावलाखेलेका १२ अंक छ । समान १२ अंक रहेको संकटा गोल अन्तरका आधारमा आठौं स्थानमा छ । ११ अंक रहेको फ्रेन्ड्स नवौं स्थानमा छ । ७ अंक रहेको च्यासल दशौं स्थानमा रहँदा ८ अंक रहेको ब्रिगेड ११ औं स्थानमा छ ।
