काठमाडौं । कतार एयरवेज सहिद स्मारक ए डिभिजन लिगमा आज (मंगलबार) दुई खेल हुँदैछन् ।
अखिल नेपाल फुटबल संघ एन्फाका अनुसार चौथो चरणको खेल अनुसार मंगलबार च्यासल र जावलाखेल तथा हिमायलन शेर्पा र ब्रिगेड ब्वाईजबीच प्रतिस्पर्धा हुनेछ ।
दुवै खेल एन्फा कम्प्लेक्स सातदोबाटोमा हुनेछ ।
पहिलो खेलमा च्यासल र जावलाखेल बिहान साढे ११ बजे भिड्न सुरु गर्नेछन् । दोस्रो खेलमा हिमालयन शेर्पा र ब्रिगेड दिउँसो ३ बजे भिड्नेछन् ।
लिगमा तीन खेलबाट च्यासलले एक जित, एक बराबर र एक हारबाट ४ अंक जोडेको छ ।
लिगमा अपराजित रहेको जावलाखेलको ५ अंक छ । यस्तै शेर्पा क्लब दुई बराबर र एक हार सहित २ अंक जोडेको छ ।
ब्रिगेड एक जित र दुई हार सहित ३ अंक जोडेर तालिकाको दशौं स्थानमा छ ।
च्यासललाई जावलाखेलको चुनौती
लिगमा अपराजित रहेको जावलाखेल चौथो चरणसम्म आईपुग्दा लयमा देखिन्छ । लिगमा तीन चरणको खेल सकिदाँ उसले हार ब्यहोर्नु परेको छैन । मंगलबार उसले लिगको चौथो खेलमा च्यासल युथको सामना गर्दैछ ।
खेल एन्फा कम्प्लेक्समा बिहान साढे ११ बजे सुरु हुनेछ ।
लिग च्याम्पियन हुने लक्ष्य बनाएको च्यासललाई अपराजित जावलाखेलले कडा चुनौतीको प्रयास गर्नेछ । जावलाखेल युथविरुद्ध च्यासलका फरवार्ड सन्तोष साहुखल थोरै दबाबमा हुन सक्छन् । उनी घरेलु लिग फुटबलमा सय गोलको संघारमा छन् ।
लिग जित्ने लक्ष्य बनाएको च्यासलले तीन खेल सकिदाँ एक जित, एक बराबरी र एकमा हार ब्यहोरेको छ । च्यासल ४ अंक सहित लिगको आठौं स्थानमा छ ।
पहिलो खेलमा संकटालाई २–० ले पराजित गरेको च्यासल दोस्रो खेलमा मछिन्द्रसँग एक एक गोलको बराबरीमा रोकिएको थियो । तेस्रो चरणमा भने एनआरटीसँग २–१ गोल अन्तरले पराजित भएको थियो ।
लिग जित्ने लक्ष्य बनाएको च्यासललाई लिगको उपाधि होडमा फर्कन जित आवश्यक देखिन्छ ।
प्रशिक्षक बाल गोपाल साहुखल जावलाखेल युथविरुद्ध जित हात पार्ने लक्ष्य सहित मैदान उत्रने बताउँछन् ।
‘जावलाखेल राम्रो टिम हो । सन्तुलित टिम छ । तर हामी जितको लागि खेल्छौं । लिग जित्न भनेर अगाडी बढेका छौं । खेलाडीमा आत्माविश्वास छ ।’ उनी भन्छन् ।
गत सिजन दुवै टिमले एक एक गोलको बराबरी खेलेका थिए ।
यता, अपराजित जावलाखेल पनि च्यासलसँग कडा चुनौती दिने बताउँछ । प्रशिक्षक नरेश गिरी बलियो च्यासलसँग आफ्नो टिम भिड्न तयार रहेको बताउँछन् ।
‘च्यासल बलियो टिम हो । उसलाई राम्रो चुनौती दिन चाहन्छौं ।’ उनी भन्छन् ।
जावलाखेलले च्यासलविरुद्ध विदेशी खेलाडी ड्याडी जुनियरलाई गुमाउने छ । उनी दोहोरो पहेलो कार्डको कारण निलम्बनमा छन् ।
जावलाखेलले लिगको पहिलो खेलमा थ्रीस्टार र संकटासँग बराबर खेलेको छ । सरस्वतीलाई पराजित गरेको थियो ।
तीन खेल सकिदाँ जावलाखेल पाँचौं स्थानमा छ । च्यासल आठौं स्थानमा छ ।
शतक खेलको संघारमा ब्रिगेड
२०६१ सालमा पहिलो पटक ब्रिगेड ब्वार्ईज क्लब ए डिभिजन लिगमा बढुवा भएको थियो । त्यसयता निरन्तर लिग खेल्दै आएको उसले मंगलबार लिगमा आफ्नो सय अर्थात शतक खेल खेल्दैछ ।
लिगमा सयौ खेल खेल्दै गर्दा ब्रिगेडले प्रतिद्वन्दीको रुपमा हिमालयन शेर्पा क्लबलाई पाएको छ ।
एन्फा कम्प्लेक्स सातदोबाटोमा हुने खेल दिउँसो ३ बजे सुरु हुनेछ ।
ब्रिगेडले आफ्नो पहिलो संस्करणमा १२ खेल खेलेको थियो भने ६२ सालमा २८ खेल ।
६३ सालमा २६ खेल खेल्दा ६८ सालमा १७ खेल खेलेको थियो ।
यस्तै अन्तिम सिजन १३ खेल मात्रै खेलेको थियो ।
नयाँ सिजन ३ खेल खेलेको ब्रिगेडको समग्रमा लिगमा ९९ खेल पुर्याएको छ ।
ब्रिगेड आफ्नो शतक खेल सुखद् बनाउने लक्ष्यमा छ ।
यता हिमालयन शेर्पा क्लब पहिलो जितको खोजीमा हुनेछ ।
ब्रिगेडका ब्यवस्थापक अर्विन गुरुङ शतक खेलमा सुखद् नतिजा ल्याउने बताउँछन् ।
‘हामी लिगको सयौ खेल खेल्दैछौं । त्यसैले शेर्पाविरुद्धको खेल सुखद् बनाउने लक्ष्यमा छौं । त्यसका लागि तयार पनि छौं ।’ उनले भने ।
उनले शेर्पा र ब्रिगेडको स्तर उस्तै भएकाले आफ्नो टिम जितको लागि खेल्ने बताउँछन् ।
लिगको पहिलो खेलमा मछिन्द्रसँग २–० गोल अन्तरले पराजित ब्रिगेडले दोस्रो खेलमा फ्रेण्ड्सलाई सोहि गोल अन्तरले पराजित गरेको थियो । तेस्रो खेलमा भने मनाङसँग १–० गोल अन्तरले पराजित बनेको थियो ।
मनाङसँगको खेलमा घाईते भएका बिजय गुरुङ शेर्पाविरुद्व खेल्ने बिषयमा टुङ्गो लागेको छैन । मनाङविरुद्व खेल्ने क्रममा विजयको टाउकोमा ६ टाका लागेको छ ।
यता, हिमालयन शेर्पा क्लब समेत ब्रिगेडलाई हराउने दाउमा छ । शेर्पाका प्रशिक्षक सञ्जिव बुढाथोकी ब्रिगेडविरुद्ध जित्नका लागि खेल्ने बताउँछन् ।
‘दुबै टिम बराबरका छौं । तर तीन अंकका लागि खेल्नेछौं ।’ उनी भन्छन् ।
पहिलो र दोस्रो खेलमा विभागीय एपीएफ र पुलिससँग बराबर खेलेको शेर्पा तेस्रो खेलमा भने आर्मीसँग २–० गोल अन्तरले पराजित भएको थियो ।
लिगमा ब्रिगेड दशौं स्थानमा र शेर्पा ११ औं स्थानमा छ ।
-1751297393.jpeg)
