सन्तोषको कीर्तिमानी सय गाेल पुरा

गृहपृष्ठ
फुटबल

बुधबार, पुस २३, २०७६ नमीन ढकाल

काठमाडौं । सहिद स्मारक 'ए' डिभिजन लिग फुटबलमा नेपाल पुलिस क्लब र च्यासल युथ क्लबले बराबरी खेल्दै अंक बाडेका छन् ।

त्रिपुरेश्वरस्थित दशरथ रंगशालामा बुधबार भएको खेलमा पुलिस र च्यासलले २-२ गोलको बराबरी खेल्दै अंक बाडेका हुन् ।

रोमान्चक भएको खेलमा पुलिसका लागि निर कुमार राई र सुमन लामाले एक एक गोल गरे । च्यासलका लागि दुवै गोल सन्तोष साहुखलले गरे ।

खेलको ५ औं मिनेटमा निर कुमारले गोल गर्दै पुलिसलाई सुरुवाती अग्रता दिलाएका थिए । निरले सुमन लामाको फ्रिकिक पासमा भली गोल गरे ।

तर, खेलको १८ औं मिनेटमा सन्तोष साहुखलले गोल गर्दै च्यासललाई खेलमा फर्काए । यससँगै सन्तोषले नेपाली फुटबलकै माथिल्लो श्रेणीको 'ए' डिभिजन लिगमा १०० गोलको कोशेढुंगा पुरा गरे ।

सन्तोष 'ए' डिभिजन लिगमा १ सय गोल गर्ने पहिलो खेलाडी समेत बने ।

सुरुवाती दुई खेलमा ३ गोल गर्दै सन्तोषले लिगमा आफ्नो गोल संख्या ९९ पुर्‍याएका थिए । सन्तोषले यस अघि संकटा क्लबविरुद्ध २ र मछिन्द्रविरुद्ध १ गोल गरेका थिए ।

बिस २०६० सालमा थ्री स्टारबाट लिगमा डेब्यु गरेका सन्तोषले सर्वाधिक गोल पनि थ्री स्टार क्लबबाटै गरेका छन् । उनले थ्री स्टारबाट ६ सिजन खेलेका छन् । जसमा उनले ५२ गोल गरेका छन् । त्यसबाहेक उनले मनाङ, एपीएफ र च्यासलबाट गोल गरेका हुन् ।

त्यसपछि खेलको ४० औं मिनेटमा सुमनले गोल गर्दै पुलिसलाई २-१ को अग्रता दिलाए । तर, दोस्रो हाफमा च्यासलका लागि कीर्तिमानी खेलाडी सन्तोष पुनः नायक बने ।

खेलको ४९ औं मिनेटमा सन्तोषले व्यक्तिगत दोस्रो गोल गर्दै च्यासललाई हारबाट जोगाए । र, सन्तोषले लिगमा आफ्नो गोल संख्या पनि १ सय १ बनाउन सफल भए ।

खेलमा सन्तोष म्यान अफ दि म्याच चुनिए ।

बराबरीसँगै पुलिसले ५ खेलमा ८ अंक जोडेको छ । पुलिस लिगको छैटौं स्थानमा रहेको छ ।

पाँच खेलमा ५ अंक जोडेको च्यासल लिगको नवौं स्थानमा रहेको छ ।

के भन्छन् प्रशिक्षक ?

च्यासलका प्रशिक्षक बाल गोपाल साहुखलले पुलिसविरुद्धको बराबरीले टिमको लय फर्किएको बताए ।

'अघिल्ला दुई खेल हार्दा दबाब भएको थियो । खेलाडीले खेल्न सकिरहेका थिएनन् । यस खेलले आगामी खेलमा राम्रो हुन्छ,' साहुखलले भने, 'सन्तोषको गोलसंगै खेलाडीले राम्रो खेले । अब खेल लयमा आएको छ । हामी लिग जित्न भन्दा शीर्ष चारका लागि खेल्छौं ।'

यस्तै प्रशिक्षक साहुखलले आफ्नो भाई सन्तोषले इतिहास रचेकोमा खुसी भएको बताए ।

पुलिसका प्रशिक्षक अनन्त राज थापाले ३ अंकको लागि खेलेपनि बराबरीमा रोकिनु परेको बताए ।

'मौसमले गर्दा खेल दबाबपूर्ण रह्यो । तीन अंकको लागि खेलेका थियौं। केही टेक्निक समस्याले बराबरी भयो,' थापाले भने, 'विपक्षीले राम्रो खेल खेल्यो । खेल प्रतिस्पर्धात्मक भयो । हाम्रो टिमसँग १०० हान्न सफल भएकोमा सन्तोषलाई बधाई ।'