काठमाडौं। फ्लुमिनेन्सेले क्लब विश्वकपको अन्तिम १६ मा इटालियन जायन्ट इन्टर मिलानलाई २–० ले हराउँदै ठूलो उल्टफेर गरेको छ। खेलपछि इन्टरका कप्तान लउटारो मार्टिनेजले आफ्नै टोलीका खेलाडीमाथि खुलेर आलोचना गरे।
‘जो बस्न चाहन्छ, बसोस्। जो बस्न चाहँदैन, यहाँ रहनु पर्ने छैन,’ उनले भने, ‘मैले धेरै यस्ता कुरा देखेँ जुन मलाई मन परेन। म जित्न चाहन्छु।’
यो टिप्पणी इन्टरले च्याम्पियन्स लिग र सिरी ए दुवैमा उपविजेता बन्नु परेको ११ महिनाको थकाइपूर्ण सिजनपछि आएको हो।
क्लब विश्वकपअघि च्याम्पियन्स लिगको फाइनलमा ५–० को अपमानजनक हारपछि इन्टरले पूर्वडिफेन्डर क्रिस्टियन चिभूलाई मुख्य प्रशिक्षक नियुक्त गरेको थियो। उनले पनि कप्तान मार्टिनेजको आलोचनालाई समर्थन गरेका छन्।
यो जितले दक्षिण अमेरिकी टोलीको क्लब विश्वकपमा बलियो उपस्थिति पुनः पुष्टि गरेको छ। फ्लुमिनेन्से क्वार्टरफाइनल पुग्ने दोस्रो ब्राजिलियन क्लब बनेको हो।
फ्लुमिनेन्सेका स्ट्राइकर एभेराल्डोले जितपछि भने,‘हामी विश्वलाई देखाइरहेका छौं दक्षिण अमेरिकी फुटबल पनि उत्कृष्ट हुन्छ।’ अब फ्लुमिनेन्सेले शुक्रबार फ्लोरिडाको ओरल्यान्डोमा म्यानचेस्टर सिटी र अल हिलालबीचको विजेतासँग खेल्नेछ।
ब्राजिलबाट क्लब विश्वकपमा सहभागी चारै टोली अन्तिम १६ मा प्रवेश गरेका थिए। त्यसमध्ये फ्लुमिनेन्से र पाल्मेइरसले क्वार्टरफाइनलमा स्थान बनाइसकेका छन्। यसले विश्व फुटबलमा दक्षिण अमेरिकी प्रभाव बढिरहेको संकेत गरेको छ।
