काठमाडौं । शीर्ष स्थानको त्रिभुवन आर्मी क्लब आठौं चरणको अन्तिम खेलमा न्युरोड टिम एनआरटीसँग बराबरीमा रोकिएसँगै सहिद स्मारक 'ए' डिभिजन लिगको उपाधि होडमा रोमाञ्चकता छाएको छ ।
आठौं चरणको अन्तिम दिन शनिबार आर्मी एनआरटीसँग गोलरहित बराबरीमा रोकिएको थियो । एनआरटीलाई पराजित गरेको खण्डमा आर्मीलाई शीर्ष स्थानमा ३ अंकको अग्रता लिने अवसर थियो । तर, फिनिसिङमा चुक्दा आर्मी बराबरीमा रोकिन पुग्यो ।
आर्मीको बराबरीसँगै ४२ औं संस्करणको लिगको उपाधि होड रोमान्चक बन्ने देखिएको छ ।
अघिल्लो साता उपाधि दाबेदार मछिन्द्र फुटबल क्लब हिमालयन शेर्पासँग अप्रत्यासित नतिजा व्यहोरेपछि आर्मीलाई उपाधि होडमा सहज भएको थियो । जसबाट आर्मीले ३ अंकको अग्रता पनि बनायो । तर, एनआरटीसँग बराबरीमा रोकिएसँगै आर्मीले शीर्ष स्थानमा मात्र १ अंकको अग्रता बनाउन सफल भएको छ ।
आठौं चरणसम्म -
'ए' डिभिजन लिगमा आठौं चरणका खेल शनिबारबाट सकिएको छ । आठौं चरणको खेल सकिदा लिगमा ५६ खेल सकिएको छ । आठौं चरणको समाप्तिमा आर्मीले १७ अंक जोडेर शीर्षता कायम राखेको छ ।
लिगको हेबी वेट टिम मछिन्द्र १६ अंकसहित दोस्रो र समान अंक जोडेको साविक विजेता मनाङ मर्स्याङ्दी क्लब तेस्रो स्थानमा रहेका छन् ।
१४ अंकसहित थ्री स्टार चौथो स्थानमा रहेको छ । १२ अंक रहेको एनआरटी, जावलाखेल युथ क्लब र संकटा क्लब क्रमशः पाचौं,छैटौं र सातौं स्थानमा रहेका छन् ।
त्यस्तै ११ अंकसहित नेपाल पुलिस क्लब आठौं स्थानमा रहेको छ । ९ अंक जोडेको च्यासल युथ क्लब नवौं स्थानमा छ भने ८ अंक जोडेको ब्रिगेड ब्वाईज र फ्रेन्ड्स क्लब क्रमशः दशौं र ११ औं स्थानमा छन् ।
७ अंकको शेर्पा १२ औं,५ अंकको एपीएफ १३ औं स्थानमा रहँदा १ अंक जोडेको सरस्वती पुछारमा रहेको छ ।
यसरी लिगको तालिका हेर्दा हाल शीर्ष तीन क्लब आर्मी, मछिन्द्र र मनाङ मात्रै उपाधि होडमा देखिएका छन् । तर, शीर्ष सातमा रहेका टोलीबीचको अंक दुरी मात्र ५ अंकको रहेको छ ।
त्यसैले पनि लिगको उपाधि जित्ने अवसर शीर्ष ७ टोलीलाई नै रहेको छ ।
जारी लिगमा अब ३६ खेल खेल्न बाँकी रहेको छ । यस अर्थमा अब प्रत्येक टिमले ५ खेल मात्रै खेल्न बाँकी रहेको छ ।
लिगमा ५ खेल बाँकी रहँदा मनाङ एक्लो अपराजित टिम हो । डिफेन्डिङ च्याम्पियन मनाङले गत सिजन ८ अंकको अग्रता लिँदै कीर्तिमानी आठौं पटक लिगको उपाधि हात पारेको थियो । उसले उपाधि हात पार्दा अन्तिमको एनआरटीसँग २९ अंकको अग्रता थियो ।
यस पटक आर्मी बराबरीमा रोकिएसँगै शीर्ष ४ लाई मुख्य उपाधि दाबेबार मानिएको छ । अन्य टिमले भने शीर्ष ६ मा रहने लक्ष्य बनाएका छन् । लिगको शीर्ष ६ टिमले राष्ट्रिय लिग खेल्न पाउने छन् ।
लिगमा सर्वाधिक गोलकर्ता ?
च्यासलका स्ट्राइकर सन्तोष साहुखल जारी लिगको सर्वाधिक गोलकर्ताको सूचीको शीर्ष स्थानमा रहेका छन् । सन्तोषले यस सिजन ६ गोल गरिसकेका छन् ।
राष्ट्रिय टिमका पूर्व स्ट्राइकर रहेका सन्तोषले हालै ए डिभिजन लिगमा १०० गोल पुरा गर्ने खेलाडीको कीर्तिमान बनाएका थिए ।
यस सिजन सन्तोषले संकटा र पुलिसलाई २ गोल गरेका छन् भने मछिन्द्र र ब्रिगेडलाई एक एक गोल गरेका छन् । सन्तोषले गत सिजन ५ खेल खेल्दै ३ गोल गरेका थिए ।
सन्तोषकै ब्याजका अनिल गुरुङ र जुमानु राईले भने गोलको खाता खोल्न सकेका छैनन् । अनिलले र जुमानु दुबैले ७० साल पछि लिगमा गोल गरेका छैनन् । अनिलले गतसिजन थ्रीस्टारबाट खेलेका थिए भने मिसनमा रहँदा जुमानुले लिगनै खेलेनन् ।
यस्तै राष्ट्रिय टिमका सदस्य आशिष लामा दोस्रो स्थानमा रहेको छन् । एपीएफ क्लबका एक्ला स्ट्राइकर उनले ५ गोल गरेका छन् । यस्तै ४ गोल गर्नेमा मनाङका बिमल राना, पुलिसका सुमन लामा र आर्मीका नवयुग श्रेष्ठ रहेका छन् ।
-1751597995.webp)
-1751593454.webp)
