काठमाडौं । साविक विजेता मनाङ मर्स्याङ्दी क्लबले सहिद स्मारक 'ए' डिभिजन लिग फुटबलमा सहज जित निकालेको छ ।
एन्फा कम्ल्पेक्स सातदोबाटोमा बुधबार भएको खेलमा मनाङले साविक उपविजेता संकटा क्लबलाई ३-० गोल अन्तरले पराजित गरेको हो ।
मनाङको जितमा अन्जन बिष्ट र निशान लिम्बुले एक एक गोल गरे । मनाङले एक गोल आत्मघाती उपहार पाएको थियो ।
खेलको ४२ औं मिनेटमा अमित तामाङको आत्मघाती गोलबाट मनाङले सुरुवाती अग्रता बनाएको थियो । अन्जनको हेड बल क्लियर गर्ने क्रममा अमितले आफ्नै पोस्टमा गोल गरेका थिए ।
त्यसको एक मिनेट नबित्दै ४३ औं मिनेटमा अन्जनले गोल गर्दै मनाङलाई २-० को अग्रता दिलाए ।
त्यसपछि खेलको ७१ औं मिनेटमा निशानले डिबक्स नजिकैबाट उत्कृष्ट गोल गर्दै मनाङलाई ३-० को सहज जित दिलाए ।
खेलमा मनाङका अन्जन म्यान अफ दि म्याच चुनिए ।
संकटाविरुद्ध गोल गरेपछि हेलिकप्टर दुर्घटनामा निधन भएका बास्केटबलका महान खेलाडी कोबी ब्रायन्टलाई सम्झदै मनाङका खेलाडी ।
जितसँगै लिगमा मनाङले अपराजित यात्रा कायम राखेको छ । मनाङ लिगमा अपराजित रहने एक्लो टिम हो ।
संकटालाई हराएसँगै मनाङले ९ खेलमा १९ अंक जोडेको छ । मनाङ तेस्रो स्थानमा रहेको छ ।
दोस्रो स्थानको मछिन्द्र फुटबल क्लबसँग समान अंक भएपनि मनाङ गोल अन्तरमा पछि रहेको छ । शीर्ष स्थानको त्रिभुवन आर्मी क्लबको २० अंक रहेको छ ।
संकटा १२ अंक जोडेर आठौं स्थानमा रहेको छ ।
के भन्छन् प्रशिक्षक ?
जितपछि मनाङका प्रशिक्षक धनेश्वर प्रजापतिले लिगको आठ खेलपछि टिमले उत्कृष्ट खेलेको बताए ।
'८ खेलपछि राम्रो खेल भयो । यहि मैदानमा ट्रेनिङ गर्न पाए राम्रो हुन्छ । अहिले सम्मकै सबैभन्दा राम्रो खेल्यौं,' प्रजापतिले भने, 'खेलाडी प्रेणित भएका छन् । यसलाई निरन्तरता दिनु पर्छ । यो सिजन निकै कठिन छ । अर्को खेल पनि कठिन हुन्छ। कोहि भन्दा कोहि कम छैन । कसैलाई कमजोर आक्दैनौ ।'
संकटाका प्रशिक्षक विजय महर्जनले पहिलो हाफको अन्तिम समयमा दुई गोल खाएपछि खेलमा फर्किन कठिन भएको बताए ।
'४० मिनेटसम्म राम्रो थियो । यसपछि दुई गोल भयो । यहिँ ब्याड लक भयो । दुई गोलले गाह्रो भयो । टर्निङ पोइन्ट नै यहि भयो,' उनले भने, 'त्यसअघि हामीले दबाब दिइरहेका थियौं । चार खेल अझै बाँकी छ । शीर्ष ६ का लागि हामी प्रतिस्पर्धा गर्छौं ।'
मनाङ प्लेईङ सेट -
कमल श्रेष्ठ, फ्लोरेन्ट कोने,दिप कार्की, दयानन्द सिंह,आदित्य चौधरी,पुजन उपरकोटी,भिदाल लुइस,फेमी जोसुवा,निशान लिम्बु, अन्जन बिष्ट, बिमल राना
संकटा प्लेईङ सेट -
लक्ष्मन रुचाल,अमित तामाङ,मासोके ओलुमाउ ,विष्णु सुनार सुबास गुरुङ,विनय श्रेष्ठ, राजेन्द्र रावल,अजयी मार्टिन्स,कर्ण लिम्बु,रोमन लिम्बु, रबि सिलवाल
