इस्टपोल र मनकामना विजयी

काठमाडौं । आयोजक इस्टपोल स्कुल 'बी' र नेपालयले पहिलो संस्करणको इस्टपोल अन्तरविद्यालय फुटबल अन्तर्गत छात्रतर्फ विजयी सुरुवात गरेको छ ।

जोरपाटी नारायणटारस्थित आयोजक इस्टपोलको मैदानमा आइतबार भएको खेलमा आयोजकले ग्रीन तारा चाइल्ड हेभेन स्कुललाई टाईब्रेकरमा ३-२ गोल अन्तरले पराजित गर्यो ।

निर्धारित समय १-१ गोलको बराबरी भएपछि खेल टाईब्रेकरमा गएको थियो ।

यस्तै नेपालयले विट्स एकेडमीलाई २-१ गोल अन्तरले पराजित गर्यो । मनकामना हाइ स्कुलले छहारी शिक्षा सदनलाई ३-० ले हराएको छ ।

जीवन तारा स्कुलले आयोजक इस्टपोल स्कुल 'ए' टिमलाई टाईब्रेकरमा २-१ ले हराएको छ । निर्धारित समयको खेल गोलरहित बराबरीमा सकिएपछि खेल टाईब्रेकरमा गएको थियो ।

त्रिकोण पब्लिक स्कुलले बिपुल शिक्षा निकेतनलाई १-० ले हराएको छ । अर्को खेलमा सांग्रिला पब्लिक स्कुलले एकता जेम्स इंग्लिश एकेडमीलाई टाईब्रेकरमा २-० गोल अन्तरले पराजित गरेको छ । निर्धारित समय गोलरहित बराबरीमा सकिएपछि खेल टाईब्रेकरमा गएको थियो ।

प्रतियोगितामा १५ विद्यालयका छात्रातर्फ १२ र छात्रतर्फ १५ टिमको सहभागिता रहेको छ ।