काठमाडौं । सहिद स्मारक 'ए' डिभिजन लिग फुटबलमा जावलाखेल युथ क्लबले च्यासल युथ क्लबविरुद्ध जित निकालेको छ ।
सातदोबाटोस्थित एन्फा कम्प्लेक्समा मंगलबार भएको खेलमा जावलाखेलले च्यासललाई २-० गोल अन्तरले पराजित गरेको हो ।
जावलाखेललाई जित दिलाउन रुप बहादुर लामा र विजय घलानले एक एक गोल गरे ।
बलियो प्रतिद्वन्द्वी च्यासललाई पहिलो हाफमा गोलरहित बराबरीमा रोकेको जावलाखेलले दोस्रो हाफमा दुई गोल गरेको थियो ।
खेलको ८१ औं मिनेटमा रुप बहादुरले गोल गर्दै जावलाखेललाई अग्रता दिलाए । विजय घलानको पासलाई उनले डिबक्स बाहिरबाट पोस्टको जाली चुमाएका थिए ।
त्यसको दुई मिनेटपछि ८३ औं मिनेटमा विजयले गोल गर्दै जावलाखेललाई २-० को जित दिलाए । उनले च्यासलका गोलकिपर एलेन न्यौपानेले बचाएको रिबाउन्डमा गोल गरेका थिए ।
त्यसअघि पहिलो हाफमा च्यासल हाबी भएको थियो । तर, च्यासलले गोल गर्न सकेन ।
खेलको ३४ औं मिनेटमा च्यासलले गोलको सुनौलो अवसर गुमाएको थियो । सुनिल बलले मैदानको बायाँ भागबाट प्रहार गरेको फ्रिकिक पासमा डिबक्स भित्र रहेका छिरिङ गुरुङ गोल गर्न चुके । उनले बाहिर प्रहार गरेका थिए ।
३८ औं मिनेटमा च्यासलले अर्को अवसर गुमाएको थियो । जापानी खेलाडी हायातो वाकिनोको पासमा डिबक्स भित्रबाट कप्तान सन्तोष शाहुखलको प्रहारले पोष्टको दिशा लिन सकेनन् ।
खेलको ४० औं मिनेटमा जावलाखेलका सुरज ठकुरीले डिबक्स बाहिरबाट हानेको प्रहार दोस्रोबारबाट बाहिरिएको थियो ।
दोस्रो हाफमा भने जावलाखेल आक्रामक रुपमा मैदान उत्रिएको थियो ।
जावलाखेलले ६३ औं मिनेटमा अग्रता बनाउने अवसर गुमाएको थियो । डिबक्स भित्रबाट हरि कठायतको प्रहार च्यासलका गोलकिपर एलनले उत्कृष्ट बचाउ गरे ।
६४ औं मिनेटमा हरिकै फ्रिकिक च्यासलका गोलकिपर एलेनले पन्च गर्दै पोस्ट बाहिर पठाएका थिए ।
त्यस्तै जावलाखेलविरुद्धको खेलमा च्यासलका कप्तान तथा फरवार्ड सन्तोष शाहुखल गोल गर्न असफल भए । जसको कारण सन्तोष लिगमा कीर्तिमानी १ सय गोल गर्न असफल भए ।
लिगमा ९९ गोल गरिसकेका सन्तोष शतक गोलको संघारमा रहेका छन् । जावलाखेलसँगको खेलमा पराजय र गोल गर्न असफल भएसँगै उनलाई कीर्तिमानी गोल गर्न अर्को खेल कुर्नु पर्ने भएको छ ।
खेलमा जावलाखेलका रुप म्यान अफ दि म्याच चुनिए ।
जितसँगै जावलाखेल लिगको तेस्रो स्थानमा उक्लिएको छ । जावलाखेलले ४ खेलमा ८ अंक जोडेको छ ।
च्यासल ४ खेलमा ४ अंक जोडेर आठौं स्थानमा रहेको छ ।
के भन्छन् प्रशिक्षक ?
च्यासलका मुख्य प्रशिक्षक बाल गोपाल शाहुखलले खेल नियन्त्रण बाहिर जाँदा हार व्यहोरेको बताए । उनले टिमको डिफेन्स कमजोर देखिएको र खेलाडीले पनि अल्छि गरेर खेलेको बताए ।
'खेल राम्रो भएन् । खेल कन्ट्रोल बाहिर गयो । धेरै मिस पास भयो,' उनले भने, 'खेलमा धेरै दबाब लियौं । खेलाडी अल्छी देखिए । यस खेल हेर्दा सबै टिमबाट हामीलाई दबाब हुने देखियो । हाम्रो डिफेन्समा पनि समस्या देखियो ।'
जावलाखेलका प्रशिक्षक नरेश थापाले ३ अंकले टिमलाई धेरै फाइदा पुगेको र आगामी दिनमा यसलाई सुधार गर्दै अझ राम्रो गर्ने बताए ।
'उनीहरुलाई दबाब दिएर खेल्दा राम्रो भयो । अघिल्ला खेलमा दबाब दिएर खेल्दा पनि जित्न सकेका थिएनौ,' थापाले भने, 'अबको दिनमा टिम अझै राम्रो बन्नेछ । ३ अंकले क्लबलाई शेरे सहयोग मिल्छ । हामी शिर्ष ६ का लागि खेल्छौं ।'
च्यासल प्लेईङ सेट -
एलेन न्यौपाने, अमिर श्रेष्ठ, सन्तोष शाहुखल,सुनिल बल, नितिन थापा,हेमन्त थापा मगर,छिरिङ गुरुङ, अविशेक लिम्बु, हायातो वाकिनो,ताइगा नाकामुरा,संजय राजबाहक
जावलाखेल प्लेईङ सेट -
अरुज सिंह, कुलदिप कार्की,टेकेन्द्र थापा, रुप बहादुर लामा,आडमा डौम्बिया, फोडे फोफाना,गौतम श्रेष्ठ, निर बहादुर आले,सुजित बुढाथोकी,सिमान्त थापा, सुरज ठकुरी
-1751297393.jpeg)
